港人北上「執死雞」變「送頭顱」！中山變鬼城？馬鞍島新盤劈價五成，當年3萬買入，而家1.3萬都無人問津。深中通道未通，先通咗港人血汗錢落海之路。 скачать в хорошем качестве

港人北上「執死雞」變「送頭顱」！中山變鬼城？馬鞍島新盤劈價五成，當年3萬買入，而家1.3萬都無人問津。深中通道未通，先通咗港人血汗錢落海之路。

講起港人北上中山買樓呢壇嘢，前幾年真系癲過紅Van飛鵝頸！嗰陣時只要你揸車由深圳踩多腳油過中山，嘩，高速路口嗰啲着曬西裝打曬呔嘅地產仔，簡直仲癲過見親大佬，成班喪屍咁撲上你車頭，揸住啲傳單系咁拍你玻璃，把聲仲要大過喇叭：「阿哥！靚女！睇樓唔使錢喇！坐低飲杯茶，陣間帶你發達！」 嗰時嘅中山樓市，尤其系馬鞍島嗰頭，直情系「願景量產工廠」，仲要系24小時唔收工嗰只。深中通道仲喺海底打緊樁，班經紀已經畫好曬《清明上河圖》俾你睇。「睇真啲老細，呢度就系未來嘅深圳前海後花園！你嫌而家兩三萬一平方米貴？等深中通道一通車，嘩！一支公到深圳，對面前海賣緊十幾廿萬，你呢度最少翻兩番，到時六萬都算系俾你執到啦！」呢番說話，系咪聽到識背呢？但嗰陣就好似有降頭咁，成千上萬嘅香港人，個心俾佢哋撩到鬼咁痕。 嗰陣時呢，幾多香港老友記，成頭家坐滿嗰啲睇樓大巴，一支箭咁殺上去。諗住揸住嗰百幾萬港紙，喺香港呢，最多買個車位，仲要系淨系泊到Smart嗰只。一過中山，嘩！即刻變咗豪宅入場券！示範單位入面，人頭涌涌，煲冬瓜、廣東話、仲有幾句港式英文，直頭國際級曬冷。示範單位啲裝修靚到，燈光靚到，你坐落去呢，直頭覺得自己 pat pat 下面嗰張唔系梳化，而系維港夜景，系將來數錢數到手抽筋嘅退休生活。咩「前海八分之一價」，咩「通車即升」，呢啲字眼，全部直接燒錄入你個腦。嗰陣時邊個夠膽話一個「唔」字，即刻有十個地產仔𠹺你，用嗰種恨鐵不成鋼嘅眼神啤住你，好似同你講：「老細，你連送錢都唔識路呀？」 但系，各位老友記，有句說話一定要記住：呢個世界，最容易入口嘅，叫餌；最難哽返出嚟嘅，叫魚鈎。 好啦，快鏡飛到去而家，舊年下半年，甚至今年嘅今日。你再去中山八下，尤其系嗰個曾經俾人吹到上太空嘅馬鞍島，叫佢做「新區」？直頭系一個巨型、露天、實景嘅「鬼城沉浸式體驗館」！ 唔好講嗰啲三萬銀撲錘入去嗰批先烈投資客，而家副腸有冇悔到變紫色。淨系睇下而家示範單位入面個價錢牌，好嘢，五折都算系同你客氣。當年賣緊兩萬七八嗰個「粵海城」，而家同你玩「劈價清棟」，一萬三千七！咩概念？即系你當年買個廁所嘅錢呢，而家可以買到一房一廳，仲要連裝修！呢啲叫劈價？呢啲直頭系幫第一代業主做CPR，不過撳到成身汗呢，先發現人老早就凍過水。 最諷刺嘅系咩啊？系新樓竟然賣得平過二手樓！呢件事喺經濟學教科書直頭系神跡，但系喺中山，佢就血淋淋咁發生緊。當年嗰班「接火棒」嘅業主，而家想放盤套現返啖氣，一睇行情，O曬嘴。自己掛兩萬？你慢慢掛啦，掛到房產證過期都可能賣唔出。因為隔籬新樓發展商做緊「跳樓價感謝祭」，萬四蚊新樓你任揀，仲要精裝修送家電。咁請問呢，邊個傻仔會俾多幾千蚊每平方米，去買你嗰間住到殘嘅二手貨呀？ 再嚟同你計下數，包你聽完之後呢，個心寒過雪櫃入面嗰只冰鮮雞啊。 有個香港阿叔呢，早幾年俾經紀啲「深中通道概念」洗咗腦，拎住層樓喺香港收租嘅「棺材本」，百六七萬，Full Pay撲錘入咗馬鞍島一個新盤。買完之後，不知幾威風，見人就吹自己有內地物業，系「大灣區人」。結果而家呢？想賣咗層樓，俾個仔喺香港撲個首期。