【 2026年1月20日 快必開往拔摩島的航程 - 第1962日】 скачать в хорошем качестве

【 2026年1月20日 快必開往拔摩島的航程 - 第1962日】

上星期快必嘅中同探訪嘅時候，佢話12月睇完一本關於中國文人雅士飲酒嘅書，尋日收到佢嘅快必讀贏，就係講呢本「文豪酒癮診斷書」。我哋一齊睇吓快必讀贏嘅分享啦 —— 呢本書嘅作者，係臺灣大學醫學系畢業，精神科同成癮專科嘅醫師叫廖泊喬。台灣人唔係叫醫生，叫醫師。呢本書入面，佢蒐集咗好多唐宋詩人、詞人，總之係大文人啦，佢哋寫嘅飲酒詩詞，透過呢啲詩詞以及生平記載，話俾人知酗酒、酒癮對人嘅影響，就好似一本文科、理科互通嘅書，十分有趣。廖醫師1988年出生，係遊走於文學和精神醫學嘅年青人，38歲咋。 睇呢本書嘅時候，我跳過所有作者叫人戒酒嘅部份，亦都跳過所有話酒係點樣傷肝、傷腦、傷心嘅段落。我主要係睇嗰啲詩人、詞人寫關於酒嘅詩詞。我要好好背返幾句，等我明年四月上岸嘅時候，同至親好友飲酒嘅時候，可以吟返幾句詩詞，扮吓文人雅仕！ 呢本書裏面提到嘅文人雅仕，我大都都認識，畢竟，我都係讀中文系嘅，但我就唔知呢啲文人，係咪嗜酒之徒。好似蘇軾咁，我就唔知佢原來寫過「酒」，甚至自己釀過酒𠻹！點樣釀酒呢？我都想知道啊。雖然冇詳細介紹，但係就有講到蘇軾釀過蜂蜜酒，話好難飲喎；又釀過桂花酒，似藥酒，我諗起跌打酒。後來有道士又教佢釀真一酒、天門冬酒，總之五花八門。最後蘇軾，咪即係蘇東坡，就寫咗「東坡酒經」，創作出「加飯酒」。加飯酒，我食大閘蟹時候就飲過，嗰支可能比較普通啲，唔及後來飲過一啲花雕咁香，始終花雕酒比加飯陳年，會更加醇厚，唔夠甜嘅話，加粒話梅啦！ 「小兒誤喜朱顏在，一笑那知是酒紅」蘇軾飲咗酒面紅紅，屋企細路以為佢面色紅潤𠻹。仲有，「我飲不盡器，半酣味尤長」、「我雖不解飲，把盞歡意足」，我雖然唔係好識飲酒，攞起個酒杯，已經好鬼開心。原來蘇東坡酒量好淺，佢自己話：「吾少年望見酒盞而醉，今亦能三蕉葉矣」蕉葉係裝酒嘅容器，聽個名就知好淺啦。佢又話自己「飲酒終日，不過五合，天下之不能飲，無在予下者。」作者話俾我知，五合大概320毫升，即係依家一罐啤酒左右啦，蘇東坡果然酒量好淺喎！ 北宋詞人蘇軾之外，柳永我都10分喜愛，尤其係我讀中六、七、大學時，尤其喜愛他的風流糜爛浪漫，我將佢睇成係太宰治、郁達夫之類嘅文人。原來，李清照除咗寫詞厲害，酒都飲得很兇很勁的，唔睇呢本書都唔知道啊！ 李白，我當然知佢係詩仙、酒仙啦，「將進酒，杯莫停」大家一定耳熟能詳啦，原來李白有超過100首同飲酒有關嘅詩，「人生得意須盡歡，莫使金樽空對月」，係人都聽過啦，係咪？「兩人對酌山花開，一杯一杯復一杯，我醉欲眠卿且去，明朝有意抱琴來」我醉鬼咗，你自己走咗去，聽朝拎埋個琴嚟，我估又再飲過啦。我好少彈琴，我彈結他。「勸君莫拒杯，春風笑人來」，「蘭陵美酒鬱金香，玉碗盛來琥珀光，但使主人能醉客，不知何處是他鄉。」全部都係同酒有關嘅好詩，淺白易明易讀，用廣東話讀又啱晒音，超正！ 杜甫係李白嘅好朋友，李白同佢講：「飛蓬各自遠，且盡手中杯」，與朋友餞別，以酒相送，飲杯cheers；「相看不忍別，更進手中杯」，朋友臨行前以酒相送，都係飲杯cheers。冇朋友喺身邊嘅時候，點樣好呢？「花間一壺酒，獨酌無相親，舉杯邀明月，對影成三人」我喺船上呢五年幾以嚟，成日都諗起呢首詩，之前灰色衫嘅時候食私飯，有冇酒精嘅啤酒飲，我喺房入面，拎起獨酌，就係呢種舉杯邀明月嘅意境了！ 原來，白居易也寫了很多同酒有關嘅詩呢！而且詩如其名，淺白易明，就好似我哋今日嘅用語，例如「莫怪近來都不飲，幾回因醉卻沾巾，誰料平生狂酒客，如今變作酒悲人。」係唔係好淺白易明，好似我哋依家用嘅文字講嘅說話咁呢？！又例如呢一首：「二十年前別，三千里外行。此時無一醆，何以敍平生」白居易仲有一組酒詩，叫「勸酒十四首」，裏面好幾首第一句係：莫隱深山去、莫作農夫去、莫作商人去、莫事長征去…… ，總之唔好做咁多嘢，「不如來飲酒」，最後，就用醉悠悠、醉酣酣、醉昏昏、醉騰騰等不同形容飲醉酒嘅疊字作結尾，係唔係好正呢！ 有位文人叫石曼卿，我就唔係好認識，睇本書講，當朝皇帝叫佢戒酒，好啦咁就戒，點知一戒就瓜咗，認真慘！我諗起有啲人一世都食煙，一戒煙就肺癌！不過又有人唔食煙都有肺癌嘅！賀知章呢位詩人，我好少留意。呢本書仲有提到陸游、辛棄疾、歐陽修，呢幾位都係我熟悉嘅文人名字。另外，比較唔熟悉嘅嘅有梅堯、楊萬理，最後有陶淵明作結尾。 喺最後最後仲有一個類似心理遊戲，嘅「酒癮小測驗」，問讀者一啲關於飲酒嘅習慣，判斷自己屬於哪種文豪的飲酒風格，例如李白係豪飲樂天派）、杜甫係借酒消愁型，李清照係拚酒、陶淵明係醉酒⋯⋯平時我唔會玩啲心理遊戲，今次即管試吓，我以為自己係李白，點知我原來係 ——李商隱，深情愁飲！好彩，李商隱嘅詩，我都幾like嘅，佢嗰首「春蠶到死絲方盡，爉炬成灰淚始乾」將蠶蟲嘅「絲」食字成思念嘅「思」，又將蠟燭溶化時候滴落嚟嘅情景，比喻成流淚，冇得頂呀！ ～好快就農曆新年，咁啱又係二月，快必嘅生日，如果你仲未寫過信俾快必嘅話，唔好懶、唔好怕羞，買張靚靚賀卡，賀吓佢啦，寄埋俾慢必都好㗎 ！如果你好耐冇寫過信俾佢嘅話，就請快啲加入返筆友嘅行列，因為收到你哋嘅信，對佢嚟講係好大嘅支持同鼓勵，佢仲有14個月左右要捱呀！ ~提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！ 來信請寄去： 香港七姊妹郵政局 郵政信箱60141號 （PO Box 60141 Tsat Tsz Mui Post Office, HK）