រដ្ឋបាលខេត្តសៀមរាប ផ្សព្វផ្សាយពីឱកាសសម្រាប់មន្ត្រីរាជការ និងសិស្សនិស្សិត скачать в хорошем качестве

រដ្ឋបាលខេត្តសៀមរាប ផ្សព្វផ្សាយពីឱកាសសម្រាប់មន្ត្រីរាជការ និងសិស្សនិស្សិត

រដ្ឋបាលខេត្តសៀមរាប ផ្សព្វផ្សាយពីឱកាសសម្រាប់មន្ត្រីរាជការ និងសិស្សនិស្សិត ក្នុងការទទួលបានអាហារូបករណ៍សិក្សានៅប្រទេសអូស្ត្រាលី នៅថ្ងៃទី៣ ខែមីនា ឆ្នាំ២០២៦នេះ រដ្ឋបាលខេត្តសៀមរាប សហការជាមួយកម្មវិធីអាហារូបករណ៍អូស្ត្រាលី នៃស្ថានទូតអូស្ត្រាលីប្រចាំកម្ពុជា បានរៀបចំសិក្ខាសាលាផ្សព្វផ្សាយ ចែករំលែកព័ត៌មាន និងបែបបទនានា ស្តីពីអាហារូបករណ៍សិក្សាភាសាអង់គ្លេស និងអាហារូបករណ៍ថ្នាក់ក្រោយឧត្តមសិក្សានៅប្រទេសអូស្ត្រាលី (Australia Awards) ដើម្បីបង្ហាញពីលក្ខខណ្ឌ និងនីតិវិធីនៃការដាក់ពាក្យស្នើសុំអាហារូបករណ៍ថ្នាក់បណ្ឌិត និងអនុបណ្ឌិត សម្រាប់មន្ត្រីរាជការ សិស្សនិស្សិត និងសាធារណជនក្នុងខេត្តសៀមរាប។ លោក ពុំ ពិសិដ្ឋ តំណាងក្រុមការងារកម្មវិធី Australia Awards ប្រចាំប្រទេសកម្ពុជា បានឱ្យដឹងថា គិតពីឆ្នាំ១៩៩៥ មកដល់បច្ចុប្បន្ន Australia Awards បានផ្ដល់អាហារូបករណ៍ដល់ប្រជាពលរដ្ឋកម្ពុជា ទៅសិក្សាបន្តនៅប្រទេសអូស្ត្រាលីប្រមាណជាង ១ ០០០នាក់ ដោយពួកគេបានទៅសិក្សានៅសាកលវិទ្យាល័យធំៗលំដាប់ពិភពលោក និងពេលត្រឡប់មកកម្ពុជាវិញបានយកចំណេះដឹង ជំនាញ និងបទពិសោធន៍ ជួយអភិវឌ្ឍន៍ដល់វិស័យសង្គម និងវិស័យសេដ្ឋកិច្ចកម្ពុជា ឱ្យកាន់តែមានការរីកចម្រើន។ លោកបន្តថា អាហារូបករណ៍អូស្ត្រាលីបើកទទួលបេក្ខជនមកពី គ្រប់វិស័យទូទាំងប្រទេសកម្ពុជា រួមមាន វិស័យ រដ្ឋបាលសាធារណៈ វិស័យអប់រំ និងស្រាវជ្រាវ អង្គការសង្គមស៊ីវិល ប្រព័ន្ធផ្សព្វផ្សាយ និងវិស័យ ឯកជន។ចំពោះកម្មវិធីអាហារូបករណ៍សម្រាប់ឆ្នាំ២០២៧ ផ្ដល់ឱកាសចំនួន៥៥កន្លែង ដល់បេក្ខជន ដោយបើកទទួលពាក្យចាប់ពីថ្ងៃទី១ ខែកុម្ភៈ និងបិទបញ្ចប់ការទទួលពាក្យថ្ងៃទី៣០ ខែមេសា ឆ្នាំ២០២៦។ លោក ស្រី ម៉ននី រង្សី អភិបាលរងខេត្តសៀមរាប មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ឆន្ទៈយ៉ាងមោះមុត ដោយបានដាក់ចេញនូវកម្មវិធីនយោបាយរបស់រាជរដ្ឋាភិបាល នីតិកាលទី៧ សម្រាប់ការកសាង និងការពារមាតុភូមិ ឆ្នាំ២០២៣-២០២៨ និងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដែលក្នុងនោះ បញ្ចកោណទី១ ផ្តោតសំខាន់លើការអភិវឌ្ឍមូលធនមនុស្ស ដែលជាលក្ខខណ្ឌចាំបាច់មិនអាចខ្វះបាន សម្រាប់ជំរុញពិពិធកម្ម និងកំណើនសេដ្ឋកិច្ច ប្រកបដោយបរិយាបន្ន និងភាពធន់។ លោកស្រី ម៉ននី រង្សី បានបញ្ជាក់ថា កម្មវិធីនេះ គឺជាការចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការកសាងធនធានមនុស្សដែលមានគុណភាពសម្រាប់ប្រទេសកម្ពុជាយើង។ ដូច្នេះមន្ត្រីរាជការ និងនិស្សិតដែលទទួលបានអាហារូបករណ៍នេះ នឹងក្លាយជាកម្លាំងចលករយ៉ាងសំខាន់ក្នុងការនាំយកចំណេះដឹង និងបច្ចេកវិទ្យាថ្មីៗពីប្រទេសអូស្ត្រាលី ដើម្បីមកអភិវឌ្ឍសេដ្ឋកិច្ច-សង្គមកម្ពុជា ស្របតាមចក្ខុវិស័យឆ្នាំ២០៣០ និងឆ្នាំ២០៥០។ តាមរយៈសិក្ខាសាលានេះ មន្ត្រីរាជការ និងសិស្សនិស្សិតទាំងអស់ នឹងអាចយល់កាន់តែច្បាស់ពីនីតិវិធីនៃការដាក់ពាក្យ និងត្រៀមខ្លួនបានល្អប្រសើរ ដើម្បីដណ្តើមយកឱកាសសិក្សានៅក្រៅប្រទេស ដែលជាផ្នែកមួយនៃការធ្វើទំនើបកម្មរដ្ឋបាលសាធារណៈនៅកម្ពុជា។ ជាពិសេសការទទួលបានព័ត៌មានលម្អិតអំពីវគ្គបណ្តុះបណ្តាលភាសាអង់គ្លេសដែលជាផ្នែកមួយនៃកម្មវិធីអាហារូបករណ៍។ លោកស្រីបន្តថា តាមរយៈអាហារូបករណ៍នេះដែរ មន្ត្រីរាជការ និងសិស្សនិស្សិត ក៏នឹងទទួលបានការអប់រំពីសកលវិទ្យាល័យលំដាប់ពិភពលោកនៅប្រទេសអូស្ត្រាលី ដែលមានស្តង់ដារខ្ពស់, បង្កើតទំនាក់ទំនងជាមួយបញ្ញវន្ត និងអ្នកដឹកនាំវ័យក្មេងមកពីជុំវិញពិភពលោក ដែលជាទុនដ៏មានតម្លៃសម្រាប់អាជីពការងារ ជាពិសេសការបង្កើនសមត្ថភាពប្រើប្រាស់ភាសាអង់គ្លេសកម្រិតខ្ពស់ និងការរៀនសូត្រពីវប្បធម៌ការងារបែបទំនើប ហើយមន្ត្រីដែលត្រឡប់មកវិញនឹងនាំយករបៀបធ្វើការថ្មី និងបច្ចេកវិទ្យាឌីជីថលមកអនុវត្តក្នុងអង្គភាព៕ អត្ថបទ និងរូបភាព៖ លោក ធន់ ពូថេ កែសម្រួល៖ លោក អ៊ុន ណារាជ្យ