နံရံပေါ်မှာ သွေးစီးကြောင်းတွေနဲ့ ဟိုတယ်ကြီး - Amber Court - Scary Sunday скачать в хорошем качестве

နံရံပေါ်မှာ သွေးစီးကြောင်းတွေနဲ့ ဟိုတယ်ကြီး - Amber Court - Scary Sunday

စဉ်းစားကြည့်ရအောင်နော်။ မြို့ပြနဲ့ ဝေးလံခေါင်သီတဲ့ တောတောင်တွေကြားထဲမှာ မြူခိုးတွေ အုံ့ဆိုင်းနေတဲ့ ပတ်ဝန်းကျင်ကြားမှာ အနီရောင် သွေးစီးချောင်းတွေ အကြောင်းလိုက် စွန်းထင်းနေသလိုမျိုး ခြောက်ခြားစရာ အသွင်အပြင်နဲ့ အဆောက်အဦးကြီးတစ်ခုက မလေးရှားက နာမည်ကြီး ဟော်တယ်တစ်ခုဆိုရင် ဘယ်လို ခံစားရမလဲ? ဒီနေရာက အပြင်မှာ တကယ်ရှိတဲ့ Amber Court ဟော်တယ်ဖြစ်ပြီး မလေးရှားမှာ ခြောက်ခြားစရာအကောင်းဆုံး နေရာတစ်ခုလို့ ပြောစမှတ်ပြုကြပါတယ်။ ဒီဟော်တယ်နဲ့ ပတ်သက်တဲ့ နာမည်ကြီး သတင်းတွေက ဟုတ်မှန်မှုရှိမရှိနဲ့ ဘာကြောင့် ကြောက်စရာ အကောင်းဆုံးလို့ လူတွေက ပြောကြတာလဲဆိုတာကို ဒီနေ့ Scary Sunday အစီအစဉ်ကနေ တင်ဆက်ပေးချင်ပါတယ်။ အားလုံးပဲ မင်္ဂလာပါခင်ဗျာ။ ကျွန်တော်တို့ Story Bears ပုံပြင်ပြောသောဝက်ဝံများ Youtube Channel ကနေပြီးတော့ ကြိုဆိုလိုက်ပါတယ်။ ကျွန်တော်ကတော့ Polar Bear ဖြစ်ပါတယ်။ Genting Highland အပန်းဖြေစခန်းကို ကျော်လွန်ပြီး နာရီဝက်လောက် တောတောင်လျှိုမြှောင်တွေကို ကျော်ဖြတ်ပြီး ကားမောင်းလာခဲ့မယ်ဆိုရင် မြူတွေ အုံ့ဆိုင်းနေတဲ့ကြားမှာ တိတ်ဆိတ်ငြိမ်သက်နေတဲ့ Amber Court Hotel အဆောက်အဦးက ဆီးလို့ ကြိုနေမှာ ဖြစ်ပါတယ်။ ဒီနေရာကနေ လှမ်းကြည့်မယ်ဆိုရင် အရင်တစ်ပတ်က ပြောခဲ့တဲ့ First World Hotel နဲ့ Genting Higland အပန်းဖြေစခန်းကို နီးနီးလေးလိုမျိုး မြင်ရမှာ ဖြစ်ပေမယ့် ကားမောင်းကြည့်ရင်တော့ တော်တော် မောင်းရတာ ဖြစ်ပါတယ်။ အထပ် ၂၃ ထပ်ရှိတဲ့ ဒီအဆောက်အဦးကြီးဟာ ဆေးသားတွေ ပြယ်လွင့်နေသလို အနီရောင် အစွန်းအထင်းတွေက တိုက်နံရံပေါ်မှာ အကြောင်းလိုက် ဖြစ်နေတာက သွေးစီးကြောင်းတွေနဲ့ တူတယ်လို့တောင် ခံစားရစေမှာ ဖြစ်ပါတယ်။ တကယ့်ကို ရုပ်ရှင်တွေထဲကလိုမျိုး ကြောက်စရာ ခြောက်ခြားစရာ အသွင်အပြင်ကို ဆောင်နေတယ်ဆိုတာ လူတော်တော်များများက ငြင်းကြမယ်မထင်ပါဘူး။ အခုလိုမျိုး ကြောက်စရာ အသွင်အပြင်နဲ့ လူသိများတဲ့ Amber Court Hotel အကြောင်းကို Youtube မှာ ရှာကြည့်မယ်ဆိုရင် အများကြီးတွေ့ရမှာ ဖြစ်သလို မလေးရှားရဲ့ ခြောက်ခြားစရာအကောင်းဆုံး ဟိုတယ်ဆိုပြီး တင်စားခေါ်ဝေါ်ကြတာတွေ ရှိပါတယ်။ ပြီးတော့ ၂၀၁၂ ခုနှစ်က ထွက်ရှိခဲ့တဲ့ Haunted Hotel ဆိုတဲ့ ဇာတ်ကား ရိုက်ကူးခဲ့တဲ့နေရာကလည်း ဒီနေရာဖြစ်နေတော့ လူတွေရဲ့ စိတ်ထဲမှာ ဒီနေရာကို တကယ်ပဲ သရဲခြောက်တဲ့ နေရာ တစ်ခုလို့ ထင်နေတာလည်း မဆန်းပါဘူး။ ဒါပေမယ့် ဒီနေရာက တကယ်တော့ အရင်တုန်းက