အီရန်စစ်ပွဲကို အမေရိကန်စွန့်ခွာမယ်၊ ကလေးစစ်သားသုံးနေတယ်လို့အီရန်စွပ်စွဲခံရ | People's Spring скачать в хорошем качестве

အီရန်စစ်ပွဲကို အမေရိကန်စွန့်ခွာမယ်၊ ကလေးစစ်သားသုံးနေတယ်လို့အီရန်စွပ်စွဲခံရ | People's Spring

နှစ်ပတ်သုံးပတ်အတွင်း အီရန်စစ်ပွဲကို အမေရိကန် စွန့်ခွာတော့မယ်လို့ ထရမ့်ပြော   ဧပြီ ၁၊ ၂၀၂၆။ People’s Spring   သဘောတူညီမှု တစ်ခုခု ရသည်ဖြစ်စေ၊ မရသည်ဖြစ်စေ နောက်ထပ် နှစ်ပတ်၊ သုံးပတ်လောက် အကြာမှာ အမေရိကန်ဟာ လက်ရှိ စစ်ဆင်ရေးတွေ ဆင်နွှဲနေတဲ့ အီရန်ကို စွန့်ခွာမယ်လို့ အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။   အီရန်မှာ ဘာမှ ဆက်လုပ်စရာ မရှိတော့တဲ့အခါ အမေရိကန်ကလည်း ထွက်ခွာသွားမှာ ဖြစ်တယ်လို့ ထရမ့်က မတ်လ ၃၁ ရက်နေ့က အိမ်ဖြူတော်မှာ သတင်းထောက်တွေကို ပြောကြားခဲ့ပါတယ်။   အမေရိကန်နဲ့ အစ္စရေးတို့ ပူးပေါင်းတိုက်ခိုက်မှုနဲ့အတူ စတင်လာခဲ့တဲ့ အီရန်စစ်ပွဲကြောင့် ကမ္ဘာ့ ရေနံစျေးတွေ မြင့်တက်နေတာနဲ့ ပတ်သက်ပြီး မေးမြန်းတဲ့အခါ အဲဒီအတွက် သူလုပ်ဖို့လိုတာက အီရန်ကနေ အမေရိကန် ပြန်ထွက်ခွာစေဖို့သာ ဖြစ်ကြောင်း၊ ဒီကိစ္စကိုလည်း သိပ်မကြာခင် လုပ်မှာဖြစ်ကြောင်း၊ အဲဒီအခါ စျေးတွေက  ပြန်ကျလာမှာဖြစ်ကြောင်း ထရမ့်က ပြန်ဖြေခဲ့ပါတယ်။   အီရန်မှာ ကြာညောင်းတဲ့ စစ်ဆင်ရေးမျိုး ဆင်နွှဲတာက စွမ်းအင်စျေးကွက်အပေါ် ကြီးမားတဲ့ ထိခိုက်သက်ရောက်မှုတွေ ဖြစ်ပေါ်စေနိုင်ကြောင်း စိုးရိမ်တကြီး ထောက်ပြမှုတွေကြောင့် ထရမ့်အတွက်လည်း ဖိအားတွေ ရှိနေပါတယ်။ ထရမ့်က အမေရိကန်နဲ့ အီရန်တို့ဟာ နောက်ကွယ်မှာ ဆွေးနွေးမှုတွေ ဆက်ရှိနေပြီး သဘောတူညီမှု တစ်ခုခု ရမယ်ဆိုရင်တော့ စစ်ပွဲလည်း မြန်မြန်ပြီးလိမ့်မယ်လို့ ပြောပါတယ်။   အီရန်က သဘောတူညီမှု တစ်ခုခုကို ရချင်နေတာကြောင့် အဲဒီကိစ္စ အထမြောက်လာဖို့ ဖြစ်နိုင်ခြေ ရှိကြောင်း၊ သူ့ထက်တောင်မှ သဘောတူညီမှု တစ်ခုကို အီရန်က လိုလားနေကြောင်းလည်း ထရမ့်က ဆိုပါတယ်။   အမေရိကန် အတွက်ကတော့ အီရန်မှာ ဆင်နွှဲခဲ့တဲ့ စစ်ဆင်ရေးရဲ့ မူလရည်ရွယ်ချက်ဖြစ်တဲ့ နျူကလီးယား လက်နက်တွေ တည်ဆောက်ရေး စွမ်းရည်ကို အပြီးတိုင် ဖျက်ဆီးဖို့ ဆိုတာကို အထမြောက်အောင် ဆောင်ရွက်နိုင်ခဲ့ပြီ ဖြစ်ကြောင်း၊ ဒီတော့ စစ်ဆင်ရေးတွေကို လက်စသတ်လို့ ရနေပြီဖြစ်ကြောင်း ထရမ့်က ပြောဆိုခဲ့ပါတယ်။ အီရန် ခေါင်းဆောင်တွေက သဘောတူညီမှု တစ်ခုခု ရဖို့ အသည်းအသန် တောင်းဆိုနေတယ်လို့ သူက ပြောပေမယ့် တကယ်လို့ သဘောတူညီမှု မရဘူး ဆိုရင်လည်းပဲ စစ်ပွဲက ရပ်ဆိုင်းသွားနိုင်ခြေ ရှိနေကြောင်း သူက မှတ်ချက်ပေးခဲ့ပါတယ်။   ပြင်သစ်၊ ဒါမှမဟုတ် တခြားနိုင်ငံ တစ်ခုခုက ရေနံနဲ့ ဓာတ်ငွေ့တွေ လိုချင်တယ်ဆိုရင် ဟောမုဇ် ရေလက်ကြားကို ဖြတ်ပြီး သယ်ယူရမှာ ဖြစ်ကြောင်း၊ အဲဒီနိုင်ငံတွေက ကိုယ့်အန္တရာယ်ကိုယ် ကာကွယ်နိုင်စွမ်းလည်း ရှိနေကြောင်း ထရမ့်က မှတ်ချက်ပေးသွားပါတယ်။   အီရန်အစိုးရကတော့ သူတို့သတ်မှတ်တဲ့ ဥပဒေသစ်တွေကို လေးစားလိုက်နာတဲ့ နိုင်ငံတွေရဲ့ သင်္ဘောတွေကို ဟောမုဇ် ရေလက်ကြား ဖြတ်သန်းဖို့ ပြန်လည် ခွင့်ပြုပေးမယ်လို့ ပြောထားပါတယ်။ အီရန်ဟာ ကမ္ဘာ့ရေနံနဲ့ဓာတ်ငွေ့ တင်ပို့မှုမှာ အရေးအပါဆုံး ရေလမ်းကြောင်း တစ်ခုဖြစ်တဲ့ ဟောမုဇ်ကို စစ်ပွဲစတင်ပြီး မကြာခင်မှာပဲ ပိတ်ချထားခဲ့တာ ဖြစ်ပါတယ်။   ကိုးကား: BBC ===== ကလေးစစ်သားတွေကို အီရန် အသုံးပြုနေကြောင်း စွပ်စွဲမှုတွေ ထွက်ပေါ်လာ   ဧပြီ ၁၊ ၂၀၂၆။ People’s Spring   အီရန်ဟာ ကလေးစစ်သားတွေကို အသုံးပြုနေတယ်ဆိုတဲ့ စွပ်စွဲချက်တွေ ထွက်ပေါ်လာခဲ့ပါတယ်။   တဟီရန်မြို့တော်မှာ ဖခင်ဖြစ်သူနဲ့အတူ လုံခြုံရေးဂိတ် တစ်ခုကို စောင့်ကြပ်ပေးနေတဲ့ အသက် ၁၁ နှစ်အရွယ် အီရန် ကလေးငယ်တစ်ဦးဟာ အမေရိကန်နဲ့ အစ္စရေးတို့ရဲ့ လေကြောင်းတိုက်ခိုက်မှုအတွင်း သေဆုံးသွားတဲ့နောက် အီရန်က ကလေးတွေကိုပါ စစ်မှုထမ်းဖို့ အသုံးချနေတယ်ဆိုတဲ့ ကိစ္စအပေါ် အာရုံစိုက်မှုတွေ မြင့်တက်လာတာ ဖြစ်ပါတယ်။   အီရန်ဟာ အသက်မပြည့်သေးတဲ့ ကလေးစစ်သားတွေကို လုံခြုံရေး စောင့်ကြပ်စေတဲ့ တာဝန်မျိုးတွေအတွက် အသုံးပြုနေကြောင်း သတင်းတွေ ထွက်ပေါ်နေသလို မျက်မြင်သက်သေ ထွက်ချက်တွေလည်း ရှိနေကြောင်း သိရပါတယ်။   အလီရာဇာ ဂျာဖာရီဟာ ဖခင်နဲ့အတူ ဘာဆက်ဂျ် စေတနာ့ဝန်ထမ်း ပြည်သူ့စစ်အဖွဲ့မှာ ပါဝင်ခဲ့ကြပြီး မတ်လ ၁၁ ရက်နေ့မှာ သေဆုံးခဲ့တာလို့ ဂျာဖာရီရဲ့ မိခင် မွန်ဖာရက်ဒ်က ပြောကြားခဲ့ပါတယ်။ ဘာဆက်ဂျ်ဟာ အီရန်အစိုးရကို လိုလားပြီး ကင်းလှည့်မှုနဲ့ လုံခြုံရေး စောင့်ကြပ်ပေးမှုတွေကို အဓိက တာဝန်ယူလေ့ရှိတဲ့ စစ်ရေးယူနစ် တစ်ခုပါ။   ပြီးခဲ့တဲ့ သီတင်းပတ်တုန်းက အီရန်ရဲ့ အစ္စလာမ်မစ် တော်လှန်ရေး အစောင့်တပ် (IRGC) အရာရှိ တစ်ဦးက IRGCဟာ အသက် ၁၂ နှစ်နဲ့အထက် အရွယ်တွေ ဆန္ဒအလျောက် စစ်မှုထမ်းချင်ရင် ခွင့်ပြုသွားမယ်လို့ အစိုးရနဲ့ တစ်စိတ်တစ်ပိုင်း ဆက်နွှယ်တဲ့ Fars သတင်းဌာနဆီကို ပြောကြားခဲ့ပါတယ်။   ပြီးတော့ တဟီရန်နဲ့ တခြားမြို့ကြီးတွေမှာလည်း လုံခြုံရေး တာဝန်ယူထားတဲ့ ကလေးတွေကို တွေ့ခဲ့ဖူးကြောင်း မျက်မြင်တွေက BBC သတင်းဌာနကို အသိပေးခဲ့ပါတယ်။ တချို့ကလေးတွေက လက်နက်ပါ ကိုင်ထားတယ်လို့ ဆိုပါတယ်။   လူ့အခွင့်အရေး စောင့်ကြည့်အဖွဲ့ (HRW)ကတော့ အသက် ၁၅ နှစ်အောက် ကလေးတွေကို လက်နက်ကိုင် ပဋိပက္ခတွေထဲမှာ အသုံးချခြင်းဟာ ဆိုးရွားလှတဲ့ စစ်ရာဇဝတ်မှုနဲ့ ကလေးသူငယ် အခွင့်အရေး ချိုးဖောက်မှုမျိုး ဖြစ်တယ်လို့ စွပ်စွဲ ပြောကြားထားပါတယ်။   ကလေးသူငယ်များအား လက်နက်ကိုင် ပဋိပက္ခတွင် ပါဝင်ပတ်သက်မှုမှ တားဆီး ကာကွယ်ရေး နောက်ဆက်တွဲ သဘောတူစာချုပ် (OPAC)အရ အသက် ၁၈ နှစ် မပြည့်သေးတဲ့ အရွယ်တွေကို နိုင်ငံအစိုးရ အသီးသီးရဲ့ လက်နက်ကိုင် တပ်တွေက ဖိအားပေးပြီး စစ်မှုထမ်းစေတာမျိုးကို တားမြစ်ထားပါတယ်။ အလားတူ အစိုးရ မဟုတ်တဲ့ လက်နက်ကိုင် တပ်ဖွဲ့တွေ အနေနဲ့လည်း အသက် ၁၈ နှစ်အောက် အရွယ်တွေကို ဘယ်လို အခြေအနေမှာမှ လူသစ်စုဆောင်းတာ၊ စစ်မှုထမ်းစေတာမျိုး မလုပ်ဆောင်ဖို့ OPACက တားမြစ်ထားကြောင်း သိရပါတယ်။   ကိုးကား: BBC 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #အီရန် #အစ္စရေး #ထရမ့် #ဟောမုဇ် #ခါမေနီ #ရေနံ #ဒူဘိုင်း #ကာတာ #ဆော်ဒီ #အိုမန် #ယူအေအီး #ကူဝိတ်