ປາຖະກະຖາ ບາງທັດສະນະຂອງສະຫາຍ ສີຈິ້ນຜິງ ກ່ຽວກັບວຽກງານແມ່ຍິງ скачать в хорошем качестве

ປາຖະກະຖາ ບາງທັດສະນະຂອງສະຫາຍ ສີຈິ້ນຜິງ ກ່ຽວກັບວຽກງານແມ່ຍິງ

ປາຖະກະຖາ ບາງທັດສະນະຂອງ ສະຫາຍ ສີຈິ້ນຜິງ ກ່ຽວກັບວຽກງານແມ່ຍິງ ຂປລ. ສູນກາງສະຫະພັນແມ່ຍິງລາວ ຮ່ວມກັບສະຖານທູດຈີນ ປະຈໍາລາວ ຈັດປາຖະກະຖາ ທັດສະນະທີ່ສຳຄັນກ່ຽວກັບວຽກງານແມ່ຍິງຂອງ ສະຫາຍ ສີຈິ້ນຜິງ ໂອກາດສະເຫລີມສະຫລອງວັນແມ່ຍິງສາກົນ ຄົບຮອບ 116 ປີ ໃນວັນທີ 10 ມີນາ 2026 ໂດຍການເປັນປະທານຂອງ ທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ (ສສຍລ), ທ່ານ ນາງ ຟາງ ຫົງ ເອກອັກຄະລັດຖະທູດຈີນ ປະຈໍາລາວ, ມີບັນດາການນຳເພດຍິງ, ຄອບຄົວການນຳ, ພ້ອມດ້ວຍ ສະມາຊິກສະຫະພັນແມ່ຍິງລາວ ເຂົ້າຮ່ວມ. ທ່ານ ນາງ ອາລີ ວົງໜໍ່ບຸນທໍາ ໄດ້ກ່າວວ່າ: ການປາຖະກະຖາຄັ້ງນີ້, ເປັນໜຶ່ງໃນກິດຈະກໍາສະ ເຫລີມສະຫລອງວັນແມ່ຍິງສາກົນ ພວກເຮົາຈະໄດ້ພ້ອມກັນຮຽນຮູ້ ທັດສະນະກ່ຽວກັບວຽກງານແມ່ ຍິງ ຂອງ ສະຫາຍ ສີຈິ້ນຜິງ ຊຶ່ງເປັນຫົວຂໍ້ທີ່ມີຄວາມໝາຍສໍາຄັນ ສໍາລັບເອື້ອຍນ້ອງແມ່ຍິງລາວ ໂດຍສະເພາະການນໍາເພດຍິງໃນແຕ່ລະຂັ້ນ ເພື່ອຈະໄດ້ນໍາເອົາບົດຮຽນໄປໝູນໃຊ້ເຂົ້າໃນວຽກງານຕົວຈິງຢ່າງ ເໝາະສົມ ຕໍ່ການພັດທະນາແມ່ຍິງລາວ ແລະ ຍັງເປັນການແລກປ່ຽນວັດທະນະທໍາ ທີ່ສວຍງາມ ແລະ ອຸດົມຮັ່ງມີຂອງຈີນ ທີ່ສະແດງອອກຜ່ານແມ່ຍິງ. ທ່ານ ນາງ ອາລີ ວົງໜໍ່ບຸນທໍາ ຍັງໃຫ້ຮູ້ອີກວ່າ: ໃນປີ 2026 ເປັນປີສະເຫລີມສະຫລອງສາຍພົວພັນການທູດ ຄົບຮອບ 65 ປີ ແລະ ເປັນປີມິດຕະພາບ ລາວ-ຈີນ. ສະເພາະ ສະຫະພັນແມ່ຍິງລາວ ແລະ ສະຫະພັນແມ່ຍິງຈີນ ໄດ້ມີການພົວພັນຮ່ວມມືຢ່າງເປັນປົກກະຕິ ໂດຍໄດ້ແລກປ່ຽນຂໍ້ມູນຂ່າວ ສານເຊິ່ງກັນ ແລະ ກັນກ່ຽວກັບວຽກງານການສົ່ງເສີມ ແລະ ພັດທະນາແມ່ຍິງ, ການກໍ່ສ້າງຊັບພະຍາ ກອນມະນຸດ, ການປົກປ້ອງສິດທິຂອງແມ່ຍິງ-ເດັກນ້ອຍ ແລະ ອື່ນໆ. ທ່ານ ນາງ ຟາງ ຫົງ ໄດ້ກ່າວວ່າ: ພາລະກິດຂອງແມ່ຍິງ ແມ່ນອົງປະກອບທີ່ສຳຄັນຂອງພັກ ແລະ ປະເທດຊາດ ເປັນສັນຍະລັກທີ່ສຳຄັນຂອງຄວາມກ້າວໜ້າຂອງອາລະຍະທຳມະນຸດ ແລະ ເປັນກຳລັງທີ່ຂາດບໍ່ໄດ້ໃນການພັດທະນາໂລກ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນ ເປັນຕົ້ນມາ ຄະນະກຳມະການສູນກາງພັກກອມມູນິດຈີນ ທີ່ມີ ສະຫາຍ ສີຈິ້ນຜິງ ເປັນແກນກາງ ໄດ້ໃຫ້ຄວາມສຳຄັນຕໍ່ວຽກງານຂອງແມ່ຍິງ ຈາກທັດສະນະໂດຍລວມຂອງການພັດທະ ນາພັກ ແລະ ປະເທດ ໄດ້ຈັດແຈງວຽກງານຂອງແມ່ຍິງ, ສົ່ງເສີມການໃຊ້ສິດທິປະຊາທິປະໄຕ ຢ່າງເທົ່າທຽມກັນຂອງແມ່ຍິງຕາມກົດໝາຍ, ການມີສ່ວນຮ່ວມຢ່າງເທົ່າທຽມກັນ ໃນການພັດທະນາເສດຖະ ກິດ-ສັງຄົມ ແລະ ການຊົມໃຊ້ໝາກຜົນຂອງການປະຕິຮູບ ແລະ ການພັດທະນາຢ່າງເທົ່າທຽມກັນ. ນອກຈາກນີ້, ລັດຖະບານຈີນ ຍັງເລັ່ງແກ້ໄຂບັນຫາຄວາມທຸກຍາກ ໂດຍມີເປົ້າໝາຍເຮັດໃຫ້ແມ່ຍິງສາມາດຊອກຫາວຽກເຮັດງານທຳ ຢູ່ໃກ້ບ້ານຂອງເຂົາເຈົ້າ ດ້ວຍການສະໜັບສະໜູນນະໂຍບາຍຕ່າງໆ ຊຶ່ງມີແມ່ຍິງ 8,7 ລ້ານຄົນ ໄດ້ເລີ່ມຕົ້ນທຸລະກິດຂອງຕົນເອງ ສາມາດເພີ່ມລາຍໄດ້ໃຫ້ເຂົາເຈົ້າ. ທ່ານ ນາງ ຟາງ ຫົງ ຍັງໃຫ້ຮູ້ອີກວ່າ: ຈີນ ແລະ ລາວ ລ້ວນແຕ່ຍຶດໝັ້ນເອົາ ປະຊາຊົນເປັນສູນກາງ ລວມທັງສິດສະເໝີພາບລະຫວ່າງຍິງ-ຊາຍ ເຂົ້າໃນລະບົບຂອງປະເທດຊາດ ເພື່ອຮັບປະກັນສິດທິຂອງແມ່ຍິງຢ່າງເຕັມທີ່ ແລະ ສະໜັບສະໜູນການມີສ່ວນຮ່ວມຂອງແມ່ຍິງ ໃນທຸກຂົງເຂດ, ການເພີ່ມທະວີການແລກປ່ຽນ ແລະ ການຮ່ວມມືໃນຂົງເຂດ ວຽກງານແມ່ຍິງລະຫວ່າງຈີນ ແລະ ລາວ ເປັນອົງປະກອບທີ່ສຳຄັນ ຂອງມິດຕະພາບລະຫວ່າງ ສອງປະເທດ ແລະ ເປັນກຳລັງທີ່ສຳຄັນໃນການສົ່ງເສີມການພັດທະນາຮ່ວມກັນ. ຂ່າວ: ກິດຕາ ພາບ: ເກດສະໜາ