སྡོམ་སྡོམ་གསུམ་རབ་དབྱེའི་ཁ་སྐོང་། 44 མཁན་ཆེན་བསོད་ནམས་རྒྱ་མཚོ། скачать в хорошем качестве

སྡོམ་སྡོམ་གསུམ་རབ་དབྱེའི་ཁ་སྐོང་། 44 མཁན་ཆེན་བསོད་ནམས་རྒྱ་མཚོ།

༄༅། །སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་ལེགས་བཤད་འོད་ཀྱི་སྣང་བ་ཞེས་བྱ་བ་བཞུགས་སོ། ། རྒྱུད་སྡེ་འོག་མ་གསུམ་པོར་ཡང་། །སྐུ་གསུམ་འདི་དང་ཆ་འདྲ་ལ། ། རྣམ་པའི་འདོད་ཚུལ་སོ་སོར་ཡོད། །གཟུགས་སྐུ་རིགས་ལྔར་འདོད་པའི་ཚེ། ། འབྱུང་བ་ལྔ་དང་ཡེ་ཤེས་ལྔ། །དག་བྱ་དག་བྱེད་སྦྱར་ནས་གསུངས། ། རྣལ་འབྱོར་ཆེན་པོའི་རྒྱུད་སྡེ་ལས། །རྒྱུ་ཡི་སྐབས་སུ་དབང་བཞི་དང་། ། བསྐྱེད་རིམ་ལ་སོགས་ལམ་བཞི་པོ། །བསྒོམས་པར་སྐུ་བཞི་འབྱུང་བར་བཞེད། ། རྣལ་འབྱོར་དབང་ཕྱུག་མན་ངག་ལས། །དྲུག་ཚན་བཞི་རུ་སྦྱར་བ་དང་། ། སྐུ་ལྔའི་རྣམ་གཞག་གསུངས་པ་ཡོད། །གསང་ཆེན་ཡིན་ཕྱིར་འདིར་མ་བཤད། ། འཇམ་དཔལ་རང་གི་ལྟ་བ་ཡི། །འདོད་པ་མདོར་བསྟན་མདོ་ལས་ཀྱང་། ། སྐུ་གཅིག་ནས་ནི་ལྔ་ཡི་བར། །རྣམ་གཞག་རྣམ་པ་ལྔ་རུ་གསུངས། ། སྐུ་གཅིག་ཡེ་ཤེས་སྐུ་ཡིན་ཏེ། །ཡེ་ཤེས་མིག་གཅིག་དྲི་མ་མེད། ། སྐུ་གཉིས་རང་དོན་དོན་དམ་དང་། །གཞན་དོན་ཀུན་རྫོབ་སྐུ་ཉིད་ཡིན། ། སྐུ་གསུམ་ཆོས་དང་ལོངས་སྤྱོད་རྫོགས། །སྤྲུལ་པའི་སྐུ་ཉིད་ཡིན་པར་གསུངས། ། སྐུ་བཞི་ཉིད་ཀྱང་བཤད་བྱ་སྟེ། །ངོ་བོ་ཉིད་ལོངས་རྫོགས་བཅས་དང་། ། དེ་བཞིན་གཞན་པ་སྤྲུལ་པ་དང་། །ཆོས་སྐུ་མཛད་པར་བཅས་པ་སྟེ། ། རྣམ་པ་བཞིར་ནི་ཡང་དག་བརྗོད། །ཅེས་པ་མདོ་དེའི་ལུང་ཚིག་ཡིན། ། བྱམས་པས་ནི་ཞེས་ཚིག་སྦྱོར་ཚེ། །སྐུ་གསུམ་ཆོས་སྐུའི་དབྱེ་བར་བཞེད། ། འདིར་ནི་དང་ཞེས་འབྱེད་པའི་ཚེ། །ཆོས་སྐུ་དབྱེ་བའི་གྲངས་སུ་བཞེད། ། སྐུ་ལྔ་ཉིད་ཀྱང་ལུང་དེར་ནི། །སངས་རྒྱས་སྐུ་ལྔའི་བདག་ཉིད་ཅན། ། ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོན་པན་ཅན། ། སྤྱན་ལྔ་ཆགས་པ་མེད་པ་འཆང་། །ཞེས་པའི་ཚིག་གིས་གསུངས་པ་ཡིན། ། དེ་འདྲའི་རྣམ་དབྱེ་མི་ཤེས་པར། །ཁ་ཅིག་ཕ་རོལ་ཕྱིན་པ་ལའང་། ། སྐུ་བཞི་བྱམས་པའི་ལུང་ཉིད་ཀྱིས། །འགྲུབ་པར་སྨྲ་བ་ལུང་ཚིག་ལ། ། དཔྱད་པའི་ནུས་པ་མེད་པར་ཟད། །དེས་ན་ལེགས་པར་སྤྱོད་ལ་སྨྲོས། ། མདོར་ན་ཉན་ཐོས་ཐེག་པ་ནས། །གསང་ཆེན་བླ་ན་མེད་པའི་བར། ། འབྲས་བུ་དོན་གཅིག་བཤད་པའི་ཚུལ། །ཐ་དད་སྤྲོ་བ་བསྐྱེད་ཕྱིར་ཡིན། ། འབྲས་བུའི་སྐབས་ཏེ་ལྔ་པའོ།། །། དེ་ལྟར་ཚུལ་བཞིན་བཤད་པ་འདི། །བདག་ཉིད་གྲགས་པ་བསྒྲགས་པ་འམ། ། གཞན་ལ་གནོད་པའི་ཕྱིར་མིན་ཏེ། །གཅིག་ཏུ་བསྟན་ལ་ཕན་ཕྱིར་ཡིན། ། རྒྱལ་བས་ལུང་བསྟན་ཀླུ་སྒྲུབ་སོགས། །འཛམ་གླིང་མཛེས་པའི་རྒྱན་རྣམས་ཀྱིས། ། འཕགས་པའི་ཡུལ་དུ་ཕྱི་ནང་གི །ལོག་སྨྲའི་མུན་པ་བསལ་བར་མཛད། ། ལྗོངས་འདིར་རིན་ཆེན་བཟང་པོ་དག །བླ་ཆེན་འབྲོག་དང་འགོས་སོགས་ཀྱིས། ། རྡོ་རྗེ་ཐེག་པའི་བསྟན་པ་མཆོག །བཤད་སྒྲུབ་ཆུ་བོའི་རྒྱུན་བཞིན་མཛད། ། དེ་རྗེས་ཆོས་ལོག་འཕེལ་བ་རྣམས། །ས་སྐྱའི་འཇམ་དབྱངས་གྲགས་ཐོབ་དེས། ། ལུང་རིགས་འོད་ཀྱིས་རབ་བསལ་ནས། །ལམ་བཟང་སྣང་བ་གསལ་བར་མཛད། ། མགོན་པོ་དེ་ཉིད་སློབ་ཚོགས་དང་། །བཅས་པ་ཞིང་གཞན་གཤེགས་གྱུར་ནས། ། རིང་ཞིག་ལོན་ནས་བོད་ཡུལ་འདིར། །ལུང་རིགས་མན་ངག་དང་བྲལ་བའི། ། རང་བཟོའི་ཆོས་ལུགས་དུ་མ་ཡིས། བསྟན་པའི་ཉམས་ལེན་སྡོམ་གསུམ་ལ། ། གནད་ཀྱི་དོན་རྣམས་བཤིགས་ནས་ནི། །ཐོས་ཆུང་མགོ་སྐོར་མང་དུ་བྱུང་། ། དེ་དག་ལུང་དང་རིགས་པ་ཡིས། །རྣམ་པར་བསལ་ནས་གནད་རྣམས་ལ། ། སྐལ་ལྡན་མ་འཁྲུལ་སྤྱོད་པའི་ཕྱིར། །བསྟན་བཅོས་ཆེན་པོ་འདི་བྱས་སོ། ། ཕྱོགས་ཞེན་རབ་རིབ་དང་བྲལ་ཞིང་། །རྣམ་དཔྱོད་གསལ་བའི་མིག་ལྡན་པས། ། ཚུལ་བཞིན་བལྟས་ན་ལམ་བཟང་གི །སྣང་བ་གསལ་བར་འགྱུར་རོ་ཞེས། ། ཁོ་བོས་གསངས་མཐོའི་སྐད་ཀྱིས་སྒྲོགས། །ཅི་ཕྱིར་ཞེ་ན་མདོ་རྒྱུད་ཀྱི། ། གནད་ལ་བློ་གྲོས་དྲི་མེད་ཀྱིས། །དཔྱད་ནས་སྨྲས་པ་ཡིན་ཕྱིར་རོ། ། དེ་སླད་སྙིགས་མའི་དུས་འདི་རུ། །སྐལ་ལྡན་ཟབ་དོན་དོན་གཉེར་རྣམས། ། ལེགས་བཤད་འདི་ཡིས་འཁྲིད་བྱས་ནས། །གསུང་རབ་གྲོང་ཁྱེར་བགྲོད་པར་རིགས། ། བསོད་ནམས་འདི་ཡིས་ཚོགས་གཉིས་རི་བོའི་རྩེར། །སྤངས་རྟོགས་ནུས་པའི་ལུས་སྟོབས་རབ་རྒྱས་ཏེ། ། མཐའ་ཡས་འགྲོ་ལ་སྲིད་པའི་མཐར་ཐུག་པར། །དམ་ཆོས་སེངྒེའི་སྒྲ་དབྱངས་སྒྲོགས་པར་ཤོག ། གང་སྐུ་འཇིགས་རུང་སྤྲིན་སྔོན་ཀློང་དཀྱིལ་ནས། །ཞལ་དམར་རྣམ་པར་གཡོ་བའི་གློག་ཕྲེང་འཁྱུག ། ཧཱུྃ་ཕཊ་འབྲུག་གི་འུར་ཆེམ་སྒྲོགས་པ་ཅན། །སྲུང་མའི་དབང་པོས་ལེགས་བཤད་འདི་སྤེལ་ཅིག། །། སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བ་བྱེད་པའི་ལེགས་བཤད་འོད་ཀྱི་སྣང་བ་ཞེས་བྱ་བ་འདི་ནི། ། དཀྱིལ་འཁོར་རྒྱ་མཚོའི་རིགས་བདག་རྡོ་རྗེ་འཆང་དང་དབྱེར་མ་མཆིས་པ་ཐམས་ཅད་མཁྱེན་པ་ཀུན་དགའ་བཟང་པོ་ལ་སོགས་པ་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པ་ལ་བརྟེན་ནས། ། སྡེ་སྣོད་དང་རྒྱུད་སྡེའི་དོན་ལ་མ་འཁྲུལ་པའི་ངེས་པ་གཏིང་ནས་རྙེད་པ། ། ཤཱཀྱའི་དགེ་སློང་བསོད་ནམས་སེངྒེས་དཔལ་ལྡན་ས་སྐྱ་པཎྜི་ཏ་ཆོས་ཀྱི་དབྱིངས་སུ་ཞུགས་ནས་ལོ་ཉིས་བརྒྱ་དང་ཉི་ཤུ་རྩ་ལྔ་འདས་པ་ས་ཕོ་ཁྱིའི་ལོ་ལ་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་བ་ནི་གཞོན་ནུ་བཟང་པོའོ། ། འདིས་བསྟན་པ་དང་སེམས་ཅན་ལ་ཕན་པ་དཔག་ཏུ་མེད་པ་འབྱུང་བར་གྱུར་གཅིག། །། ༈ ། བལ་ཡུལ་ནས་རྒྱལ་ཡོངས་ས་ཆེན་ཞེས་པ་ལས་གུ་རུས་སྤེལ།། །། མཁན་ཆེན་བསོད་ནམས་རྒྱ་མཚོའི་སྡོམ་གསུམ་ཁ་སྐོང་གི་འཆད་ཁྲིད། ཞེ་བཞི་པ། #khenchen_sonam_gyatso_teachings #light_of_buddha #Domsum_khakong