Скачать с ютуб Հավերժական շարժիչներ; Ֆիզիկա 8 | в хорошем качестве

Հավերժական շարժիչներ; Ֆիզիկա 8 |

Վաղ ժամանակներից ի վեր ոմանք ձգտել են ստեղծել սարքեր, որոնք, առանց էներգիա ծախսելու, կարողանային անընդհատ օգտակար աշխատանք կատարել։ Այդ սարքերն անվանել են հավերժական շարժիչներ: Ա նկարում պատկերված է հավերժական շարժիչի ամենահին նախագծերից մեկը։ Ըստ հեղինակի՝ այն հավերժ պետք է պտտվի ժամասլաքի պտտման ուղղությամբ, քանի որ աջ կողմերի գնդերի ծանրության ուժերի բազուկներն ավելի մեծ են, հետևաբար մեծ են նաև դրանց ուժի մոմենտները։ Իրականում այն չի պտտվում։ Չնայած անիվը ժամասլաքի պտտման ուղղությամբ պտտող ծանրության ուժերի բազուկներն ավելի մեծ են, սակայն այդ ուղղությամբ պտտող մոմենտ են առաջացնում հինգ գնդերի ծանրության ուժերը, իսկ հակառակ ուղղությամբ՝ վեց գնդերինը։ Հավերժական շարժիչի մեկ այլ նախագիծ պատկերված է Բ նկարում։ Ըստ հեղինակի՝ քանի որ աջակողմյան մարմինների վրա, բացի ծանրության ուժից, ազդում է նաև դեպի վեր ուղղված արքիմեդյան ուժը, ապա սարքը միշտ պետք է պտտվի ժամասլաքի պտտման հակառակ ուղղությամբ։ Սակայն այն չի աշխատի, քանի որ մարմինները ներքևից ջրավազանի մեջ մտցնելու համար անհրաժեշտ է հաղթահարել ջրի սյան հիդրոստատիկ ճնշումը։ Չպետք է ավելորդ ջանքեր գործադրել նման սարքեր ստեղծելու համար։ Որքան էլ որ հնարամիտ լինեն դրանց նախագծերը, միևնույնն է, այդ սարքերն աշխատել չեն կարողանա։ Էներգիայի պահպանման օրենքը բացառում է նման սարքերի աշխատանքը։ Իսկ, եթե այնուամենայնիվ, նման սարքն աշխատում է, ապա ինչ-որ տեղ անպայման էներգիայի աղբյուր է թաքնված։