Маңғыстаудағы Құрық ауылында футбол сыныбы құрылды скачать в хорошем качестве

Маңғыстаудағы Құрық ауылында футбол сыныбы құрылды

Маңғыстау облысындағы Құрық ауылында доп тебуге құмар балалар үшін арнайы сынып ашылған. Жас футболшылар сыныбында тек ер балалар оқиды. Тәжірибе ретінде құрылған жоба аз уақыттың ішінде жемісін берді. Жас спортшылар түрлі жарыста топ жарып, былтыр ел чемпионы атанды. Ауыл балаларын 71 жастағы ардагер спортшы жаттықтырып жүр. Айта кету керек, мұндай футбол сыныбы аймақта алғаш рет ашылып отыр. Футболмен кәсіби түрде айналыса бастаған оқушылар үшін арнайы күн тәртібі бекітілген. Бір сағаттық таңғы жаттығудан кейін мектеп бағдарламасына сай білім алады. Түстен кейін жаттығу жұмыстары қайта жалғасады. Жас спортшылар екі мезгіл тегін тамақтанады. Қуатты, дәрумені мол тағамдар беріледі. Балалар: «Месси, Роналду, Зидан сияқты әлемге әйгілі футболшылардың ізін қусам», - дейді. Ал 14 жастағы Абзалдың мақсаты мүлдем басқа. Абзал Серіков, футбол сыныбының оқушысы -Осы ауылда тренер болсам деймін. Осы ауылда футболды дамытып, ұстаз болған кезде құрттай шәкірттерді жарысқа апарсам деймін. Біздің Әнуар ағайымыз бізді қандай биікке көтеріп жүр, мен де сол сияқты ұстаз болған кезде оқушыларымды, шәкірттерімді сондай биіктерге көтергім келеді. Екі жыл бұрын құрылған футболшылар сыныбында 14 жастағы 14 ер бала білім алуда. Аз уақыттың ішінде олар биік белестерді бағындырып үлгерді. Халықаралық жарыстарда бірнеше мәрте топ жарды. Ал былтыр мектеп оқушылары арасында шағын футболдан ел чемпионы атанды. Ауыл балаларының толағай табысқа жетуіне 71 жастағы ардагер жаттықтырушы Әнуар Алабердов барын салып жүр. Қарашай-Черкес Республикасына еңбегі сіңген жаттықтырушы Маңғыстауға арнайы шақырту бойынша келген болатын. Әнуар Алабердов, Қарашай-Черкес республикасының еңбек сіңірген жаттықтырушысы -Футбол сыныбында оқу тек доп теуіп жүру деген сөз емес. Біз балалардың білім алуына, тәртібіне ерекше мән береміз. Егер оқуға үлгере алмай жатса я болмаса тәртіп бұзса, ондай оқушылар үлкен жарыстардан шеттетіледі. Сондықтан да балалар жақсы оқуға тырысады. Сыныпта озат оқушылар көп. Ардагер спортшы балалардың болашағына зор үмітпен қарайды. Ол ауыл балаларынан жоғары лигада өнер көрсететін білікті футболшылардың шығарына сенімді. Жаңа оқу жылын аяқтаған жас спортшыларды жазда бірқатар жарыстар күтіп тұр. Маусым айында Астанада өтетін республикалық сайыста облыс намысын қорғамақ. Авторлары: Гүлмира Әбішева, Саламат Бекбаев