ප්‍රදීපාගාරය I Episode 21 I ඉවාන් බූනින් I Ivan Bunin I Иван Бунин скачать в хорошем качестве

ප්‍රදීපාගාරය I Episode 21 I ඉවාන් බූනින් I Ivan Bunin I Иван Бунин

1953 නොවැම්බර් මාසේ 8දා - ප්‍රංශයේ පැරිස් නුවර දුප්පත් කුඩා නිවසක වයෝවෘද්ධ මිනිසෙක් අවසන් හුස්ම හෙලනවා. මිය යන විට ඔහුගේ සාක්කුවේ තියෙන්නේ ෆ්‍රෑන්ක් කිහිපයක් විතරයි. ඔහුගේ මිතුරන් මුදල් එකතු කරනවා, ඔහුගේ අවසන් කටයුතු කරන්න. මේ තැනැත්තා තමයි සාහිත්‍ය සඳහා නෝබෙල් ත්‍යාගයෙන් පිදුම් ලැබූ පලමුවෙනි රුසියානු රචකයා. ඔහුගේ නම - ඉවාන් බූනින්. ඉවාන් අලෙක්සියේයිවිච් බූනින්. 20 සියවසේ අද්විතීය රුසියානු සාහිත්‍යකරුවෙක් හැටියට අමරණීය වන ඔහු මිය යන විට එදා වේල සපුරා ගන්නවත් මුදලක් අතේ නොතිබුනු බව කියවෙනවා. ඉතින් අද අපි කතා කරන්නේ මේ අද්වීතීය රුසියානු ලේඛකයා ගැනයි. ප්‍රේමයේ අමන්දානන්දය මිනිස් වචන වලට පෙරලීමට සමත් ආකාරයේ භාෂාවක් - කාව්‍යමය භාෂාවක් නිපදවූ ලේඛකයෙක් හැටියට බූනින් වන්දනයට පාත්‍ර වෙනවා. ඔහු තරම් රසවත් අන්දමට, හද සලිත වන ආකාරයට ආදරය ගැන, ප්‍රේමය ගැන ලියූ ලේඛකයෙක් තවත් නැති තරම්. ඔහුගේ ජීවිතයත් - ප්‍රේමයෙන් ආදරයෙන් හා ශෘංගාරයෙන් පිරී ඉතිරී ගොස් තිබුනා. ඒ නිසාම වෙන්න ඇති - ඔහුට මේ විදියට ප්‍රේමය සජ්ජායනය කල හැකිවූයේ. ඔහු කතා ලියූ කෙනෙක් නොවෙයි. ඔහු ලියූවේ - ජීවිතය. ඔහු ජීවිතය සිත්තම් කල සිත්තම්කරුවෙක්. සම්ප්‍රදායන් ගේ වැටකොටු අතර හිර වී සිටින්න අසමත් වූ ඔහු - අසම්මත ජීවිතයක් ගත කල කෙනෙක්. ඔහු මිය යන්නේ දිලිඳු මිනිහෙක් හැටියට. ඇත්තෙන්ම ඔහුගේ ජීවිතයේ පටන් ගැන්මෙත් - ලොකු වෙනසක් නැහැ. ඔහු උපදින්නේ බංකොලොත් වෙච්ච වංශවත් පවුලක. 1870 නොවැම්බර් 22දා රුසියාවේ දකුණු දිග් භාගයේ වරෝනිෂ් නුවර තමයි ඔහු උපත ලබන්නේ. ඔහුගේ පියා අලෙක්සියේයි නිකොලාය්විච් බූනින්. මව Людмила Александровна. මේ දෙමාපියන් තමාගේ පුතාව නම් කරනවා - ඉවාන් කියල. ඉවාන් බූනින්. දෙමාපියන්ගේ දෙපාර්ෂවයම රුසියාවේ වංශවත් පවුල්. පැරණි - කුලවත් ධනවත් පෙලපත් වලින් එන අය. පරම්පරාවෙන් පරම්පරාවට රුසියානු රාජ්‍යයේ ඉහල තනතුරු දරපු අය. නමුත් මේ සියල්ලම අතීතය. ඉවාන්ගේ පියා- රුසියානු පරිපාලන සේවය රැකියාවක් කරපු - ගෞරවනීය මිනිසෙක්. නමුත් අවාසනාවකට වගේ ඔහු බීමත්කමට හා සූදුවට ඇබ්බැහි වෙනවා. ඉවාන් උපදින කොට පවුල සම්පූර්ණයෙන්ම බංකොලොත් වෙලා. පදිංචි වෙලා ඉන්නේ කුලී ගෙදරක. ඉතින් දරුවන් හය දෙනෙක් ඉන්න පවුලේ තුන් වෙනිය තමයි -ඉවාන්. ඉවාන් බූනින් උපන් රුසියානු ගම්මානය ගැන නොකියාම බැහැ. මේක රුසියාවේ දකුණු භාගයේ - නගරයෙන් ඈත පිහිටි සුන්දර ගම්මානයක්. බිරියෝසා ගස් වලින් වටවුනු -ඉංග්‍රීසියෙන් කියනවා නම් බර්ච් ගස් වලින් වටවුනු, ඔවුන්ගේ කුඩා නිවස පිහිටා තිබෙන්නේ ඈතට විහිදෙන ස්ටෙප්ස් තණ බිම් - රුසියන් වනාන්තර මැද. ඒ සුන්දර ගම - ඒ ගමේ වැසියන්ගේ ජීවිත - ඔවුන් කතා කරන බස - පුංචි ඉවාන්ගේ ජීවිතයේ පතුලටම කිඳාබහිනවා. ලෝකයේ කොයි ඉසව්වක හිටියත් - ඉවාන් බූනින් ජීවිත කාලය පුරා සිහිනෙන් දකින්නේ තමා උපන් මේ ගම්මානය. ඔහුගේ සාහිත්‍ය තුලින් සිත්තම් කරන්නේ ඒ ජීවිතය.