Marié du Toit - Geel madeliefies скачать в хорошем качестве

Marié du Toit - Geel madeliefies

Marié du Toit is op 9 Mei 1967 in White Plains, New York, in die VSA gebore. Weens die aard van haar pa se werk het die gesin wêreld wyd gereis, en was sy vyf jaar oud toe sy Suid-Afrika vir die eerste keer gesien het. Sy het grootgeword in Amerika, Suid-Afrika, Australië en uiteindelik in Duitsland, waar sy in 1984 in Bonn as die beste toneelspeler en sanger in haar skool aangewys is. Sy het ook matriek hier voltooi. Met haar terugkeer na Suid-Afrika in 1986 het sy by die Universiteit van Pretoria ingeskryf vir die graad BA Drama, en het kort hierna haar talente in verskillende musiek- en drama produksies ingespan. Sy was saam met Jannie du Toit en Christa Steyn betrokke by “Kerslig, Vers en Melodie”, en in 1989 het sy die televisie talentkompetisie “Debuut” gewen met Louis van Rensburg se liedjie “Hier By Jou” en Christa Steyn se “Geel Madeliefies”. Hierna het sy haar energie hoofsaaklik op die toneelwêreld en op kabaret gefokus en het deelgeneem aan “Skadu's teen die muur - 'n tribuut aan Koos du Plessis” wat in 1993 ook in België en Nederland opgevoer is. Sy het rolle vertolk in vele opvoerings oor die jare, insluitend die Duitse kabaret stuk “Brecht Eisler” waarmee sy in 1994 baie aandag getrek het op die kunstefees in Grahamstad. In 1990 het sy haar eerste langspeelplaat, “Hier Is Ek”, en in 1997 haar eerste gospel album, “Op Pad”, uitgereik, en het hierna verskeie geestelike produksies op die planke gebring, onder andere haar een-vrou kabaret “Op Pad Sonder Bagasie”. In 2002 het Marié by die BybelMedia produksiespan aangesluit as spelleier vir die produksie “No More Tears” wat in Zimbabwe opgeneem is, en was sy ook later programkoördineerder vir CNW se program “Soeklig Gastehuis”, waarvoor sy vir een van haar episodes ‘n Voorligter-toekenning ontvang het. Sy het hierna hoofsaaklik gefokus op die aanbied van klasse in dramakuns- en sangopleiding by verskeie skole in Pretoria en Kaapstad, terwyl sy ook enkele verskynings in episodes van die televisie sepie “7de Laan” gemaak het. In 2015 het sy haar stem geleen aan Tumi die tiertjie, ‘n “pratende” sagte speelding wat deur welsynswerkers en terapeute gebruik word om getraumatiseerde kinders gerus te stel, en het sy ook betrokke geraak by gemeenskapsprojekte om bewustheid by die publiek te kweek oor gehoorverlies en verskeie geestestoestande. Marié het tot aan die einde van 2020 in Kaapstad gewoon voordat sy na die VSA verhuis het om naby haar seuns te wees. Sy woon deesdae in Los Angeles waar sy as kunstenaar en diens werker by aftree-gemeenskappe betrokke is. Hierdie liedjie is in 1990 op die album "Hier Is Ek" vrygestel.