༄༅། །དཔལ་ལྡན་རྒྱལ་བ་ཇོ་ནང་པའི་ཆོས་འབྱུང་ངོ་སྤྲོད། скачать в хорошем качестве

༄༅། །དཔལ་ལྡན་རྒྱལ་བ་ཇོ་ནང་པའི་ཆོས་འབྱུང་ངོ་སྤྲོད།

༄༅། །དཔལ་ལྡན་རྒྱལ་བ་ཇོ་ནང་པའི་ཆོས་རྒྱུད་ནི། སྒྲུབ་བརྒྱུད་ཤིང་རྟ་བརྒྱད་ཀྱི་ཡ་གྱལ་སྦྱོར་དྲུག་པ་ཞེས་པའི་བརྒྱུད་འཛིན་རྣམས་ལ་ཇོ་ནང་པ་ཞེས་ཡོངས་སུ་གྲགས་པ་ཞིག་ཡིན་ལ། ཕྱི་ལོ་༡༢༩༣ བོད་རབ་བྱུང་ལྔ་བའི་ཆུ་སྦྲུལ་ལོར་ཞང་ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་ནང་དཔལ་གྱི་རི་ཁྲོད་ཆེན་མོ་སྒྲུབ་བརྒྱུད་བསྟན་པའི་གནས་གཞི་རྒྱ་ཆེར་བསྐྱངས། ཇོ་ནང་ཐོག་མའི་བླ་མ་རྣམ་གསུམ་སྟེ་ཞང་ཀུན་སྤངས་ཐུགས་རྗེ་བརྩོན་འགྲུས་དང་བྱང་སེམས་རྒྱལ་བ་ཡེ་ཤེས། མཁས་བཙུན་ཡོན་ཏན་རྒྱ་མཚོ་གསུམ་གྱི་སྐུ་དུས་སུ་དགེ་འདུན་པ་ཁྲི་ལྷག་འདུས་པ་ལོ་རྒྱུས་སུ་གསལ། འཕགས་པ་རྔ་བོ་ཆེའི་མདོ་དང་གཙུག་ཏོར་རྣམ་པར་རྒྱལ་མའི་རྒྱུད་སོགས་ལས་ལུང་གིས་བསྟན་པའི་རྒྱལ་བ་གཉིས་པ་ཀུན་མཁྱེན་དོལ་པོ་སངས་རྒྱས་སམ་དོལ་པོ་པ་ཤེས་རབ་རྒྱལ་མཚན། རང་འདྲའི་ཐུགས་སྲས་བཅུ་བཞི་སོགས་ཀྱི་སྐབས་སུ་ཇོ་ནང་བའི་བསྟན་པ་རྒྱ་ཆེར་དར་ཞིང་རྒྱས་ལ། མདོ་དོན་མཐར་ཐུག་གཞན་སྟོང་དབུ་མ་དང་། རྒྱུད་དོན་མཐར་ཐུག་རྡོ་རྗེའི་རྣལ་འབྱོར་གཉིས་ཀྱི་ལྟ་སྒོམ་རྒྱ་ཆེར་སྤེལ་ཏེ་ཀུན་མཁྱེན་དོལ་པོ་ནི་གནམ་ལ་ཉི་ཟླ་གཉིས་དང་ས་ལ་བུ་དོལ་གཉིས་ཞེས་འཆད་རྩོད་རྩོམ་གསུམ་གྱི་མཁས་པའི་གོ་འཕང་མཐོན་པོར་གཤེགས་པས་རྩ་བའི་གདན་ས་ཇོ་ནང་རི་ཁྲོད་ཆེན་མོ་དབུས་གཙང་ཕྱོགས་ཀྱི་དགེ་འདུན་པའི་སྡེ་ཆེ་ཤོས་སུ་གྱུར།  