MANU Y'UMUNSI: 331. IYEREKWA RYO MU KIBAYA скачать в хорошем качестве

MANU Y'UMUNSI: 331. IYEREKWA RYO MU KIBAYA

IYEREKWA RYO MU KIBAYA 2 Ngom 12:14 "Ariko yarakiranirwaga, kuko atagiraga umwete wo gushaka Uwiteka." Iyerekwa riva ku Mana risaba gushaka mu maso hayo. Ntabwo ihishurirwa ry'Imana riza ku muntu udashaka mu maso hayo. Nk'umuntu ufite umurimo wo kuyobora abandi mu nzu y'Imana, ni ngombwa kuyoboza Imana inzira, ukagira iyerekwa ry'umugambi wayo n'ubushake bwayo ku bantu bayo, ndetse n'inzira bakwiye kunyuramo kugirango bagere ku mugambi wayo. Mose yahawe iyerekwa ari ku musozi asenga, ariko hari n'abandi bayobora bagira amayerekwa ariko atari ayo ku musozi, ahubwo akomotse ahandi. Imana yaremye umuntu ari ikiremwa gifite ubwenge. Kubw'iyo mpamvu, hari byinshi bikorwa bivuye mu bwenge bw'abantu ariko bitavuye mu bw'Imana. S'ibyo gusa kandi, kuko n'umubi nawe abasha kuduha ibitekerezo bihabanye n'ubushake bw'Imana, tukagira intumbero zitavuye kuri Yo. Ijambo ry'Imana ritubwira ko umwami Dawidi igihe kimwe yungutse igitekerezo cyo kubara Abisirayeli, ariko agihawe na Satani. “Bukeye Satani ahagurukira Abisirayeli, yoshya Dawidi kubara Abisirayeli. Dawidi abwira Yowabu n'abatware b'abantu ati “Nimugende mubare Abisirayeli, uhereye i Bērisheba ukageza i Dani, maze muze mumbwire kugira ngo menye umubare wabo.” (1Ngom 21:1-2). Yowabu yagerageje kumubuza ariko ijambo ry'umwami riramuganza. Akenshi iyerekwa ritavuye ku Mana rijyana no gutwaza abantu igitugu no kutemera kugirwa inama n'abandi. Iyo iyerekwa ry'umuyobozi ryavuye ku mubi, amutera kugira umutima unangiwe kandi w'ubwibone, utemera guhugurwa cg kugirwa inama. Bamaze kubara Abisirayeli, Uwiteka yarabirakariye. "Maze Imana irabirakarira, ni cyo cyatumye itera Abisirayeli. ...Nuko Uwiteka ateza Isirayeli mugiga. Mu Isirayeli hapfamo abagabo inzovu ndwi." (1Ngom 21:7,14). Izo ni zo ngaruka zo kuyobora abantu n'iyerekwa ryavuye ku mubi, bibazanamo akaga. Hari amatorero menshi yagiye asenyuka, intambara zikarota muri yo, biturutse ku migambi, imishinga n'intumbero by'abayobozi bitakomotse k'Uwiteka Imana. Impamvu yabyo akenshi, n'uko baba bategera Imana ngo bashake mu maso hayo, bagire iyerekwa rivuye kuri yo, maze umwanzi akabona icyuho mu bitekerezo byabo no mu buzima bwabo. Rehobowamu yari umwami w'abayuda ariko Ijambo ry'Imana ritubwira ko yakiranirwaga kuko atagiraga umwete wo gushaka Uwiteka (2 Ngom 12:14). Kutagira umwete wo gushaka Uwiteka byateye icyuho gikomeye cyo gukiranirwa mu mibereho ye kandi ayoboye ubwoko bw'Imana. Uko ni ko abayobora benshi mu nzu y'Imana baba ibikoresho by'umubi mu murimo, bikawudindiza kandi bikarimbuza ubugingo bwa benshi kubwo kutagira umwete wo gushaka Uwiteka. Kuyobora ni umurimo ukomeye kandi w'ingenzi cyane, udakwiye gukorwa n'abanyamwetemuke cg abanebwe. Umwanzi aba agenzura cyane ahari icyuho mu bungeri, ngo ababibemo ibitekerezo n'amayerekwa ahabanye n'ubushake bw'Imana. Niyo mpamvu ubwo Pawulo yasezeraga ku bakuru b'itorero ryo muri Efeso yababuriye ko bamwe muri bo bashobora kuzahinduka amasega nibataba maso. "Mwirinde ubwanyu, murinde n'umukumbi wose Umwuka Wera yabashyiriyeho kuba abarinzi, kugira ngo muragire Itorero ry'Imana, iryo yaguze amaraso yayo. Nzi yuko nimara kuvaho, amasega aryana azabinjiramo ntababarire umukumbi. Kandi muri mwe ubwanyu hazaduka abantu bavugira ibigoramye, kugira ngo bakururire abigishwa inyuma yabo." (Intu 20:28-30). Ni cyo gituma abungeri benshi n'iki gihe, babaye ibirura. Ni igihe Uwiteka akeneye abungeri bashaka mu maso he, bakayoboza iyerekwa yabahaye. Dusenge: "Mwami Yesu hagurutsa abungeri bashaka mu maso hawe bakayoboza iyerekwa wabahaye, mu izina ryawe Yesu, Amen."