တရုတ်ကြီး - ရှေ့တန်းစစ်မြေပြင်က သက်စွန့်ဆံဖျားကယ်ဆယ်ရေးသမား скачать в хорошем качестве

တရုတ်ကြီး - ရှေ့တန်းစစ်မြေပြင်က သက်စွန့်ဆံဖျားကယ်ဆယ်ရေးသမား

တရုတ်ကြီး - ရှေ့တန်းစစ်မြေပြင်က သက်စွန့်ဆံဖျားကယ်ဆယ်ရေးသမား —----------- ရှေ့တန်းစစ်မြေပြင်က ဒဏ်ရာရ တော်လှန်ရေးတပ်ဖွဲ့ဝင်တွေရဲ့အသက်ကို သက်စွန့်ဆံဖျား ကယ်ဆယ်ပေးနေတဲ့သူ့ကို ကရင်နီဒေသမှာ ‘တရုတ်ကြီး' လို့ လူသိများပါတယ်။  သူတို့အလုပ်က ကိုယ်တိုင်စစ်မတိုက်ရပေမယ့် လက်နက်ကိုင်တိုက်ပွဲဝင်ရဲဘော်တွေလိုပဲ အသက်အန္တရာယ်ကြားမှာ စွန့်စားရတာပါ။ ဒဏ်ရာရထားတဲ့ တပ်ဖွဲ့ဝင်တွေကို ကျည်ဆံတွေ၊ ဗုံးတွေကြားက ဆွဲထုတ်ပြီး အရေးပေါ်ကယ်ဆယ်၊ ကုသပေးရတာ ဖြစ်ပါတယ်။  ကူညီကယ်ဆယ်ရေးလုပ်ရင်း ဗုံးဆံ၊ အမြောက်ဒဏ်ထိလို့  သေဆုံးသွားတဲ့ ရှေ့တန်းဆေးတပ်သားတွေလည်း အများအပြား ရှိပါတယ်။  ဒီလိုစွန့်လွတ်စွန့်စားရတဲ့ ရှေ့တန်းစစ်မြေပြင်က ဆေးတပ်သားတွေထဲမှာ ခြောက်ပေကျော်မြင့်တဲ့ အရပ် ထောင်ထောင်မောင်းမောင်းနဲ့ ကိုအောင်ဇေယျလည်း ပါဝင်ပါတယ်။  အသက် ၂၉နှစ်အရွယ် ကိုအောင်ဇေယျဟာ  ကချင်-ရှမ်း-တရုတ်နွယ်ဖွား ဖြစ်လို့ ကရင်နီတော်လှန်ရေးတပ်ဖွဲ့ဝင်အများစုက သူ့ကို ‘တရုတ်ကြီး' လို့ပဲ ခေါ်ကြတာပါ။ သူဟာ နိုင်ငံအရှေ့ပိုင်း ကရင်နီဒေသက ဖရီးဘားမားရိန်းဂျား(Free Burma Ranger) တပ်ဖွဲ့ရဲ့ ဒုတိယခေါင်းဆောင် ဖြစ်ပါတယ်။  တရုတ်-မြန်မာနယ်စပ် ရွှေလီမြို့မှာ မွေးဖွားပြီး၊ မန္တလေးမြို့မှာ ကြီးပြင်းခဲ့တဲ့ ကိုအောင်ဇေယျဟာလည်း စစ်အာဏာသိမ်းမှုကိုဆန့်ကျင်တဲ့ မြန်မာနိုင်ငံက များစွာသော ပြည်သူတွေထဲက ခေတ်ပညာတတ် လူငယ်တစ်ယောက် ဖြစ်ပါတယ်။  ပရဟိတစိတ်ရှိတဲ့ ကိုအောင်ဇေယျဟာ တိုက်ခိုက်ရေးမဟုတ်ဘဲ ကူညီကယ်ဆယ်ရေး လုပ်ချင်တာကြောင့် ဖရီးဘားမားရိန်းဂျားမှာ သင်တန်းတက်ခဲ့ပါတယ်။ ၂၀၂၂ခုနှစ် နှစ်ကုန်ပိုင်းမှာတော့ သူဟာ ရိန်းဂျားတပ်ဖွဲ့ဝင်တစ်ယောက် ဖြစ်လာပါတယ်။  စစ်မြေပြင် ဆေးဘက်ဆိုင်ရာတပ်သားတွေကို မွေးထုတ်ပေးနေတဲ့ ဖရီးဘားမားရိန်းဂျားရဲ့ လေ့ကျင့်ရေးသင်တန်းကာလဟာ သုံးလကနေ ခြောက်လအထိကြာပြီး၊ ပြင်းထန် ခက်ခဲကြမ်းတမ်းတဲ့ လေ့ကျင့်မှုတွေကြောင့် နာမည်ကျော်ပါတယ်။  ကရင်နီပြည်နယ်မှာ တော်လှန်ရေးရဲဘော်တွေရဲ့ အသက်ပေါင်းများစွာကို ကယ်တင်ခဲ့တဲ့ ကိုအောင်ဇေယျဟာ တိုက်ပွဲတွေမရှိတော့တဲ့တစ်နေ့မှာတော့ သစ်ပင်စိုက်ပြီး မိသားစုဘဝကို အေးအေးချမ်းချမ်း ဖြတ်သန်းချင်တယ်လို့ သူ့ရဲ့အနာဂတ်အိပ်မက်ကို ဖွင့်ပြောပါတယ်။  လက်ရှိမှာတော့ မြန်မာနဲ့ ကမ္ဘာတစ်လွားက ဖိနှိပ်ခံပြည်သူတွေကို ကူညီဖို့အတွက် တိုက်ပွဲတွေရှိတဲ့နေရာမှာနေပြီး လူ့အသက်တွေကို ကယ်တင်နေဦးမယ်လို့ ကိုအောင်ဇေယျ ခေါ် တရုတ်ကြီးက ပြောလိုက်ပါတယ်။  မြတ်ကြီး/ Myanmar Now