བོད་གངས་ཅན་པའི་རིག་གནས་སྤྱི་དང་བྱེ་བྲག་ཏུ་དཔལ་རྒྱལ་བ་ཇོ་ནང་པར་མཛད་རྗེས་ཆེ་བའི་སྐྱེས་བུ་ཆེན་པོ་འཇམ་དབྱངས་མིའི་རྣམ་རོལ་བ་རྗེ་བཙུན་ཏཱ་ར་ནཱ་ཐས་གདན་ས་ཆེན་པོ་དཔལ་ངེས་དོན་རྟག་བརྟན་དམ་ཆོས་གླིང་སོགས་ཆོས་སྡེ་མང་པོ་གསར་འདེབས་དང་། ཁོང་གིས་འཆད་རྩོད་རྩོམ་གསུམ་གྱི་བྱ་བའི་ལེགས་རྗེས་ཀྱི་བསྟན་པ་རྒྱ་བསྐྱེད་མཛད་པ་ནས་བཟུང་རྒྱ་བོད་ཧོར་གསུམ་ལ་ཇོ་ནང་པའི་བསྟན་པ་རྒྱ་ཆེར་སྤེལ། བར་ལམ་ཕྱི་ནང་གི་རྐྱེན་དབང་གིས་བོད་སྟོད་སྨད་བར་གསུམ་ལ་ཆག་འཇིག་བྱུང་བ་མཐུན་སྣང་སུ་གྱུར་ནའང་། ད་ལྟའི་བར་དུ་དཔལ་ལྡན་རྒྱལ་བ་ཇོ་ནང་པའི་བསྟན་པ་ནི་རྒྱལ་བ་རྫོགས་པའི་སངས་རྒྱས་ཀྱི་བཀའ་འཁོར་ལོ་ཐ་མའི་དགོངས་པ་གཞན་སྟོང་དབུ་མ་ཆེན་པོའི་ལྟ་གྲུབ་དང་།  གཉིས་མེད་རྒྱུད་ཀྱི་ཡང་རྩེ་དཔལ་མཆོག་དུས་ཀྱི་འཁོར་ལོའི་སྒྲུབ་བརྒྱུད་བསྟན་པའི་ཉམས་ལེན་གཙོ་བོར་འཛིན་པའི་ཆོས་བརྒྱུད་ཅིག་ཡིན། མདོ་ཕྱོགས་ནས་རྒྱལ་ཚབ་བྱམས་པ་མགོན་པོ་དང་། ཐོགས་མེད་སྐུ་མཆེད། ཀླུ་སྒྲུབ་ཡབ་སྲས།  སྔགས་ཕྱོགས་ནས་ཤམྦྷ་ལའི་ཆོས་རྒྱལ་རིམ་བྱོན། འཕགས་ཡུལ་གྱི་དུས་ཞབས་ཆེ་ཆུང་སོགས་དང་། ན་ལེནྜའི་མཁས་པ་སྒོ་དྲུག་དང་། པཎ་ཆེན་ཟླ་བ་མགོན་པོ་སོགས་ལས་བརྒྱུད་དེ་གདམས་ཀྱི་བརྒྱུད་པ་བར་མ་ཆད་པ།  དངོས་གྲུབ་ཀྱི་དྲོད་མ་ཡལ་བ། བྱིན་རླབ་ཀྱི་ཚན་ཁ་མ་ཡལ་བར་བོད་སྟོད་སྨད་བར་གསུམ་དང་རྒྱ་དཀར་ནག་སོག་པོ་སོགས་རྒྱལ་ཁབ་ཕྱི་ནང་ཀུན་ལ་དཔལ་ལྡན་རྒྱལ་བ་ཇོ་ནང་བའི་ཆོས་ཀྱི་འོད་སྣང་དཀར་པོས་འཛམ་གླིང་མཐའ་དབུས་ཀུན་ལ་ཁྱབ་ཏེ་དགོན་སྡེ། ཆོས་ཚོགས། ལྷ་སྡེ། མི་སྡེ་སོགས་ཆར་རྗེས་ཀྱི་ཤ་མོ་བཞིན་དུ་འཕེལ་ཞིང་རྒྱས་བཞིན་པ་ནི་རང་ཅག་རྣམས་ལ་མེ་ཏོག་གང་ལ་ཕོག་པའི་ལྷ་སྐལ་དབང་བསྐུར་རྒྱུད་བཤད་མན་ངག་གནང་པའི་བཀའ་དྲིན་གསུམ་ལྡན་གྱི་རྩ་བའི་བླ་མའི་བར་དུ་བརྒྱུད་པ་བར་མ་ཆད་པར་བྱོན་ཞིང་ངེས་དོན་བསྟན་པའི་སྡེ་འདི་ཉིད་འཛམ་གླིང་ཡུལ་གྲུ་ཀུན་དུ་དར་ཞིང་རྒྱས་བཞིན་པ་ཡོད་འདུག