ប្រតិភូក្រសួងការពារជាតិ និងរដ្ឋបាលខេត្ត​ អញ្ជើញគោរពវិញ្ញាណក្ខន្ធ ​ជូនវីរកងទ័ពដែលបានពលី​ скачать в хорошем качестве

ប្រតិភូក្រសួងការពារជាតិ និងរដ្ឋបាលខេត្ត​ អញ្ជើញគោរពវិញ្ញាណក្ខន្ធ ​ជូនវីរកងទ័ពដែលបានពលី​

ប្រតិភូក្រសួងការពារជាតិ និងរដ្ឋបាលខេត្តសៀមរាប អញ្ជើញគោរពវិញ្ញាណក្ខន្ធ និងបំពាក់ឋានន្តរសក្តិបច្ឆាមរណៈ ជូនវីរកងទ័ពដែលបានពលីក្នុងបុព្វហេតុជាតិ នាថ្ងៃទី២៦ ខែធ្នូ ឆ្នាំ២០២៥ គណៈប្រតិភូក្រសួងការពារជាតិ ដឹកនាំដោយ ឯកឧត្តម ឧត្តមសេនីយ៍ឯក សំ ចាន់ធួន អគ្គនាយករង អគ្គនាយកដ្ឋានយោធសេវា តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ រួមជាមួយប្រតិភូរដ្ឋបាលខេត្តសៀមរាប ដឹកនាំដោយ លោក លី សារី អភិបាលរងខេត្ត បានអញ្ជើញគោរពវិញ្ញាណក្ខន្ធ និងបំពាក់ឋានន្តរសក្តិជាកិច្ចបច្ឆាមរណៈ ជូនសព លោកអនុសេនីយ៍ឯក យឹម វៃ និង លោកអនុសេនីយ៍ត្រី មើ ឌិន ដែលបានពលីជីវិតនៅសមរភូមិទិសព្រះវិហារ។ ក្នុងឱកាសដ៏សោកសង្រេងនោះ ឯកឧត្តម ឧត្តមសេនីយ៍ឯក សំ ចាន់ធួន និង លោក លី សារី បានសម្ដែងនូវសមានចិត្តសោកស្ដាយយ៉ាងជ្រាលជ្រៅ និងការរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសព។ នេះគឺជាការបាត់បង់នូវវីរយុទ្ធជនដ៏ឆ្នើមនៃកងយោធពលខេមរភូមិន្ទ ដែលជានិច្ចកាលតែងតែស្ម័គ្រចិត្តបូជាកម្លាំងកាយចិត្ត ដើម្បីការពារសុខសន្តិភាព និងបូរណភាពទឹកដីជូនជាតិមាតុភូមិ។ ក្នុងពិធីការនោះ ប្រតិភូបានបំពាក់ឋានន្តរសក្តិបច្ឆាមរណៈ ដើម្បីជាការផ្ដល់កិត្តិយស និងតបស្នងចំពោះគុណបំណាច់ដ៏ធំធេងរបស់វីរកងទ័ពទាំងពីររូប និងបានប្រគល់ជូននូវថវិកាគោលនយោបាយ និងថវិកាឧបត្ថម្ភពីក្រសួងការពារជាតិ ជូនដល់ក្រុមគ្រួសារសព ដើម្បីរៀបចំពិធីបុណ្យតាមប្រពៃណីព្រះពុទ្ធសាសនា និងពិធីការយោធាឱ្យសមរម្យតាមឋានៈ។ ឯកឧត្តម ឧត្តមសេនីយ៍ឯក សំ ចាន់ធួន ក៏បានពន្យល់ណែនាំអំពីគោលរបបឧបត្ថម្ភប្រចាំខែសម្រាប់គ្រួសារសព និងបានលើកទឹកចិត្តដល់កូនៗសពឱ្យខិតខំរៀនសូត្រ ដោយសង្កត់ធ្ងន់ថា ក្រសួងការពារជាតិ និងរាជរដ្ឋាភិបាល នឹងមិនបោះបង់ ឬទុកឱ្យគ្រួសារវីរកងទ័ពពលីនៅឯកោឡើយ។ លោក លី សារី ក៏បានសម្តែងនូវការអាណិតអាសូរ ចំពោះក្រុមគ្រួសារសពទាំងពីរ ក្នុងការបាត់បង់សមាជិកក្នុងគ្រួសារ តែការបាត់បង់របស់វីរៈកងទ័ពយើងទាំងពីរនេះ គឺពលីដោយកិត្តិយស ថ្លៃថ្នូរដែលប្រទេសជាតិបានចារិកទុកជាប្រវត្តិសាស្ត្រ សម្រាប់អ្នកជំនាន់ក្រោយ។ ម្យ៉ាងទៀត ប្រមុខរាជរដ្ឋាភិបាលយើង មិនបានទុកឲ្យក្រុមគ្រួសារវីរៈកងទ័ព ដែលបានពលីនៅក្នុងសមរភូមិឱ្យនៅឯកោនោះឡើយ គឺអាជ្ញាធរគ្រប់ជាន់ថ្នាក់ នឹងយកចិត្តទុកដាក់ នូវទុក្ខលំបាករបស់បងប្អូនទំនុកបម្រុង សំខាន់ចំពោះកូនៗកំពុងសិក្សារៀនសូត្រ។ ក្នុងពិធីបុណ្យនោះដែរ បណ្ដាអង្គភាពពាក់ព័ន្ធក៏បាននាំយកលិខិតរំលែកទុក្ខ និងថវិកាចូលរួមឧបត្ថម្ភដល់ក្រុមគ្រួសារសពទាំងពីរ ដើម្បីជាការសម្រាលបន្ទុក និងបង្ហាញពីសាមគ្គីភាពក្នុងជួរកងទ័ព និងអាជ្ញាធរដែនដីផងដែរ៕ ‎អត្ថបទ និងរូបភាព៖ លោក ម៉ី សុខារិទ្ធ កែសម្រួល៖ លោក អ៊ុន ណារាជ្យ