兩年執5000間！愈賣愈蝕！滷味一哥絕味單季狂蝕5億，變蝕錢王！自救變自爆，昔日靠地鐵口插旗稱霸，今日日均執7間鋪，市值蒸發88%！下一波倒閉潮更猛！ скачать в хорошем качестве

兩年執5000間！愈賣愈蝕！滷味一哥絕味單季狂蝕5億，變蝕錢王！自救變自爆，昔日靠地鐵口插旗稱霸，今日日均執7間鋪，市值蒸發88%！下一波倒閉潮更猛！

2年執笠5000間鋪！曾經一年賺10億,爽到震，今季一鋪蝕4個億！ 滷味一哥，唔掂當羅，甘你對上一次幫襯系幾時？講起幾年前呢，絕味仲系滷味界嘅「流量天王」，高峰期成萬6間門市，將周黑鴨、煌上煌夾埋都食塵，一年進賬超過70億。 「煲劇要啪鴨頸、捱夜要隊鴨頸」簡直系後生仔女嘅生活寫照，但系今時今日再睇呢位「鴨王」，早就風光不再。前排絕味出咗舊年嘅業績預告，預期全年營業額大約53億到55億之間，按年插水12%到15%，聽落好似仲頂得順？轉頭睇下盤數啦，預估勁蝕1.6億到2.2億！仲要咁樣對比先夠皮，睇返絕味出嘅前三季報，其實頭三季系有錢賺㗎，收入42.6億，淨袋2.8億。點知計計下全年數，竟然倒蝕！即系點？即系話絕味喺舊年第四季，短短三個月內，就勁蝕咗4.4億到5億！同期，門市執笠潮仲要殺到埋身。根據數據監測，截至今年1月，絕味仲營業緊嘅門市得返10713間，比起2023年呢，足足冇咗5200幾間鋪，平均每日執笠嘅數量接近7間！ 咁問題嚟啦，絕味鴨頸當年到底點樣發圍？點解而家畀消費者嫌三嫌四呢？成個滷味市場發生緊咩變化呢？佢嘅老細叫戴文軍，60後，湖北武漢人。一直做生意踩過唔少界，譬如喺商場賣衫、拜師搞足療班、做百貨批發、之後撈過保健品，再落湖南株洲嘅藥廠做市場部經理，經驗豐富到爆。當時周黑鴨喺武漢已經紅到發紫，戴文軍每次返武漢老家，班同事實牙實齒叫佢幫手買武漢鴨頸返去食。食食下，戴文軍就開始眼眨眨，心諗武漢鴨頸咁把炮，但系竟然冇一個全國性嘅連鎖品牌，呢鋪仲唔系機會？話做就做，戴文軍二話不說劈炮唔撈。不過作為一個門外漢，食滷味佢就系專家，但整滷味就一竅不通，戴文軍就咁樣一啖一啖儲技能。 2005年4月，戴文軍覺得系時候，於是同幾個friend夾份，喺長沙開咗自己第一間滷味店。揀喺長沙創業呢，可以避開喺武漢同周黑鴨直接開拖，主力都系賣鴨頸，口味系香辣鮮麻，鋪頭名就叫「絕味」，簡單直接，味道絕到核爆。為咗速速打響名堂，戴文軍用儘自己嘅營銷諗頭，叫員工捧住盤喺門口、街邊請人免費試食，仲喺長沙銷量最勁嘅報紙落廣告，話憑報紙可以扣10蚊，派傳單、派優惠券、免費試食咁多條橋一齊出，加上出品又唔差，絕味好快喺長沙彈起。到2005年尾，絕味竟然已經開到61間門市，但呢個仲未系戴文軍嘅瓶頸，佢一開始就諗住做大買賣，要做全國性嘅連鎖巨無霸，周圍開鋪。於是繼續開行Turbo，一方面狂sell廣告谷知名度，巴士、lift到電視都睇到佢嘅廣告。同時呢，統一曬配方、滷製工序，用中央工場生產，凍鏈送到鋪頭等等。呢種標準化對消費者嚟講都好緊要，每間鋪嘅絕味都系同一個味，保證你唔會中伏。去到2007年，絕味就開放加盟，為之後全國大規模複製鋪路。 絕味揀鋪嘅策略都系直接到痹，邊度多人，我就要插旗。地鐵站口，商場出入口，學校周邊，屋苑門口，寫字樓地鋪。當你每日返工放工買餸、行街，成日都會行過一間絕味，睇耐咗就忍唔住科水。可能唔系因為肚餓，只系因為「太順手」！隨住標準化同加盟模式推進，絕味開鋪速度系一日千里。據統計呢，由2007年到2011年，平均每年開多700幾間鋪。到2011年尾，絕味已經有3700間門市。2017年成功喺上交所上市，市值最高試過超過600億。2023年全國門市數量一度衝到差唔多1.6萬間，幾乎霸占曬全國嘅商業街。諗住佢會繼續威落去，點知絕味開始玩跳樓機，愈插愈深。之後呢兩年，絕味總共執咗5237間門市，即系話三分一嘅鋪頭都消失咗，市值由高峰期635億，碌到而家得返75億左右，蒸發咗88%。