དཔལ་ལྡན་རྒྱལ་བ་ཇོ་ནང་པའི་ཆོས་འབྱུང་དང་ནང་ཆོས་ངོ་སྤྲོད་གནང་མཁན་གྱི་ལོ་རྒྱུས་སྙིང་བསྡུས། རྒྱ་གར་བྱང་ཕྱོགས་ཧི་མ་ཅལ་མངའ་སྡེ་སིམ་ལ་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་གི་མཁན་ཟུར་རིན་པོ་ཆེ་ཀུན་དགའ་འཚམས་ཆུང་མཆོག་ནི། བོད་མདོ་སྨད་རྔ་ཡུལ་དུ་སྐུ་འཁྲུངས་ཤིང་། སྐུ་ན་ཆུང་བའི་དུས་ནས་དཔལ་ལྡན་རྒྱལ་བ་ཇོ་ནང་བའི་གདན་ས་ཆེན་མོ་བསེ་དགོན་ཐུབ་བསྟན་ཕྱོགས་ལས་རྣམ་རྒྱལ་གླིང་དུ་ཆོས་ཞུགས་བྱས་ཏེ་བོད་ཡིག་འབྲི་ཀློག་དང་ཆོ་ག་ཆོས་སྤྱོད་སོགས་ཐུགས་འཛིན་གནང་། རིམ་བཞིན་དཔལ་དུས་ཀྱི་འཁོར་ལོའི་རྣམ་འབྱོར་བ་ཆེན་མོ་རྗེ་ཀུན་དགའ་ཐུགས་རྗེ་དཔལ་གྱི་སྐུ་མདུན་ནས་དཔལ་མཆོག་དུས་ཀྱི་འཁོར་ལོའི་གཙོས་རྒྱལ་བ་ཇོ་ནང་བའི་དབང་ལུང་མན་ངག་གི་གདམས་པ་མང་བོ་གསན་བསམ་གནང་། བླ་མ་དེ་ཉིད་ཀྱི་དྲུང་ནས་དུས་འཁོར་སྦྱོར་དྲུག་ལ་ལོ་གསུམ་རིང་སྒོམ་སྒྲུབ་མཛད།  ཞར་བྱུང་དུ་ཟབ་མོ་གཅོད་ཀྱི་སྐོར་ལའང་ཉམས་ལེན་གནངས།   ཕྱིས་སུ་སྤྱི་ནོར་༸གོང་ས་༸སྐྱབས་ཆེན་པོ་མཆོག་གི་གསེར་ཞལ་མཇལ་བ་དང་དམ་པ་ཁོང་གི་སྐུ་མདུན་ནས་ཇོ་ནང་ཁྲིད་བརྒྱའི་གཙོས་རིས་མེད་ཀྱི་དབང་ལུང་མན་ངག་མང་དུ་ཐོབ་པ་དང་། གདན་ས་ཆེན་མོར་གཞུང་ཆེན་ཁག་ལ་སློབ་སྦྱོང་མཐར་ཕྱིན་ཏེ་དགེ་བཤེས་བཀའ་བཅུ་བའི་མཚན་རྟགས་ཐོབ། དེ་ནས་བལ་ཡུལ་ཇོ་ནང་དགོན་དང་འཕགས་ཡུལ་ཇོ་ནང་མ་དགོན་གཉིས་ཀར་རིམ་གྱིས་རྒྱལ་བ་ཇོ་ནང་བའི་གཞུང་ཆེན་ལྔའི་ཐོག་ལོ་ངོ་ཧྲིལ་བོར་དགུ་རིང་སློབ་ཁྲིད་གནང་། ཕྱི་ལོ་ ༢༠༡༤ ལོར་གྲྭ་མང་གིས་རེ་འདོད་བཞིན་སྤྱི་ནོར་༧ གོང་ས་༸སྐྱབས་མགོན་ཆེན་པོ་མཆོག་གིས་འཕགས་ཡུལ་ཇོ་ནང་མ་དགོན་གྱི་མཁན་རབས་གསུམ་པར་ཕྱག་རྟགས་གནང་སྟེ་དགོན་དེར་མཁན་པོའི་ཁྲི་སྟོན་མཛད་སྒོ་དང་ཕྱག་ལས་ལོ་ལྔ་རིང་ཚུལ་བཞིན་མཛད་པ་ཙམ་དུ་མ་ཟད་རིས་མེད་མཁས་པའི་བགྲོ་གླེང་མང་པོར་གསུང་བཤད་དང་མཉམ་ཞུགས་གནང་བ་དང་། ད་ལྟའི་ཆར་ཇོ་ནང་མ་དགོན་དུ་ཆོས་ཁྲིད་ཀྱི་མཛད་པ་སྐྱོང་བཞིན་པ་ཡོད་འདུག