အဲလိဇဘက်ဘုရင်မကြီးရဲ့ ဘဝဇာတ်ကြောင်း Queen Elizabeth II скачать в хорошем качестве

အဲလိဇဘက်ဘုရင်မကြီးရဲ့ ဘဝဇာတ်ကြောင်း Queen Elizabeth II

ဗြိတိန်သမိုင်းတလျှောက် နန်းစံသက်အရှည်ဆုံးဖြစ်သည့် ဒုတိယမြောက်အဲလိဇဘက်ဘုရင်မကြီးဟာ တော်ဝင်မင်းဆက်ဖြစ်တဲ့ ဝင်ဆာမိသားစုမှ ပေါက်ဖွားလာတာဖြစ်ပြီး ၁၉၂၆ ခုနှစ် ဧပြီ ၂၁ ရက်နေ့မှာ မွေးဖွားသန့်စင်ခဲ့ပါတယ်။ အမည်အပြည့်အစုံက အဲလိဇဘက် အလက်ဇန္ဒြား မယ်ရီ ဝင်ဆာဖြစ်ပြီး မိဘတွေဟာ ယော့ခ်မြို့စားတွေဖြစ်ပါတယ်။ ထိုစဉ်က ဗြိတိန်ကိုစိုးစံတဲ့ အဌမမြောက်အက်ဒွပ်ဘုရင်နဲ့ တူမသာ တော်စပ်တဲ့အတွက် တနေ့မှာ ထီးနန်းအရိုက်အရာကို ဆက်ခံရလိမ့်မယ်လို့ သူမအပါအဝင် ဘယ်သူကမှ ထင်မထားခဲ့ပါဘူး။ အဲလိဇဘက် အသက် ၁၀ နှစ်အရွယ်မှာ ဦးလေးဖြစ်သူ အဌမမြောက် အက်ဒွပ်ဘုရင်ဟာ အိမ်ထောင် ၂ဆက်ကွဲ အမေရိကန်အမျိုးသမီးအတွက် အချစ်ကိုဦးစားပေးပြီး နန်းစွန့်ခဲ့တဲ့အတွက် အဲလိဇဘက်ရဲ့ဖခင် ဘုရင်ဖြစ်လာခဲ့ပါတယ်။ အသက် ၁၈ နှစ်အရောက်မှာ မင်းသမီးငယ်လေးအဖြစ် အမျိုးသမီးအရံတပ်ဖွဲ့မှာ ယာဉ်မောင်းနဲ့စက်ပြင်အဖြစ် တက်ရောက်သင်ယူခဲ့ပါတယ်။ အခြားအမျိုးသမီးငယ်လေးများနည်းတူ သူမမှာလည်း ချစ်ရသူတဦးရှိပြီး နောင်အခါ ရာသက်ပန်ကြင်ယာတော်ဖြစ်လာမယ့် ချစ်သူကတော့ အဲဒီအချိန်က စစ်တပ်မှာတာဝန်ထမ်းဆောင်နေတဲ့ မင်းသား ဖိလစ်ပဲဖြစ်ပါတယ်။ မင်းသားဖိလစ်ဟာ အဲလိဇဘက်နဲ့ သုံးဝမ်းကွမ်းအစ်ကို တော်စပ်ပါတယ်။ မင်းသမီး အဲလိဇဘက် အသက် ၂၁ နှစ်ပြည့်ပြီး မကြာခင်မှာပဲ မင်းသားဖိလစ်နဲ့ စေ့စပ်ကြောင်းလမ်းခဲ့ပါတယ်။ ၁၉၅၂ ခုနှစ် ကြင်ယာတော် မင်းသားဖိလစ်နဲ့အတူ ကင်ညာနိုင်ငံမှာရောက်ရှိနေစဉ် ဖခင်ကြီးဖြစ်တဲ့ ဆဌမမြောက် ဂျော့ဘုရင် ကွယ်လွန်သွားတဲ့အတွက် ရုတ်ချည်းဆိုသလို အသက် ၂၅ နှစ်မှာ အင်္ဂလန်ရဲ့ ဘုရင်မဖြစ်လာခဲ့ပါတယ်။ အဲလိဇဘက်ဟာ ခေတ်သစ်မှာဘုရင်မဖြစ်လာခဲ့တာဖြစ်တဲ့အလျောက် သူမရဲ့ ခမ်းနားလှတဲ့ ထီးနန်းဆက်ခံပွဲကို တယ်လီဗွီးရှင်းကတဆင့် ရိုက်ကူးထုတ်လွှင့်ခဲ့ပြီး အများပြည်သူ ကြည့်ရှုခွင့်ရခဲ့ပါတယ်။ ဒါဟာ ဗြိတိန်ထီးနန်းသမိုင်းမှာ ပထမဆုံးဖြစ်ပါတယ်။ ၁၉၉၀ ပြည့်နှစ်ကာလများမှာတော့ ဘုရင်မကြီး အဲလိဇဘက်ရဲ့ မိသားစုဘဝမှာ ဂယက်ထခဲ့တဲ့ ကာလများလို့ ဆိုရမှာဖြစ်ပါတယ်။ သားသမီး ၃ ယောက် အိမ်ထောင်ရေးပြိုကွဲခဲ့ပါတယ်။ ၁၉၉၇ ခုနှစ်မှာတော့ သားအကြီးဆုံး ချားလ်စ်မင်းသားရဲ့ ဇနီးဟောင်းနဲ့ မြေးနှစ်ယောက်ရဲ့မိခင်ဖြစ်တဲ့ ဝေလမင်းသမီး ဒိုင်ယာနာ ကာမတော်တဆမှုနဲ့ပြင်သစ်မှာ ကွယ်လွန်သွားခဲ့ပါတယ်။ ဒိုင်ယာနာကွယ်လွန်ခြင်းနဲ့ပတ်သက်လို့ အဲလိဇဘက်ဘုရင်မကြီးက အေးတိအေးစက်နိုင်တယ်ဆိုပြီး ဝေဖန်ပြောဆိုမှုတွေရှိခဲ့ပါတယ်။ အဲလိဇဘက်ဘုရင်မဟာ အသက်ငယ်ငယ်နဲ့ ကမ္ဘာမှာ လူသိအများဆုံး အမျိုးသမီးတယောက်ဖြစ်ခဲ့ပါတယ်။ သူမဟာ တော်ဝင်နန်းထိုက် အမှုအကျင့်များနဲ့ တောစရိုက်သဘာဝကို အချိုးကျကျ ပေါင်းစပ်နိုင်သူ၊ ဘဝကို ရိုးရိုးရှင်းရှင်းနေထိုင်ပြီး ရှေးထုံးများကိုလည်း တန်ဖိုးထားတတ်သူလည်းဖြစ်ပါတယ်။ သူမငယ်စဉ်ကတည်းက ပြုခဲ့တဲ့သစ္စာအတိုင်း ကြီးမြတ်ခြင်း၊ ယုံကြည်ခြင်း၊ ချုပ်တည်းခြင်းနဲ့ ဘဝနိဂုံးအထိ ဂုဏ်သိက္ခာနှင့်အညီနေထိုင်ခြင်း စတဲ့ စံတန်ဖိုးများနဲ့အညီ ဘဝကို နေထိုင်ခဲ့သူပဲဖြစ်ပါတယ်။