ተፈሥሒ ማርያም ዘዘወትር скачать в хорошем качестве

ተፈሥሒ ማርያም ዘዘወትር

ሰላም ለማርያም ዐጽፈ ወልድ ዋሕድ ወመንበረ ሕያው ነድ ለድንግልናሃ ይደሉ ሰጊድ ለማርያም ዘይቤ ኢይሰግድ ሞጸፈ መብረቅ በሊኅ በርእሱ ለይረድ። ተፈሥሒ ማርያም ድንግልተ ሥጋ ወሕሊና ተፈሥሒ ማርያም ወለተ ኢያቄም ወሐና ጳጦስ አንቲ ዘአስተርአይኪ በደብረ ሲና ጎሞረ ወርቅየ መስፈርቱ ለመና ማርያም ለዕበይኪ ይደሉ መሐና። ተፈሥሒ ማርያም ድንግልተ ኅሊና ወሥጋ ተፈሥሒ ማርያም እንበለ ሕፀፅ ወንትጋ ተፈሥሒ አንቀጽ ዘኢተርኅወ መንሠጋ ለነፍሰ ዚአየ ውስተ ሲኦል ኢይኅድጋ ፍሬ ማኅፀንኪ ወልድ ይክፍለኒ ጸጋ ኀበ ይገብሩ ኅሩያን እንግልጋ ተፈሥሒ ማርያም ይደልወኪ ተፈሥሖ ተፈሥሒ ማርያም ዘልማድኪ ተራኅርኆ ገብርኪ ኃጥእ ሶበ ጸራሕኩ በከልሖ ለቃለ አፉየ ተወኪፈኪ ጽራሖ ኦሆ ኦሆ በልኒ ኦሆ ለቤተ መርዓየ እሁበከ መርኆ። ተፈሥሒ ማርያም ወለተ ሣራ ወርብቃ ተፈሥሒ ማርያም ለደወለ ርስት ማዕነቃ ለረዲኦትየ ፍጡነ እንዘ ትሰወጢ ከመ ባዜቃ ብጽሒ በኢጎንድዮ ኀበ ሀሎኩ ጥቃ ከመ ትፈጽሚ ለልብየ ጻሕቃ። ተፈሥሒ ማርያም እንተ አልብኪ ምሳሌ ተፈሥሒ ማርያም ታቦተ ኅርመት ወጽሌ ተፈሥሒ ጽሪት ዘዕፍረትየ ቢረሌ አስተበፅዕ አንሰ በጉባኤ ዘለኪ ድንጋሌ በኢውልዋሌ እንዘ ዕብል አሌ አንግፍኒ በትንባሌ እምብካይ ወወይሌ። ተፈሥሒ ማርያም ዘአክናፈ ንጽሕኪ ምንታዌ ዘአምሰጥኪ ቅድመ እምቂአተ ኅምዙ ለአርዌ መጽሐፈ ብሥራት ይብሉኪ እለ ሀለዉ ምድረ ፄዋዌ መክፈልተ ርስትየ አንቲ ማርያም እንተ አልብኪ ምንሳዌ ዘፈለጠ ሊተ ኢያሱ ዘነዌ። ተፈሥሒ ማርያም መድኃኒተ (ወለተ) አዳም ወሔዋ ተፈሥሒ ማርያም ሐዳስዩ ጣዕዋ ርጢነ መድኃኒት ወልድኪ ለቊስልየ ዘየሐይዋ ውቂዮ በሰይፍኪ ለፀርየ ነዋ ሰይጣን ስሙ ለነፍስየ ዕድዋ። ተፈሥሒ ዕብለኪ ማርያም በከመ ገብርኤል መልአክ ቡርክት አንቲ እምአንስት ወፍሬ ከርሥኪ ቡሩክ ለዕበየ ንግሥኪ ዘልፈ እንዘ እሰግድ በብረክ አመስጥ አንሰ በጽንዕኪ እምፀርየ ድሩክ ዘይፈቅድ ይንዓወኒ በጽባሕ ወሠርክ። ተፈሥሒ ማርያም ሠርጐ አሮን ሌዋዊ ተፈሥሒ ማርያም ወለተ ዳዊት ሰንቃዊ ሙካፈ ስእለቱ ለኢዮብ አመ በቊስሉ ይደዊ ከመ ትኅጲዮ ለፀርየ ነፍሳተ ብዙኃን ነዓዊ በዲበ አብትር ቀስተኪ ቀስትዊ። ተፈሥሒ ማርያም ዘኢይኃልቅ ትፍሥሕትኪ ተፈሥሒ ማርያም ዘኢይቀብል መዝገብኪ ተፈሥሒ ማርያም ዘኢይኀፅፅ ዝክረ ውዳሴኪ ኢትመንንኒ ለገብርኪ ዘአጥረየኒ ወልድኪ እስመ አንቲ ሊተ ወአነ ዘለኪ። በመኑ እትሜካሕ ማርያም ዘእንበሌኪ ምክሕየ ቀርነ መድኃኒትየ ብኪ ጸናዕኩ እምከርሠ እምየ ማርያም ጠረጴዛሁ ለቁርባነ ወንጌል ብዕልየ ውስተ እዴኪ ገደፍኩ ነፍስየ ወሥጋየ። በመኑ እከብር ማርያም ዘእንበሌኪ ክብረ ኲሉ ነቅዓ ምድር አንቲ ወጠለ ሰማይ ዘላዕሉ አንቲ ውእቱ ለዳዊት ሠርጐ አክሊሉ ብኪ እለ ተወከሉ ኢተኀፍሩ ወኢተኃጒሉ መገቦሙ ወመርሖሙ ወልድኪ በሣህሉ። በመኑ እትፌሣሕ ማርያም ዘእንበሌኪ ፍሥሐ እንተ ወለድኪ መሢሐ ከመ እሕሊ ለኪ ምሕረተ ወፍትሐ ሶበ እዜከር ርኅራኄኪ ንኅኑኀ ወዝኅዙኀ እምሐኬቱ ኅሊናየ ነቅሐ። ኦ ፍጡነ ረድኤት ለጽኑዕ ወለድኩም ወለነፍሰ ኲሉ ቃውም ጊዮርጊስ የዋህ እንበለ መስፈርት ወአቅም ከመ እግዝእትከ ቡርክት ማርያም ርኅሩኀ ልብ አንተ እምበቀል ወቂም። ኦ ፍጡነ ረድኤት በብዙኅ ፆታ ከመ እግዝእትከ ርግበ ኤፍራታ በሰማይ በላዕሉ ወበምድር በታሕታ አምሕለከ ጊዮርጊስ በስመ እምከ ቴዎብስታ ሞገሰ ስምከ ተሀበኒ ከመ ስምከ መንታ ኦ ፍጡነ ረድኤት እምሩጸተ ነፋስ ወዓውሎ ለዘይጼውዓከ በተወክሎ ጊዮርጊስ ቅረብ ለምሕረት ወለተሣህሎ ተወከፍ ወትረ ጸሎትየ ወቃለ ጽራሕየ ኵሎ እስመ ልበ አምላክ ርኅሩኅ በኀቤከ ሀሎ አፍጣኒተ ረድኤት ማርያም በጊዜ ምንዳቤ ወዓፀባ ለዐይን እምቀራንባ አንቲ ውእቱ ረዳኢተ ያዕቆብ በቤተ ላባ በኵሉ ሕሊናሃ ወበኵሉ አልባባ ዘኢታፈቅረኪ ነፍስ ትሠሮ እምሕዝባ። ምንተኑ ዓዓሥየኪ ዕሤተ በእንተ ኵሉ ዘገበርኪ ሊተ ማርያም ሠናይት ዘታፈቅሪ ምሕረተ ሶበሰ ትትአቀቢ ዘዚአየ ኃጢአተ እምኢሐዮኩ አሐተ ሰዓተ። በሰላመ ገብርኤል መልአክ ኦ እግዝእትየ ማርያም ሰላም ለኪ ድንግል በኅሊናኪ ወድንግል በሥጋኪ እመ እግዚአብሔር ፀባዖት ሰላም ለኪ ቡርክት አንቲ እምአንስት ወቡሩክ ፍሬ ከርሥኪ ተፈሥሒ ፍሥሕት ኦ ምልዕተ ጸጋ እግዚአብሔር ምስሌኪ