AIR VB Headlines @ 09.58 am 27.05.2019 скачать в хорошем качестве

AIR VB Headlines @ 09.58 am 27.05.2019

विविध भारती पुणे, ठळक बातम्या......09.58 am 27.05.2019 काँग्रेस पक्षाचे प्रदेशाध्यक्ष अशोक चव्हाण यांनी त्यांच्या पदाचा राजीनामा, पक्षाध्यक्ष राहूल गांधी यांच्याकडे पाठवला आहे. लोकसभा निवडणुकीत राज्यात पक्षाच्या झालेल्या पराभवाची जबाबदारी स्वीकारत चव्हाण यांनी राजीनामा दिला आहे. जपान मधल्या ओसाका इथं येत्या जून महिन्यात जी 20 देशांची परिषद होणार आहे. पंतप्रधान नरेंद्र मोदी परिषदेला उपस्थित राहणार आहेत. पंतप्रधान नरेंद्र मोदी, अमेरिकेचे अध्यक्ष डोनाल्ड ट्रम्प आणि यजमान जपानचे पंतप्रधान शिंझो अॅबे यावेळी त्रिपक्षीय चर्चेत सहभागी होणार आहेत. दक्षिण चीन समुद्रात चीनच्या वाढत्या प्रभावाबद्दल ते चर्चा करतील. सिक्कीमचे मुख्यमंत्री म्हणून सिक्कीम क्रांती मोर्चा पार्टीचे अध्यक्ष प्रेम सिंग गोले आज गंगटोक मध्ये शपथ घेणार आहेत. 32 सदस्यांच्या विधानसभेत सिक्कीम क्रांती मोर्चानं 17 जागांवर विजय मिळवला आहे. राज्य शासनाच्या वतीनं काल वामन भोसले यांना 2019 च्या राज कपूर जीवन गौरव पुरस्कारानं गौरविण्यात आलं. तर ज्येष्ठ अभिनेते परेश रावल यांना राज कपूर विशेष योगदान पुरस्कारानं सन्मानित करण्यात आलं. ज्येष्ठ अभिनेत्री सुषमा शिरोमणी यांना चित्रपती व्ही. शांताराम जीवनगौरव पुरस्कारानं तर सुप्रसिद्ध अभिनेते भरत जाधव यांना व्ही. शांताराम विशेष योगदान पुरस्कारानं सन्मानित करण्यात आलं. राज्यात यंदा मान्सूनच्या आगमनाला उशीर होणार असल्याच्या पार्श्वभूमीवर शेतकऱ्यांनी शेती मशागतीची कामं पूर्ण करावीत मात्र, हवामानाच्या सल्ल्यानुसार शेतीच्या कामाचं नियोजन करण्याचं आवाहन कृषि विभागानं केलं आहे. राज्यात किमान आठ जूनपर्यंत तरी मान्सून-पूर्व पावसाची शक्यता नाही. पंडित जवाहरलाल नेहरू यांच्या स्मृतीदिनानिम्मित आज माजी पंतप्रधान डॉ. मनमोहन सिंह, यूपीए अध्यक्ष सोनिया गांधी आणि कांग्रेस अध्यक्ष राहुल गांधी यांनी दिल्लीत शांतीवनात जाऊन जवाहरलाल नेहरू यांच्या समाधीवर सुमनांजली अर्पण केली. या होत्या आतापर्यंतच्या ठळक बातम्या. या नंतरच्या ठळक बातम्या सकाळी 10 वाजून 58 मिनिटांनी.