Қарабұтақ ауылына газ берілді скачать в хорошем качестве

Қарабұтақ ауылына газ берілді

2400 халқы бар Қарабұтақ ауылы бір бейнеттен құтылды. Әйтеке би ауданына қарасты елдімекенге кеше газ берілді. Бұған дейін ауыз сумен қамтылған ауыл халқының тұрмысы енді жеңілдей түспек. Құбыр бойымен жіберілген табиғи газ қараша үйлерге жол тартты. Осылайша Қарабұтақ ауылы үшін тарихи оқиғаға облыс әкімі Архимед Мұхамбетов өз қолтаңбасын қалдырды. Айткулы сәтті өз көздерімен көріп қалу үшін газ тарату орталығы басына жиналған үлкен-кішінің қуанышында шек жоқ. Өмірлерінің жартысы от жағып, күл шығарумен өткен ақ жаулықты аналар шашу шашты. Қарабұтақ ауылында бұдан былай әлеуметтік, мәдени, спорттық нысандар қатары толығып, қала деп кеткен жастар ауылға қайтады деген үміт бар. Бастама жаман емес. Елді мекенде амбулаторлық емхана ашылды. Бас дәрігер қаладан келген маман. Бір үйге газ тарту 100 мың теңгеге шығады. Үй иесі газ плитасы мен газ пешін ғана сатып алған. Қалғаны мердігер мекеме жұмысшыларының міндеті. Әйтеке би ауданының орталығы Комсомол ауылына да көгілдір отын жетеді. 2 миллиард теңгеден астам қаражат бөлініп, 78,2 шақырым желіні тартуға жобалық-сметалық құжаттама әзірленді. Жұмыс 2015-2016-шы жылдарға жоспарланып отыр. 2018-ші жылға қарай Әйтеке би ауданы тұрғындарының тең жартысы газбен қамтылады. Биыл Ақкөл, Аралтөбе, Жамбыл ауылдарын көгілдір отынмен жабдықтау бойынша құжаттар дайындауға 38 миллион теңгеге жуық қаржы бөлінді. Талдысай мен Жарөткел елді мекендерінде газ тарату стансалары 2016-2017-ші жылдары салынады. Оған 2 миллиард теңгеге жуық қаражат жұмсау көзделген.