地產代理同佢估價，一百二十五萬，仲要系有人傾先得。呢條數仲未計佢呢幾年供樓嘅利息、雜稅，七除八扣，夾夾埋埋輸咗一百萬！阿叔而家一講起層樓，對眼就紅曬，話嗰度唔系屋，直情系碎鈔機，開一次機，冇咗一百萬。 仲有個經典到唔經典嘅，記唔記得當年TVB《東張西望》都有報嗰單中山「凱里亞德酒店」嘅世紀大騙案？件事今日拎返出嚟講，依然系教科書級別嘅「點樣將香港人當水魚」。嗰班香港業主，成村人，興高采烈走去買酒店式公寓，話有包租，回報高，十幾年返本。結果收樓嗰日，個個衝上去睇，O曬嘴！成棟樓直頭冇郁過，爛地一片！仲離譜嘅系，有業主發現自己用幾十萬買嗰個單位，喺張圖則上面直頭系唔存在嘅！冇錯，你冇聽錯，就系「鬼屋」！你買咗一團空氣！ 仲有業主買嗰啲所謂「新樓」，等房產證出到嚟一睇，好嘢，剩返十幾年地契，原來系將一棟丟空咗幾十年嘅爛商場翻新，改頭換面就當新樓賣。嗰啲所謂「豪華複式公寓」，實用面積扣曬公攤，扣埋啲亂七八糟嘅分攤，最後落到你手，剩返五平方米多少少，直頭比棺材鋪入面嗰啲大仙級貨色大些少。呢啲系咩？系呃錢！系當你傻㗎！件事雖然過咗幾年，但每次諗起，都好似一根刺，拮喺所有諗住北上買樓嘅香港人心入面。呢啲邊系買樓，擺明系上去做慈善，仲要系一句多謝都冇嗰種。 你再望下而家中山嘅二手市場，直頭系血肉模糊。嗰個南朗鎮，以前靠住深中通道概念，樓價一支箭咁標到萬五。而家呢？九千！一平方米跌咗六千蚊，咩概念？一百平方米嘅單位，你咩都冇做過，淨系坐喺屋企，六七十萬就人間蒸發咗。呢啲仲慘過揼錢落海，揼錢落海至少聽下聲，呢啲冇聲冇氣，就冇咗成個首期。成個中山嘅庫存，嚇死人，要賣三十七個月先賣得完。發展商而家急到扎扎跳，咩屎橋都出齊。有送車位嘅，有送裝修嘅，甚至有大膽嘅經紀，喺網上面吹到話「0元置業大灣區」，叫你用層樓借財仔套現，跟住走數唔還。天呀，呢啲邊系買樓建議，直頭系教緊你去詐騙銀行，想送你入去踩衣車呀！嗰啲信咗呢啲嘢嘅人，一俾人踢爆，等住你嘅就系無期徒刑嘅貸款詐騙罪，你成世人就咁玩完。 返轉頭諗下，而家嘅中山樓市，絕望到咩地步。連喺中山發跡嗰個地產大佬「雅居樂」，個根都喺度，而家都俾合作夥伴告到上法院，要清盤。四百幾億嘅債，手頭現金得返三十億，呢啲唔系山窮水盡系咩？連地頭蟲都冇碇企，你啲散客買嗰啲九唔識七嘅小發展商嘅樓，實唔安全啦？ 所以呢，講到最後，真系要同仲諗住北上中山「執死雞」嘅香港老友記講幾句肺話。如果你系正宗用家，純粹想搵個地方養老，或者你喺嗰度返工貪方便，咁好啦，而家確實系買家市場。你可以揸住把牛扒刀，狠狠咁劈價，買個住得舒服嘅地方，咁冇問題。畢竟，樓首先系用嚟住嘅。 但系呢！如果你仲抱住十年前嗰種「炒樓發達」嘅心態，諗住去中山撈個底，等幾年翻一番，咁我勸你，早啲瞓覺把啦，夢入邊咩都有。你望下而家嗰一片片黑媽媽，夜晚着燈率得返個位數嘅屋苑；你望下嗰啲絕望咁掛喺網上，成年都冇人吼嘅二手盤；你望下嗰啲發展商走咗數、起爛咗嘅地盤。呢度點會系黃金坑，直頭系無底深潭啊！抄底？小心撈到喺半山腰，上面仲有十八層地獄等你參觀啊。 而家嘅中山樓市，已經徹底撕爛咗「投資低水」塊遮醜布，露出佢「大型居住社區」嘅真面目。如果你係為咗去嘆世界，嗰度或者系個唔錯嘅選擇。但如果你係為咗去收割財富呢，咁你好有可能就系嗰扎俾人收割嘅韭菜。第時咪攬住本紅色嘅房產證，望住窗外條吉咗嘅街，眼淚心裡流，後悔當初點解要鬼揞眼，走上嚟做呢個「大灣區最型嘅接盤俠」。記住啊，喺呢個年代，冇輸，已經系贏。你仲想靠買樓發達？起身啦，老友記！