Kijapuja 1146 скачать в хорошем качестве

Kijapuja 1146

थौं स्वन्ति नखःया मुख्यगु दिं अर्थात् किजापूजा । नेवाःतय् मन्दः दयेकाः उकिइ विधि कथं पूजा यानाः तःकेहेँपिन्सं दाजुकिजापिन्त पूजा याःगु दु । आम नेपाली समाजय् भाइटिका याइगु दिंकुन्हु नेवाःतय् किजापूजा यायेगु परम्परा दु । भाइटिका व किजापूजाय् तात्विक भिन्नता मदुसां पूजाविधि व प्राथमिकता पाःगु विज्ञतय् धापू दु । भाइटिकाय् भिंगु साइत कथं सिन्हः तिकेगुलिइ प्राथमिकता बियातःगु दुसा किजापूजाय् पन्चतत्वलिसे स्वायेगु ल्याखं विधि पूवंका पूजा यायेमाःगु परम्परा दुगु उमिगु तर्क दु । नेवाः बाहेकया मुख्ययानाः खस व ब्रम्हुतय् राष्ट्रिय पन्चांग निर्णायक विकास समितिं पितब्यूगु भिंगु साइत पियाः तःकेहेँपिन्सं दाजुकिजापिन्त सिन्हः तिकाबीगु खः । अझ सप्तरंगी सिन्हः धकाः ७ताजि सिन्हः अनिवार्य तिकेमाःगु चलन दु । तर नेवाःतय्गु सवालय् साइत मप्यूसें तिथि गणना यानाः विधि पूवंक तःकेहेँपिन्सं दाजुकिजापिन्त हे पूजा यानाः दीर्घागु, सुस्वास्थ्य व समृद्धिया कामना याइगु खः । नेवाःतय्सं सप्तरंगी सिन्हः धकाः तिकेम्वाः । बरु ताय्, धौ व ह्याउं सिन्हलय् जाकि ल्वाकछ्यानाः जाकि सिन्हः हे तिकी । सिन्हः जक तिकेगु मुख्यगु प्राथमिकता धाःसा मखु । तिथि निर्धारण व नखःचखः हनेगु नं बिस्कं पहः दु । थाय् कथं थ्व पहः नं पाः । नेवाःत धयापिं अनेकतादुने एकता लुइका च्वनापिं समुदाय खः । तिथि धयागु गुबलें तूत जुइसा गुबलें दोहरे जुइ । थ्व नियमित प्रक्रिया हे खः । अथेजुयाः नखःचखः हनेत साइत पिइम्वाः । सुथय् सुद्र्यो लुइबलय्या तिथि न्हिच्छियंक ल्याः खानाः नखःचखः हनेगु चलन दु । अथेजूगुलिं स्वन्ति नख मध्ये लक्ष्मीपूजा, म्हपूजा व किजापूजा झ्वःझ्वःलाक्क हनी । यमपन्चक धाःसां मुख्ययानाः स्वन्हुतक स्वन्ति नखः हनी । स्वन्हु तक हनीगु नखः जूगुलिं स्वन्ति नखः जूवंगु धाःपिं नं दु । अथेहे, स्वां उप्वः छ्यलीगु नखः जूगुलिं स्वन्ति जूवंगु तर्क नं दु । यमपन्चकया लिपांगु दिं कथं स्वीकार यानातःगु किजापूजाया नेवाः समाजय् विशेष महत्त्व दु । प्रत्येक दँ नेपाल संवत् तिथि कथं कछलाथ्व द्वितीयाकुन्हु तःकेहेँपिन्सं दाजुकिजापिन्त विधि पूवंक्क पूजा यानाः किजापूजा याइगु खः । श्रद्धा, आस्था व निष्ठानाप दीर्घायु, आरोग्य व ऐश्वर्य प्राप्तिया कामना यानाः परम्परा कथं किजापूजा याइ । तःकेहेँपिन्सं दाजुकिजापिन्त पूजा याइबलय् अखण्ड सौभाग्य व ऐश्वर्य चूलाइगु शास्त्रीय मान्यता दु । लक्ष्मीपूजाकुन्हु ढुकुटी स्वनातःगु पूजा क्वकयाः ग्वेँस्वांमाः व कचिका अनिवार्य रुपय् क्वखायेकेमाः । किजापूजा यायेगु झ्वलय् तःकेहेँपिन्सं दाजुकिजापिन्त ख्वःसिं, काजु, बरंनापया म्वःसि बिइ । नापनाप खेँय् सगं व धौ सगं न बिइ । अनलिं गच्छेकथं तःकेहेँपिन्त सौभाग्यया प्रतीक कापः व दक्षिणा बियाः सम्मान भाव प्वंकेमाःगु धार्मिक व सामाजिक परम्परा दु । किजापूजाया झ्वलय् मन्दः अनिवार्य सर्त खः । मन्दःयात मण्डला न धाः । सासः व स्यूचा छ्यलाः दकलें न्हापां शुद्ध यानाः बँ थिलाः उकिइ मन्दः दयेकीगु खः । गोलाक्क घेरादुने चिकं, प्वताय्, आखे, स्वां, हाकुमुस्या, ताय् आदिं ज्वलं छ्यलाः मन्दः दयेगु परम्परा दु । मन्दलं पवित्र वृत्ताकार संरचनायात इँगित याइ । थुकिया अर्थ सम्पूर्ण सृष्टि धइगु जुइ । नेवाः समाजय् मन्दःदुने द्यःया बास दइगु विश्वास दु । धार्मिक, तान्त्रिक, सांस्कृतिक व कलाया प्रतीक कथं मन्दः दयेकीगु खः । नेवाः समाजय् हिन्दु व बौद्ध परम्पराया ल्याखं निताजि मन्दः दयेकी । पूजा, होम, ध्यान, तान्त्रिक साधना, इहिपा, कयेतापूज, श्राद्ध, म्हपूजा व किजापूजाय् मन्दः दयेकेगु चलन दु । मन्दः दयेकेधुंकाः उकिया लिक्क खेलुइताः नं अनिवार्य च्याकी । थुकिं साधकयात एकाग्रता, आत्म–बोध व मोक्ष मार्गपाखे उन्मुख याइ धइगु विश्वास दु । मन्दलय् दयेकीगु वृत्तयात जीवनचक्रया प्रतीक भाःपिइ । जन्म, मृत्यु व पुनर्जन्म थुकिया निरन्तरता जुल । मन्दलय् चतुर्दिशां पृथ्वी, जल, वायु व अग्निया प्रतिनिधित्व याइ । अथेजुयाः नेवाः समाजय् किजापूजा याइबलय् सिन्हः तिकेगु स्वयां मन्दः दयेकाः द्यःयात आह्वान यानाः सृष्टिया सन्तुलन व आत्माशुद्धिया विधि पूरा यायेगु परम्परा दु ।