Zomin tumanida zamonaviy sanoat mikromarkazi ishga tushirildi скачать в хорошем качестве

Zomin tumanida zamonaviy sanoat mikromarkazi ishga tushirildi

O‘zbekiston Respublikasi Prezidentining 2022-yil 25-iyuldagi “Mahallalarda sanoat, hunarmandchilik, kasanachilik va chorvachilik mikromarkazlarini tashkil etish chora-tadbirlari to‘g‘risida”gi PQ–331-son qarori ijrosini ta’minlash maqsadida Zomin tumani Bunyodkor mahallasida zamonaviy sanoat mikromarkazi barpo etilib, foydalanishga topshirildi. Mazkur loyiha “Zarbdor tajribasi” asosida amalga oshirilib, respublika budjetidan ajratilgan 440,8 million so‘m mablag‘ evaziga mikromarkaz infratuzilmasi to‘liq shakllantirildi. Xususan, hududda 0,5 kilometr uzunlikdagi asfalt yo‘l qurildi hamda yangi transformator o‘rnatilib, elektr ta’minoti yaxshilandi. Loyiha doirasida 10 ta yangi tadbirkorlik subyekti tashkil etilib, 5 nafar tadbirkorning faoliyati kengaytirildi. Natijada 50 nafardan ortiq yangi ish o‘rinlari yaratildi. Ajratilgan mablag‘lar to‘liq o‘zlashtirilib, qurilish va obodonlashtirish ishlari sifatli va belgilangan muddatlarda yakuniga yetkazildi. Mikromarkazning tantanali ochilish marosimi Navro‘z bayrami arafasida Dashtobod shaharchasida yuqori saviyada tashkil etildi. Unda tuman hokimining birinchi o‘rinbosari Zarifjon Omonqulov, “Nuroniy” jamg‘armasi tuman bo‘limi raisi O‘. Oqqulov, O‘zbekiston Mahallalar uyushmasi tuman bo‘limi boshlig‘i S. Parmanov, Xalq deputatlari tuman Kengashi kotibiyati mudiri Muhammadi G‘oibnazarov, tuman hokimligi mas’ullari, mahalla faollari hamda keng jamoatchilik vakillari ishtirok etdilar. Bugungi kunda mazkur mikromarkaz hududida turli yo‘nalishlarda ishlab chiqarish va xizmat ko‘rsatish faoliyatlari yo‘lga qo‘yilgan. Jumladan, qurilish materiallari savdosi, tikuvchilik, sartaroshlik xizmatlari, shlakoblok ishlab chiqarish, metall buyumlar va temir darvozalar tayyorlash, qandolatchilik hamda boshqa xizmat ko‘rsatish yo‘nalishlari faoliyat yuritmoqda. Mazkur mikromarkazning ishga tushirilishi, eng avvalo, aholi, ayniqsa, yoshlar bandligini ta’minlash, yangi ish o‘rinlari yaratish, aholiga qulay va sifatli xizmatlar ko‘rsatish hamda hududning iqtisodiy salohiyatini yanada oshirishga xizmat qiladi. Shu bilan birga, bu kabi loyihalar tadbirkorlikni rivojlantirish, aholi daromadlarini ko‘paytirish va farovon turmush tarzini shakllantirishda muhim omil bo‘lib xizmat qilmoqda. Zomin tumanida amalga oshirilayotgan mazkur tashabbuslar yurtimizda olib borilayotgan keng ko‘lamli islohotlarning amaliy ifodasi bo‘lib, mahallalarda ishlab chiqarish infratuzilmasini rivojlantirish, aholi bandligini ta’minlash va turmush darajasini izchil oshirishga xizmat qilmoqda.