DAVID AK GAWN скачать в хорошем качестве

DAVID AK GAWN

Saritu, udah dua bulan Niang David Anak Gawn ninggalka kitai. Kami ari Grateful Memorial Park meri besai penyinu ati ngagai sida sebilik ti udah lenyau niang. Dalam tempoh tuk, kami meri ruang ngagai sida sebilik nerima sereta ikhlas enggau pemidang niang David, ngambika maya sida meda video tu, taja nelihka ati, tang ulih ngubat pengerindu nuju iya ti udah nadai. David ada kena 10 Disember 1989 di Belawai. Cherita David berengkah enggau pengeliat ati. Uji kitai ngenang, maya umur iya enam taun, lebuh dunya nembiak bukai agi bechura, David lenyau indai iya. Bepun ari nya, David nitihka apai iya ke Yong, Kapit. Ba diak, pengelama setaun, iya dibesaika aki, ini, ibok enggau aya iya. Udahnya, iya pulai ke Belawai baru. Datai ba maya umur iya besekula. Apai iya nganjung iya besekula ba SK Nanga Trusa, Kapit. David ke agi mit maya nya enggai jauh ari apai iya. Ketegal nya, iya ngetu besekula ba Premeri 1 aja. Iya ngeringik deka pulai ke rumah, enti dikenang baru, sigi lucu ga pengingat tuk. Maya umur 12 taun, iya berengkah gawa. Iya orang ti rajin bendar gawa, iya kala kerja tasik ba Semenanjung enggau Singapura. Dalam cherita perkahwinan iya ti sebedau tuk, iya diberekat enggau siku anak ke benama Suda. Idup berumah tangga iya enda panjai enggau dua iku indu ti udah. Pengidup iya belabuh tampak baru maya iya betemu enggau Indai Mau dalam taun 2013. Berengkah ari taun nya nyentuk ke seput iya ke penudi, seduai iya enda kala beserara. Niang David ngibun Mau ari maya umur Mau 7 taun, taja Mau tuk anak dulu Indai Mau, tang iya enda kala nganuk Mau, iya ngibun Mau baka anak iya empu. Indai Mau selalu madah - David meh laki ti pemadu romantik. Iya empu ngintu semua utai , enda ngandal ke Indai Mau aja ngadu pengawa. David nyadi tiang pengering ngagai bala menyadi iya. Iya anak kedua ari 4 iku semadik, lalu iya bisi siku madik tiri. Ati iya endang enda jampat ringat. Enti enggau bala ipar ya, enda kala bejaku kasar, enda kala enggai nulung lebuh diasuh. Taja pia, sapa nemu nama utai ti deka nyadi ba kitai... Kena 01/01/2026 urung pukul 7 malam, ba Sibu Jaya Bypass, Jalan Kong Yit Khim, penusah ngelantak-lalu-lari ngambi David ari kitai. Iya ditemu mensia mayuh udah berjam jam iya labuh ke tanah. Iya dibai Ambulans ngagai Sepital Sibu, tang Tuhan lebih agi sayau ke iya. Iya mutuska seput kena pagi 02/01/2026, pukul 07:58 pagi. Utai ti ngasuh bala iya sinu ti dipadah ke sida sebilik, “Kami alu nadai peluang meri selamat tinggal ngagai iya, lalu iya nadai peluang meda mua kami kepenudi iya. Kami bedau sedia deka meri selamat tinggal, laban kami nemu David mega bedau sedia ninggalka kami. Enti baka ulih bai pulai sigi diambi kami pulai iya. Biar bekeradai baka kitai ngeloan utai, amat meh iya ulih di ambi pulai.” Grateful Memorial Park arapka kitak sebilik bulih pengering enggau pengelantang nerima pengelenyau siku lelaki ti cukup bermakna ba pengidup kitak ngelama tu. Niang udah ditumbak ba pendam Grateful Memorial Park kena 04/01/2026. 💌 Sida iya sebilik meri besai terima kasih ngagai urang ti udah datai kiruh enda kira ari segi tenaga, masa tauka duit ringgit. 🙏 🪽 Aram kitai sama besampi ke pengelikun semengat Niang David Anak Gawn ba dunya ti baru. Tuhan merekat kitai semua. Amen. ➕❤️