လူတွေနေဖို့ အဆင့်မြင့် တိုက်ခန်းတွေနဲ့ ဟော်တယ်ပါ ထည့်သွင်းတည်ဆောက်ထားတဲ့ စီမံကိန်းတစ်ခုအနေနဲ့ ၁၉၉၀ ခုနှစ်တွေမှာ စတင်ခဲ့တာ ဖြစ်ပါတယ်။ တကယ်ဒါပေမယ့် လူနေခွင့်ရပြီဆိုတဲ့ အချိန်လောက်ကစပြီးတော့ ခြောက်လှန့်မှုတွေ ရှိနေတယ်ဆိုတဲ့ အပြောတွေက ရှိနေခဲ့တာ ဖြစ်ပါတယ်။ စီမံကိန်း ပြီးစီးသွားခဲ့သည့်တိုင် ရည်မှန်းထားသလိုမျိုး အဆင့်မြင့် လူသူနေထိုင်မှုနဲ့ စီးပွားရေးအခြေအနေတွေက ဖြစ်မလာခဲ့ပါဘူး။ နောက်ပိုင်းမှာတော့ လူသူနေထိုင်မှုတွေလည်း တစစ လျော့နည်းသွားခဲ့ပြီး ခြောက်ခြားစရာ နေရာတစ်ခုအဖြစ် တစတစ အသွင်ပြောင်းသွားခဲ့တာ ဖြစ်ပါတယ်။ ဒီ Amber Court နေရာမှာ နေထိုင်ဖူးခဲ့ကြတဲ့သူတွေ သွားရောက်ခဲ့ကြတဲ့ သူတွေရဲ့ အတွေ့အကြုံတွေကို နည်းနည်းလောက် ဝေမျှပေးချင်ပါတယ်။ အဖြစ်အပျက် အမှတ် ၁ - လူမနေတဲ့ အပေါ်ထပ်က ကြားရတဲ့ အသံဗလံတွေ ဒီအကြောင်းကို ဝေမျှထားတဲ့ လူကတော့ သူငယ်တုန်းက Amber Court အဆောက်အဦးမှာ သူ့ မိဘပိုင် တိုက်ခန်းတစ်ခန်းရှိခဲ့ဖူးတယ်။ အဲ့ဒီတုန်းက 1996-97 ခုနှစ်လောက် ဖြစ်မယ်ထင်တယ်။ သူ့အသက်က ဆယ်နှစ်ပဲ ရှိသေးတာပေါ့လေ။ သူတို့ မိသားစုက ၆ ယောက်ဆိုလား ရှိတယ်တဲ့။ အားလပ်ရပ်တွေ ရုံးပိတ်ရက်တွေမှာ သူနဲ့ သူ့မိသားစုဝင်တွေက ဒီနေရာမှာ ရှိတဲ့ တိုက်ခန်းမှာ လာနေလေ့ရှိကြတယ်။ သူ့ကောင်းကောင်းကြီး မှတ်မိတာတစ်ခုက ဒီနေရာက အရမ်းအေးပြီး အုံ့မှိုင်းနေတဲ့ ရာသီဥတုရှိတော့ သူတို့မိသားစုတွေအနေနဲ့ ပြတင်းတံခါးကို ဘယ်တော့မှ ဖွင့်ထားလေ့ မရှိဘူးတဲ့။ ဒါပေမယ့်လည်း သူတို့တွေ အပြင်သွားပြီး ညနေစာ စားပြီး ပြန်လာပြီဆိုရင် အခန်းထဲက ပြတင်းပေါက်တွေက ပွင့်ပွင့်နေတတ်တာကို သတိထားမိတယ်ပေါ့။ နောက် ည ည တွေမှာဆိုရင် အိပ်ခန်းထဲ ခြေသံ တဖျပ်ဖျပ်ကြားရလေ့ရှိသလို အခန်းထဲက ပရိဘောဂ ပစ္စည်းတွေကို ရွှေ့နေတဲ့ အသံမျိုးတွေကိုလည်း အမြဲတစေ ကြားရလေ့ ရှိတယ်လို့ ဆိုပါတယ်။ အဲ့ဒီအတွက် ကလေးတွေက ကြောက်လို့ဆိုပြီး မိဘတွေရော ကလေးတွေရော အကုန်လုံး ဧည့်ခန်းထဲ စုအိပ်ခဲ့ကြရတယ်လို့ ဆိုပါတယ်။ ဒါပေမယ့်လည်း အဲ့ဒီအသံတွေက တိုးမသွားတဲ့အပြင် ပိုပိုကျယ်လာတဲ့အပြင် အပေါ်ကနေပါ တဒုန်းဒုန်း ထုရိုက်နေတဲ့အသံမျိုးတွေ ကြားရတဲ့အထိ ဖြစ်လာတယ်။ ကလေးဖြစ်တဲ့ သူကတော့ အပေါ်ထပ်မှာ ဒါ သရဲတွေ သောင်းကျန်းနေတာပဲ ဖြစ်မယ်ဆိုပြီး တထစ်ချ တွေးထင်ထားခဲ့တာပေါ့။ အဲ့ဒါကို သူ့အဖေက မဟုတ်သေးပါဘူးဆိုပြီး မိသားစု အကုန်လုံးကို ခေါ်ပြီး အပေါ်ထပ် သွားပြီး မေးမယ်ဆိုပြီး လုပ်ခဲ့တယ်တဲ့။ အဲဒါနဲ့ အပေါ်ထပ်ကို ရောက်သွားတဲ့အခါမှာ သူတို့အခန်း အပေါ်တစ်ထပ်လုံးက လူတစ်ယောက်မှ မရှိ မနေတဲ့ အထပ်ဖြစ်နေတာကို သိလိုက်ရတယ်လို့ ဆိုပါတယ်။ #myanmar #storybears #storybearsmm #သရဲ #တစ္ဆေ