Kleng Ligen iwwer Onofhängegkeet - Teaser 6 скачать в хорошем качестве

Kleng Ligen iwwer Onofhängegkeet - Teaser 6

All Mënsch huet scho mol vum Grof Siegfried héieren, dee mam Däiwel e Pakt agaang ass, fir eng Buerg ze bauen, an där hie jonk Damme beim Buede belästege konnt. Oder vum Jang vu Béimen, deen d’Schueberfouer gegrënnt huet, a sech esou fir Minoritéiten agesat hat, datt och Blanner an d’Arméi duerfte goen. Oder vum Klëppelkrich, an deem jonk Lëtzebuerger dofir gekämpft hunn, hir Aachtchen net mussen op Franséisch ze bestellen… Mee wat wësst Dir eigentlech wierklech iwwert d’Geschicht vu Lëtzebuerg? Wat huet sech tatsächlech am Joer 963 ofgespillt? Wéini huet d’Land den Habsburger gehéiert, de Fransousen, de Spuenier, den Éisträicher a wat war déi genee Reiefolleg? Wat gouf scho méi beim Wiener Kongress decidéiert? A wéini krut Lëtzebuerg eigentlech genee seng Onofhängegkeet? Fir Iech vun där penibeler Aarbecht z’erléisen, dat alles op Wikipedia nozeliesen, invitéiert Iech den Theaterkollektiv Independent Little Lies am Kader vu sengem drëssegjäregen Anniversaire bei säi kabarettisteschen Owend fir aarm a räich, jonk an al, normal Stierflecher an esouguer déi, déi et deemools an der Schoul gepackt hunn, an der Geschicht waakreg ze bleiwen. Dat heescht, och wann Dir mengt, Dir kennt iech aus, kommt trotzdeem laanscht! A wie weess, vläicht léiert Dir jo effektiv eppes bäi, well hei gi se all opgedeckt, déi Kleng Ligen iwwer Onofhängegkeet. Et spillen: Frédérique Colling a Jacques Schiltz Text an Inzenéierung entwéckelt a Kollaboratioun mam: Claire Wagener a Maurice Sinner Bün a Kostüm: Michèle Tonteling Persoun mat Anung: Antoine Lazzari Luucht: Marc Thein Produktiounsleedung: Jill Christophe Eng Produktioun am Kader vum 30. Anniversaire vun Independent Little Lies – ILL, a Koproduktion mam Centre Culturel Régional Aalt Stadhaus Differdange, mam CAPE-Centre des Arts Pluriels Ettelbruck, mam Kulturhaus Niederanven a mam Kinneksbond, Centre Culturel Mamer. ILL gëtt vum Kulturministère a vun der Stad Esch-Uelzecht ënnerstëtzt.