【 скачать в хорошем качестве

【

今日立法會財會傾優化「交通意外傷亡援助計劃」，包括將會合併「受傷補助」同「臨時生活補助」、要有最少7日病假等等。係6月9日嘅福利panel，我就已經話呢個計劃嘅起訴率低到暈，4個年度有698宗懷疑個案，警方拘捕339個，但起訴得嗰6個。當時我問政府有咩計仔，勞福局副局就話減低誘因最重要，所以而家就優化計劃，俾我嘅印象即係除咗減低誘因，其他全部都係倔頭路。 睇返今日文件第13段講防止詐騙，政府就寫多咗啲具體措施，例如要求警方書面確認有冇涉及交通意外、會同醫管局、衞生署核實醫療評估資料等等，睇落好似回應咗我嘅建議，但嗰寫法係「社署會(繼續)加強防止騙取援助的工作…」。如果啲具體措施係改革創新、嶄新諗法，並非繼續加強、做返舊嘅嘢，我就好有信心可以減低到詐騙，而嗰起訴率都會起，咁支持就好容易。但我睇落又見唔到政府出咗啲咩新招，究竟政府會做啲乜去提高嗰起訴率呢？ 🗣️ 副局就話基金嘅門檻極低，只要認定有交通意外，申請者交齊文件就可以拎到，假醫生紙仲可以告虛假文書，但自制意外嗰啲就有啲難判斷。所以佢哋係想透過減低拎到嘅錢去減低誘因，當風險同收入不成比例，咁自然會少咗濫用，不過佢哋都會繼續加強抽查。 👉🏻 其實我係好支持呢個援助計劃，真係可以惠及到好多有需要嘅人。今次政府嚟立法會傾優化，嗰目的就係想減少濫用。無可否認，減低誘因係有用，但無論減到幾多，點都會有人貪。所以最有用嘅方法，就係要有一個高嘅起訴率；一但低，啲人根本唔會驚，因為反正好難先捉得到、入到罪，自然會繼續做。就好似2蚊搭車咁，本身係一個德政，但係有好多害群之馬濫用，搞到坊間有好多聲音。我哋圓桌除咗建議由2蚊變2折，都一直要求提升罰則去增加阻嚇性。而係交通意外傷亡援助呢單case，就係要用高嘅起訴率去阻嚇，但可惜今次我就唔覺政府有提出一啲好創新嘅具體措施喇~ 呢次優化之後，我相信政府半年至一年後會再嚟報告，到時如果濫用情況冇改善，點都要再出招堵塞漏洞！