Жаңаөзенде екі қабатты тұрғын үйде жарылыс болып, 4 адам қаза тапты скачать в хорошем качестве

Жаңаөзенде екі қабатты тұрғын үйде жарылыс болып, 4 адам қаза тапты

Жаңаөзендегі екі қабатты тұрғын үйде болған жарылыс салдарынан төрт адам қайтыс болды. Ал үйінді астынан құтқарылған үш тұрғын ауыр жағдайда жансақтау бөлімінде жатыр. Науқастардың біреуі жүкті келіншек екен. Дәрігерлер зардап шеккендердің барлығы термиялық күйік алғанын айтты. Ал төтенше жағдайлар қызметі 12 пәтерлі тұрғын үйдің 150 шаршы метрі қирағанын жеткізді. Мамандар топырақ астынан ешқандай газ баллонын таппаған екен. Сондықтан, газ құбырынан ақау шығып, ауаға тараған көгілдір отыннан жарылыс болды деген болжам айтып отыр. Оқиға орнына әріптесім Махаббат Нұржанқызы барып келген еді. Толығырақ тарқатсын. Он екі пәтерлі бұл тұрғын үй орталықтандырылған газ жүйесіне қосылған. Бірақ бүгін таңғы төрттер шамасында болған жарылыстың дүмпуі тіпті көрші үйлерге дейін жетіпті. Сәресіге тұрып, ауыз бекітуге дайындалып жатқан жұрт әбден зәре-құтымыз қашты дейді. Айтуларынша, құдды жер сілкінгендей дүмпу болып, бөлмелердің қабырғасына дейін қозғалып кеткен екен. Дереу бала-шағасын оятқан тұрғындар далаға қашып шыққан. ҰЛБОЛСЫН ТОЙМЕТОВА, Жаңаөзен қаласының тұрғыны: – Шай дайындап жатқанмын сәресіге. Сөйтіп едім. Тарс ете қалды, үйдің бәрі қозғалып кетті. Содан мына үйдің келіншегі жүгіріп шығып мына үйдегі үш баланы құтқарды. + Айналар шағылғанда балалардың шулаған дауысын естідім. СӘНИЯ МӘЖИЕВА, Жаңаөзен қаласының тұрғыны: – 7-ден өте келдік. Келсек үйімізден дым да жоқ. Дым қалмапты, мен мына екінші этажда тұратын едім 12-квартирада. Үйімнен дым да жоқ тірнектеп жинаған дүниемнен. Үстімдегі киіммен қалдым. Не істеймін білмеймін қайда баратынымды үйім жоқ менің. Қопарылып түскен пәтердің біріндегі тұрғын күні кеше Ақтауға кетіп, сол жақта түнеп қалған екен. Оқыс оқиғаны естіген ол қазір есеңгіреп әлі де өзіне келе алмай отыр. СЕРІК ЕЛАМАНҰЛЫ, Жаңаөзен қалалық көпбейінді ауруханасының директоры: – Біреуі келіншек беременная. Ол қазір операцияда отслойка болып қазір акушер-гинекологтар операция жасап жатыр. Облыстан бас нейрохирург мамандар келді. Қазір омыртқаларына операция жасайды. Сосын екінші науқас реанимацияда. Ол да аяғы біраз бетонның астында қалған. Ол науқастың да жағдайы ауыр. Бірақ УЗИ сосудов бәрін жасадық. Сосудтары пока жаман емес. Ал Жаңаөзендегі ауруханаға таңғы 4.30-дан бастап 14 зардап шеккен адам жеткізілген. Бірақ біреуі тілге келместен қайтыс болды. Дәрігерлер зардап шеккендердің көбінің термиялық күйік алғанын айтады. Оның ішінде 7 науқас амбулаторлық емге жіберілген. Тағы екі жасөспірім жарақат бөлімде ем қабылдап жатыр. Ал бір ересек адамның жағдайын орташа ауырлық деңгейінде дейді дәрігерлер. Үйінді астынан құтқарылған үш адам жансақтау бөлімінде жатыр. Оның біреуінің жағдайы ауыр болған соң санавиациямен Ақтауға жіберілген. МАХАББАТ НҰРЖАНҚЫЗЫ, тілші: – Төтеншеліктердің болжамы бойынша тұрғын үйдің жертөлесіндегі құбырдан газ ауаға тарап жарылыс болған. Соның салдарынан үйдің кіреберісіндегі 4 пәтер жертөлеге опырылып түсіпті. Кенеттен келген апат көршілес пәтерлердің қабырғасын да жайпап өткен. Ал терезелердің әйнегі шытынап, бірнеше метр қашықтыққа ұшқан. Жарылыстан кейін тұрғын үй газ желісінен толық ажыратылған. Мамандар қазір аумақта ешқандай қауіп жоқ екенін айтып отыр. МҰРАТ МҰҚАНОВ, Маңғыстау облыстық төтенше жағдайлар департаментінің басшысы: – Құрылыс материалдарын жинау барысында ешқандай да газ баллон анықталған жоқ. Қазіргі таңда болжам бойынша газ ауаның қоспасының жарылуы болып есептеліп отыр. Одан бөлек жарылу себептерін анықтайтын сараптамалар тағайындалады. Оқыс оқиғадан кейін ведомствоаралық комиссия құрылды, жарылыс дерегі бойынша қылмыстық кодекстің 292-шы, яғни өрт қауіпсіздігі талабын бұзу бабы бойынша іс қозғалды. Ал "Қазмұнайгаз" компаниясы апат салдарынан баспанасыз қалған тұрғындарға жаңа пәтер беретінін мәлімдеді. Айта кетейік, бұл тұрғын үй 1977 жылы тұрғызылған. Әкімдіктік мәліметіне сүйенсек үй апаттық жағдайда болмаған. Сондай-ақ, үйіндіні ашу кезінде төтеншеліктерге ішкі істер қызметкерлері мен жаңаөзендік тұрғындар көмек көрсетті. Ал жарылыстан зақым келген жақын маңдағы үй тұрғындарына жаңаөзеннің кәсіпорындары көмектетін болады Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал