Diego Toigo - De modis musicis et sacris in Europa Latina скачать в хорошем качестве

Diego Toigo - De modis musicis et sacris in Europa Latina

Die XXI Iul. a. MMVII, inter conventum c. i. ‘Humanitas’ Neapoli celebratum, in academia artis musicae apud monasterium divi Petri ad Maiellam, Didacus Toigo, professor in Athenaeo Patavino, ‘de modis musicis et sacris in Europa Latina sive de scholis capitularibus et pueris cantoribus inter XIV et XV saeculum’ publicam orationem habuit. Cum patrimonium cantus liturgici tradere necesse esset, media quae dicitur aetate educatio iuvenum ansa inde capta floruit posterisque temporibus conspicui hac de causa fructus creverunt. A scholis mediae aetatis ineuntis, quae renovandi impulsu Carolingorum instituebantur, usque ad res novas a Pontifice Eugenio huius nominis IV inductas, qui saeculo decimo quinto plurima in scholis ecclesiasticis refecit atque instituit, ratio docendorum textuum sacrorum ibi excogitata numquam immutata est: doctrina litterarum “usque ad Donatum” cum arte carmina canendi et componendi coniuncta tradebatur, sed pueri in primis auctoritatem atque disciplinae virtutem, modum dein rerumque proportionem, humanitatem denique erga pauperiores exercendam discebant. Inter res musicas eis agendas locum tenet eminentem singulari arte adhibita ludorum scaenicorum in cathedralibus templis celebratio, cum pueris cantoribus opportune vestimentis scaenicis indutis angelorum atque feminarum partes tribuerentur. Quibus sacris ludis huius acroasis pars quaedam, qua imagines ope lucis proiectas aspicere et quaedam fragmenta audire licebit, reservatur.