Ո՞վ է ֆինանսավորում դիտորդությունը Հայաստանում։ скачать в хорошем качестве

Ո՞վ է ֆինանսավորում դիտորդությունը Հայաստանում։

Մարտի 17-ին՝ ժամը 14:00-ին, Մեդիա կենտրոն-ում տեղի ունեցավ քննարկում` «Դիտորդների գործունեության նոր կարգ. սահմանափակո՞ւմ, թե՞ կարգավորում» թեմայով։ Քննարկման ընթացքում անդրադարձ կատարվեց ընտրական գործընթացներում դիտորդական առաքելությունների կարգավորմանը և ընտրական օրենսգրքում կատարված վերջին փոփոխություններին։ Քննարկմանը մասնակցում էին Կենտրոնական ընտրական հանձնաժողով-ի արտաքին կապերի վարչության պետ Հերմինե Հարությունյանը և Հելսինկյան քաղաքացիական ասամբլեայի Վանաձորի գրասենյակ-ի ծրագրերի ղեկավար Վարդինե Գրիգորյանը։ Հիշեցնենք, որ դիտորդների գործունեությանը վերաբերող փոփոխությունները ընդունվել են 2026 թվականի հունվարի 23-ին՝ Ազգային ժողովի արտահերթ նիստում։ Նոր կարգավորումները խստացնում են դիտորդական առաքելություններին ներկայացվող պահանջները՝ սահմանելով քաղաքական չեզոքության պահպանում, ֆինանսավորման աղբյուրների բացահայտում, դիտորդների վարքագծի կանոնների պահպանում և դիտորդական կազմակերպությունների գործունեության ավելի բարձր թափանցիկություն։ ԿԸՀ արտաքին կապերի վարչության պետ Հերմինե Հարությունյանի խոսքով՝ հանձնաժողովը համապատասխան իրավական ակտով իր կարգավորումները հարմարեցրել է օրենքի նոր պահանջներին։ Նրա խոսքով՝ այդ ակտով հստակ սահմանված են բոլոր անհրաժեշտ փաստաթղթերն ու ձևանմուշները, որոնք պետք է ներկայացվեն ԿԸՀ՝ դիտորդական առաքելություն իրականացնելու համար հավատարմագրվելու նպատակով։ «Այդ փաստաթղթերի շարքում է նաև դիմումը, որով դիտորդական առաքելություն իրականացնող կազմակերպությունները պետք է բացահայտեն իրենց ֆինանսավորման աղբյուրներն ու դրանց չափը»,— նշեց Հարությունյանը։ Հելսինկյան քաղաքացիական ասամբլեայի Վանաձորի գրասենյակի ծրագրերի ղեկավար Վարդինե Գրիգորյանը, սակայն, ընդգծեց, որ հունվարի փոփոխություններով փաստացի կարգավորվել է միայն դիտորդական առաքելությունների հարցը։ Այնուամենայնիվ, կան ընտրական գործընթացի ֆինանսական թափանցիկությանը վերաբերող այլ կարևոր հարցեր՝ կուսակցությունների ֆինանսավորում, չգրանցված քաղաքական միավորների ֆինանսավորում և այլն։ «Խնդիրն այն է, որ բոլորս գիտակցում ենք, որ ընտրությունների խնդիրը դիտորդական առաքելությունները չեն, իրենք չեն ստեղծում ընտրություններում անհավասար պայմաններ կամ այնպիսի իրավիճակներ, որտեղ ընտրությունների անաչառությունը կամ արդար լինելը կարելի է կասկածի տակ դնել։ Այդ առումով մենք կարծում ենք, որ միայն դիտորդական առաքելության մասով փոփոխությունները սխալ էին», — նշեց Գրիգորյանը։ Ամփոփելով՝ քննարկման մասնակիցները համակարծիք էին, որ ընտրական գործընթացների վստահելիության բարձրացման համար անհրաժեշտ են ավելի լայն և համակարգային փոփոխություններ։ Քննարկման ամբողջական տեսագրությունը հասանելի է Մեդիա կենտրոնի յություբյան ալիքում։ Քննարկումն ացկացվում է «Մեդիա կենտրոն. քաղաքացիական հասարակության արագ արձագանք արդար ընտրությունների համար» ծրագրի շրջանակում։ Ծրագիրն իրականացվում է Ժողովրդավարության զարգացման հիմնադրամի աջակցությամբ՝ որպես «Գործընկերություն հանուն ժողովրդավարության» նախաձեռնության մաս։ Բովանդակության համար պատասխանատվություն է կրում Հանրային լրագրության ակումբը, և պարտադիր չէ, որ այն արտահայտի Ժողովրդավարության զարգացման հիմնադրամի տեսակետները