鴨頸唔再香，生意開始蝕，預計舊年勁蝕1.6億到2.2億。點解當年紅到發紫嘅絕味會突然死火呢？主要有三大死因。 第一個最直接啦，貴到冇朋友。消費者個個嗌食唔起，而家嘅絕味已經貴到令人懷疑人生。一份鴨頸23.8蚊，得190克，計返成63蚊斤，仲貴過新鮮牛肉！如果系再刁鑽啲嘅部位，價錢仲甘。鴨脷20.35蚊80克，計返220蚊斤，就算系齋菜都唔平，蓮藕差唔多10蚊一份，得150克，即系33蚊斤。行一轉絕味，是但揀幾款滷味，成百蚊隨時冇咗。有人就笑住話呢：而家食絕味已經好似食緊奢侈品。之前有調查做過，訪問咗2296人，結果顯示超過八成嘅人去連鎖滷味店嘅次數都少咗。主要原因得一個字：貴。差唔多87%都系畀加價嚇走。除咗標價貴，仲有啲乞人憎嘅陰濕套路。例如有啲店員呢 秤嘢嗰陣會特登秤多，你話要20蚊，佢就幫你秤到30幾，仲要話之你話多咗少少。大家有冇遇過呢啲情況呢？都可以分享下。以前經濟好景，大家使錢大手大腳，畀人坤都算數。而家潮流系應使得使，唔做大冤種，消費者自然會用腳投票啦。 第二大死因系選擇多到爆，同質化競爭激烈到核爆。絕味嘅崛起其實食正時代紅利。喺2015到2020年，短視頻平台大爆發，好多後生仔夜晚宅喺屋企喪碌手機。碌碌下，叫外賣食啲即食零食嘅需求急增，鴨頸呢啲重口味、唔使翻熱就食得嘅小食，簡直系絕配。但系而家成個滷味市場已經系血流成河，嗰邊有盛香亭、點鹵湯、熱鹵時光等滷味新勢力，主打新鮮熱鹵，價錢仲要更平。另一邊有百草味、良品鋪子呢啲都爭住做滷味零食，仲有開到成行成市嘅零食店全部搶緊生意。數據顯示前年中國滷味品類市場規模大約1573億，增速卻得返3.7%。即系點呢？個餅根本就冇大到，但系分餅嘅人就多咗一大班。而且滷製品嘅門檻其實唔高，短視頻平台大把教學片，邊間滷味用乜配方、幾大火候都搵到對應教學。就算你唔能夠百分百還原個味道，但詳細程度可以去到七八成，成本卻系品牌嘅一半都唔使。所以好多人其實會揀自己郁手整滷味。 最後呢，絕味嘅沒落仲離唔開食物安全問題嘅致命打擊。喺投訴平台度，絕味有1700幾條投訴，大部份都同衛生有關，例如話有人食完屙到七彩、食到有頭髮、食到食物變味等等。本身就賣得貴啦，食完分分鐘仲要屙到傻，呢啲邊個頂得順？面對營業額萎縮、門市執笠、口碑插水嘅慘烈局面，絕味唔通冇諗過自救咩？梗系有啦！舊年尾絕味就出咗個低價走量嘅熱鹵杯，4.9蚊碗鹵粉，有米粉、腐竹、海帶結、魚豆腐呢啲配料。呢款熱鹵杯喺抖音都幾爆嚇，累積銷量突破80萬份。同時部分門市仲推出11.9蚊買三杯原液奶茶嘅優惠券，或者加3.9蚊換購奶茶一杯嘅活動等等。邏輯都好清晰，想用高頻低價將人先引入鋪，但問題系呢啲產品嘅毛利率根本唔高。喺租貴、人工貴呢啲固定成本咁高嘅情況下呢，如果人流冇明顯放大，反而可能會愈賣愈蝕。除咗主業死頂，絕味其實仲走去搞下啲副業，跟風投資餐飲品牌，好似有幸福西餅、撈麵、等等。結果一輪炒作猛如虎，睇返戰績輸到開巷。2022年到前年三年累計蝕超過3.7億。呢盤投資成績單呢，真系綠到發光。 其實將視線放大呢，會發現絕味嘅衰落，系成個中國滷味市場大洗牌嘅縮影。前年就跌到3.7%，到舊年就更加慘，預計唔到3%。滷味行業已經由高速增長轉向存量競爭。未來唔系做大個餅，而系要搶人哋個餅。喺高度同質化內卷嘅市場環境入面，滷味三巨頭齊齊執笠。絕味喺兩年冇咗5200幾間，而周黑鴨喺一年時間門市都少咗592間，煌上煌仲唔樂觀，一年時間少咗1100幾間門市。根據相關數據，截至前年全國滷味門市大概26萬間，而過去一年淨執笠嘅大約系2.3萬間。呢啲數字話畀你知乜嘢？唔系一間公司突然死火，而系一個時代玩完。舊時嗰套高密度開鋪加埋重口味刺激加標準化複製嘅萬能key，已經失靈。而家系斗邊個更識消費者，邊個更健康，邊個更有性價比。至於絕味仲有冇得翻身呢，我哋就放長雙眼睇下啦。