NDALA SEKONDARI KINARA KATIKA MATOKEO YA KIDATO CHA PILI NA NNE SHULE ZA SERIKALI MANISPAA SHINYANGA скачать в хорошем качестве

NDALA SEKONDARI KINARA KATIKA MATOKEO YA KIDATO CHA PILI NA NNE SHULE ZA SERIKALI MANISPAA SHINYANGA

Shule ya Sekondari Ndala imeibuka kuwa ya kwanza miongoni mwa shule za serikali katika matokeo ya mitihani ya Kidato cha Pili na Kidato cha Nne kwa mwaka 2025 ndani ya Manispaa ya Shinyanga. Misalaba Media imetembelea na kufanya mazungumzo na Viongozi mbalimbali wa shule hiyo akiwemo Mkuu wa Shule ya Sekondari Ndala Mwalimu Hamisa Magulu, shule iliyojizolea sifa kwa kuongoza miongoni mwa shule za serikali katika matokeo ya mitihani ya Kidato cha Pili na Kidato cha Nne kwa mwaka 2025 ndani ya Manispaa ya Shinyanga. Akizungumza Mkuu wa Shule ya Sekondari Ndala ameeleza kuwa mafanikio hayo yametokana na ushirikiano wa walimu, wanafunzi na wazazi pamoja na uwepo wa mifumo madhubuti ya kitaaluma inayolenga kuongeza uelewa wa wanafunzi kabla ya mitihani ya taifa. Kwa upande wao, baadhi ya wahitimu wa Shule ya Sekondari Ndala wametaja majaribio ya mitihani ya mara kwa mara kuwa ni siri kubwa ya mafanikio yao. Wamesema kuwa majaribio hayo yamewasaidia kuzoea mazingira ya mitihani, kuongeza kujiamini na kubaini mapema maeneo yenye changamoto ili kufanyiwa kazi kwa wakati. Wahitimu hao waliongeza kuwa nidhamu, usimamizi wa karibu wa walimu na ratiba madhubuti za masomo vimechangia kwa kiasi kikubwa kuboresha ufaulu na kuifanya shule hiyo kuwa mfano wa kuigwa kwa shule nyingine za serikali. Kwa mujibu wa uongozi wa shule hiyo, kwa mwaka wa masomo 2026, Shule ya Sekondari Ndala imejipanga kupunguza au kuondoa kabisa daraja la nne, baada ya kufanikiwa kwa muda mrefu kuondoa daraja la sifuri (0) katika matokeo ya mitihani ya taifa, jambo linaloonesha mwelekeo chanya wa maendeleo ya kitaaluma. Uongozi wa shule umeeleza kuwa utaendelea kuimarisha mbinu za ufundishaji, kuongeza majaribio ya mara kwa mara na kuhimiza nidhamu ili kuhakikisha lengo la kufuta daraja la nne linafikiwa, na hatimaye kuinua zaidi kiwango cha elimu katika Manispaa ya Shinyanga na Mkoa wa Shinyanga.