Sunday Reflection || 22.02.2026 || Br.Sukanta Debbarma скачать в хорошем качестве

Sunday Reflection || 22.02.2026 || Br.Sukanta Debbarma

Kaitorni mung lobjakthung Yaphang 2: 7-9; 3: 1-7 Aphuru khe Subraiyung Kaitor hani kisicha ha naui borokno tak kha tei bini bukungo subui mwthangnai rangma daui rw kha; hakhe borok kwthang wng kha. Hakhe Subraiyung Kaitor salkabai-o Eden hwnwi tháiblwng kaisa snam kha; tei bo takma a borokno aro ton kha. Bo aro naithok naithok tei kothok kothok bwthái buphangrok achai rw kha, tháiblwngni kwcharo khe langmani buphangno tei kaham hamya si rwnai Simaphangbo achai rw kha. Tabuk Subraiyung Kaitor aswk mal-mata snammarokni bere chibuk wng kha bandi kwrwng kuk. Bo bwrwino hai hwnwi sa kha, “Kaitor da norokno, ‘o tháiblwngni buphangrokni bwtháirokno norok ta chá di’ hwnwi hwn?” Hakhe a bwrwi chibukno hai hwnwi sa kha, “Chwng o tháiblwngni bebak buphangrokni bwtháirokno cháui mano; phiya ba Kaitor hai hwnwi sa kha, ‘tháiblwng kwcharo tongma a buphangni bwtháino le ta chá di tabo ta tang di, hakhe nwng thwinai.’ ” Phiya a chibuk bwrwino hai hwnwi sa kha, “Nwng thwi glak: tamni hwn ba, Kaitor si-o nwng o buphangni bwtháino chá khe nini mokol kiyoknai tei nwng Kaitor hai wngnai tei bubo kaham bubo hamya saui mannai.” A bwrwi a buphangno naithok nuk kha tei bini bwthái chá khe bwswk thokno tei siyan gwnang wng khe bwswk hamno hwnwi uansuk kha, hakhe bo aboni bwthái khagwi chá kha tei bwsainobo kisa chá di hwnwi rw khe bwsaibo abono chá kha. Aphuru khe khoroknwini mokol’-no kiyok kha, hakhe bórok sak lánga hwnwi saui man lai kha; hakhe bórok khwichang bwláirokno subui sakno ból lai kha. 2nd Reading Rum 5: 12-19 Borok khoroksani bising tẃi se swngcharo sumsok hap phai-o; bini a sumsokni bagwi’-no a borok ma thwi-o. Abo wngma bai’-no bebak bororok ma thwi bai-o, tamni hwn khe bebak bororok’-no sumsok khlai kha. Kerong rwjak ya sinibo o swngcharo sumsok tongo, phiya ba kerong kwrwi khe aro sumsokbo romjak ya. Tamo khe Adamni simi Musini mol jora bororok ma thwiwi máng phai kha; Kaitorni kók khna ya wngwi Adam sumsok khlaima hai sumsok khlai yarok suda ma thwiwi máng phai kha. Adam wng kha khoroksa phainai hwnmani a borok hai se. Tamo khe o khoroknwirok bórok a borokno borok ya, tamni hwn khe Kaitor ahaino rwmani abo Adam sumsok khlaima hai ya. A borok khoroksa sumsok khlaima bagwi borok kwbángma’-no ma thwi bai kha, tamo khe Kaitorni khairokmabo báng kugo, Jisu Khristo hwnwi a borok khoroksa khairokma bising tẃi Kaitor aswk bororokno hai’-no rwmani abobo báng kugo. Kaitor rwma bai a borok khoroksa sumsok khlaima phér laijak se, a khoroksa sumsok khlaima ulo bo “Majra gwnang” hwnjago, phiya aswk bororok kwbángma’-no sumsok khlaima ulo Kaitor khairogwi “Majra kwrwi” hwnwi rom kha. A borok khoroksani bagwi, bo sumsok khlaima bising tẃi bebak bororok ma thwi bai-o. Tamo khe Jisu Khristo hwnwi borok khoroksani yak tẃi khlaijakmani a samung bwswk se kotor! Kaitor bai belai khairokjagwi hai’-no kaham hwnwi romjaknairok bebakno Khristo tẃi kwplai wngwi thangwi tongnai. Hakhe tabuk, a sumsok kaisa bai bebak bororok majra phnangjakma hai’-no a samung kaham kaisa bai bebak bororok phiyógwi mwthangjak bai kha. Hakhe a borok khoroksa kók khna ya wngmani bai aswk bororok sumsok gwnang khlaijak bai kha, omo tẃi kheno tei borok khoroksa kók khnama bai aswk bororok Kaitor bai kaham hwnwi romjak bainai.   Gospel Reading Mathai 4: 1-11 Aphuru Phola Jisuno Soitan bai belok rwjakna hwnwi hasing panthoro tubu kha. Nokha sal brwichi hor brwichi chá yaui tong khe Jisu ok khuijak kha. Soitan bini thani phaiwi bono hai hwnwi sa kha, “Nwng Kaitorni Sajla khe o holongrokno ruti wng di hwn di.” Jisu hai hwnwi sa kha, “Elembago o kók tongo, ‘Borok ruti bai simi thangwi man ya, Kaitorni búkhúkni bebak kók bai se thangnai.’ ” Aphuru Soitan Jisuno Taun Kwtharo tlangwi noktharni bosok kuchugo bacha rwui bono hai hwnwi sa kha, “Nwng Kaitorni Sajla khe ha-o bakhlai di; tamni hwn khe Elembago o kók tongo, “ ‘Kaitor bini suarirokno nini bagwi dagi anw; nini yakung holong nang ya tẃi khe bórok nono yak bai yachak sok anw.’ ” Jisu bono hai hwnwi sa kha, “Elembago o kókbo tongo, ‘Nini Kaitor Subraino nwng ta potali di,’ ” Hakhe Soitan bono hathái kuchukma kaisa-o tlangwi swngcharni aswk ha bai jolma jolsarokno phunugui hai hwnwi sa kha, “Nwng ano yáskú sungwi khulum khe omorok bebakno’-no ang nono rw bainai.” Hakhe Jisu hai hwnwi sa kha, “Tháng di Soitan! Elembago o kók tongo, ‘Nini Kaitor Subraino simi se suriui khulum di.’ ” Aphuru Soitan bono yakarwi tháng kha, hakhe suarirok phaiwi Jisuno chuba phai kha.