မျိုးဆက်သစ် တိုက်လေယာဉ်တွေ ကြီးစိုးလာတော့မယ့် အရှေ့တောင်အာရှ ကောင်းကင်ယံ | People's Spring скачать в хорошем качестве

မျိုးဆက်သစ် တိုက်လေယာဉ်တွေ ကြီးစိုးလာတော့မယ့် အရှေ့တောင်အာရှ ကောင်းကင်ယံ | People's Spring

မျိုးဆက်သစ် တိုက်လေယာဉ်တွေ ကြီးစိုးလာတော့မယ့် အရှေ့တောင်အာရှ ကောင်းကင်ယံ ခန့်မှန်းရခက်တဲ့၊ ပြီးတော့ အန္တရာယ်များတဲ့ ကမ္ဘာ့ အခင်းအကျင်းတွေဟာ အရှေ့တောင်အာရှ ဒေသကိုလည်း ရိုက်ခတ်ခဲ့ပါတယ်။ အကျိုးဆက် အနေနဲ့ အာဆီယံ ဒေသတွင်း နိုင်ငံတွေဟာ ကာကွယ်ရေး ကဏ္ဍအတွက် တိုက်လေယာဉ်တွေ ဝယ်ယူဖြည့်တင်းမှုကို ဘယ်တုန်းကနဲ့မှ မတူအောင် စိတ်အားထက်ထက်သန်သန် လုပ်ဆောင်လာနေတယ်လို့ နိုင်ငံရေး အကဲခတ်တွေက ပြောပါတယ်။ အစိုးရတွေက ကာကွယ်ရေး အင်အားဖြည့်တင်းဖို့ကို ပိုပြီး အာရုံစိုက်လာခြင်းဟာ အရှေ့တောင်အာရှကို တိုက်လေယာဉ်တွေအတွက် စျေးကွက်သစ်တစ်ခု ဖြစ်လာစေပါတယ်။ သိပ်မကြာလှသေးတဲ့ ကာလတွေ၊ အထူးသဖြင့် ၂၀၂၀ ပြည့်နှစ် မတိုင်ခင် အချိန်တွေတုန်းကဆိုရင် စင်ကာပူကလွဲလို့ ကျန်တဲ့ အရှေ့တောင်အာရှ နိုင်ငံတွေဟာ တိုက်လေယာဉ်တွေကို အားတက်သရော ဝယ်ဖြည့်တာမျိုး အရမ်းနည်းခဲ့ပါတယ်။ တခြား ဒေသတွင်း အင်အားကြီး နိုင်ငံတွေဖြစ်တဲ့ အင်ဒိုနီးရှားနဲ့ မလေးရှားတို့ ဆိုရင်လည်း အထိုက်အလျောက် ခေတ်မီတဲ့ တိုက်လေယာဉ်တွေကို သက်တမ်းအိုနေပြီဖြစ်တဲ့ မော်ဒယ်ဟောင်းတွေနဲ့ တွဲသုံးနေခဲ့ပြီး အဆင့်မြှင့်တင် အစားထိုးဖို့ အားထုတ်မှုတွေ သိပ်မရှိခဲ့ပါဘူး။ ဖိလစ်ပိုင်ဆိုရင် ပိုလို့တောင် ပြတ်သားပါသေးတယ်။ လေတပ်ရဲ့ F-5 တိုက်လေယာဉ်တွေကို သက်တမ်းလွန်လာလို့ အနားပေးခဲ့တဲ့နောက် အသစ်ပြန် အစားမထိုးခဲ့တဲ့အတွက် ၂၀၀၅ ကနေ ၂၀၁၅ ထိ ကာလအတွင်း ဖိလစ်ပိုင်မှာ တိုက်လေယာဉ် တစ်စီးမှ မရှိခဲ့ပါဘူး။ ဒါပေမဲ့ မျက်မှောက်ခေတ်မှာတော့ အခြေအနေတွေက ပြောင်းလဲလာပါပြီ။ ကမ္ဘာ့ဦးဆောင် နိုင်ငံဖြစ်တဲ့ အမေရိကန်ရဲ့ နိုင်ငံခြားရေး မူဝါဒတွေက မဟာမိတ်တွေ ကိုယ်တိုင်တောင် ယုံစားလို့ မရတော့တာတွေ၊ အရှေ့တောင်အာရှနဲ့ ဆက်စပ်နေတဲ့ တောင်တရုတ်ပင်လယ် ရေပြင်ကို ကြီးစိုးဖို့ တရုတ်က လွန်လွန်ကဲကဲ အားထုတ်လာတာတွေဟာ အာဆီယံ နိုင်ငံတွေရဲ့ ကာကွယ်ရေး အခင်းအကျင်းတွေကို ပြောင်းလဲလာစေပါတယ်။ အစိုးရတွေဟာ လေကြောင်းတိုက်ခိုက်ရေးစွမ်းရည်နဲ့ လေကြောင်းစိုးမိုးနိုင်စွမ်းတွေကို မြှင့်တင်ဖို့ အကြီးအကျယ် ငွေသုံးလာနေတယ်လို့ ဩစတြေးလျ မဟာဗျူဟာ မူဝါဒရေးရာ အဖွဲ့ချုပ် (ASPI)ရဲ့ အကြီးတန်း သုတေသီ မယ်လ်ကွမ် ဒေးဗစ်က ပြောပါတယ်။ အရှေ့တောင်အာရှဟာ ကမ္ဘာ့ထိပ်တန်း တိုက်လေယာဉ်တွေ ဖြန့်ကျက်ရာ ဒေသတစ်ခုအသွင် တဖြည်းဖြည်း ပြောင်းလဲလာနေတယ်လို့ သူက မှတ်ချက်ပေးခဲ့ပါတယ်။ သူက အရှေ့တောင်အာရှ နိုင်ငံတွေဟာ ခေတ်အမီဆုံး ပဉ္စမမျိုးဆက် တိုက်လေယာဉ်တွေ ပိုင်ဆိုင်ဖို့ထိကို ကြိုးစားနေတယ်ဆိုတာ သံသယ မရှိဘူးလို့ ပြောပါတယ်။ လောလောဆယ်မှာ နိုင်ငံ အများအပြားဟာ ပဉ္စမမျိုးဆက် တိုက်လေယာဉ်တွေနဲ့ မနီးယိုးစွဲ စွမ်းဆောင်ရည်နီးပါးရှိတဲ့ စတုတ္ထမျိုးဆက် တိုက်လေယာဉ်တွေကို ဝယ်ယူနေကြကြောင်း၊ တခြားတစ်ဖက်မှာတော့ ဘတ်ဂျတ်နဲ့ ပြုပြင်ထိန်းသိမ်းမှု နည်းပညာ ကန့်သတ်ချက်တွေကြောင့် အရေအတွက် အများကြီး အလုံးအရင်း ဝယ်ယူနိုင်စွမ်းမှာတော့ ကန့်သတ်ချက်တွေ ရှိနေကြောင်း ဒေးဗစ်က မှတ်ချက်ပေးခဲ့ပါတယ်။ နိုင်ငံတကာ လေကြောင်းစွမ်းရည် ဆန်းစစ်မှု သုတေသနဌာန Ciriumက ကောက်ယူထားတဲ့ အချက်အလက်တွေမှာတော့ အရှေ့တောင်အာရှ နိုင်ငံတွေမှာ လောလောဆယ် တိုက်လေယာဉ် ၅၃၂ စီးရှိနေပြီး ၁၄၀ ကျော်လောက်ကို အသစ်မှာယူထားတယ်လို့ သိရပါတယ်။ တိုက်လေယာဉ်ဆိုတဲ့ စာရင်းထဲမှာ ဘက်စုံသုံး တိုက်လေယာဉ်တွေ၊ မြေပြင်ချေမှုန်းရေး တိုက်လေယာဉ်တွေ၊ လေကြောင်းစိုးမိုးရေး တိုက်လေယာဉ်တွေ အလုံးစုံကို ထည့်သွင်း တွက်ချက်ထားတာ ဖြစ်ပါတယ်။ စာရွက်ပေါ်က စာရင်းအရတော့ မြန်မာဟာ အရှေ့တောင်အာရှမှာ အကြီးဆုံး တိုက်လေယာဉ်အုပ်ကို ပိုင်ဆိုင်ပါတယ်။ မြန်မာလေတပ်မှာ ဂျက်အင်ဂျင်ရော၊ ပန်ကာနဲ့ပါ မောင်းနှင်တဲ့ တိုက်လေယာဉ် ၁၁၆ စီးရှိပေမယ့် အဲဒီထဲက အများစုဟာ လေပေါ်ပျံတက်နိုင်စွမ်း မရှိလောက်တော့ဘူးလို့ Ciriumက ယူဆထားပါတယ်။ ထိုင်းမှာ တိုက်လေယာဉ် ၁၀၉ စီးရှိပြီး စင်ကာပူကတော့ နိုင်ငံလေး သေးသလောက် အသုံးပြုနေတဲ့ တိုက်လေယာဉ် အမျိုးအစားက ၁၀၀ ဝန်းကျင် ရှိပါတယ်။ ဒါဟာ အရှေ့တောင်အာရှ ဒေသတစ်ခုလုံးစာ တိုက်လေယာဉ် စုစုပေါင်းရဲ့ ငါးပုံတစ်ပုံနီးပါးနဲ့ ညီမျှပါတယ်။ ဒေသတွင်းမှာ အကြီးဆုံး၊ လူဦးရေ အများဆုံး နိုင်ငံဖြစ်တဲ့ အင်ဒိုနီးရှားက တိုက်လေယာဉ် ၉၀ လောက်သာ ရှိပေမယ့် အသစ်ထပ်မံ မှာယူမှုမှာတော့ အရေအတွက် အများဆုံးအဖြစ် ဦးဆောင်နေပါတယ်။ အင်ဒိုနီးရှား မှာထားတဲ့ တိုက်လေယာဉ် ၉၀ လောက် ရှိနေပါတယ်။ ဗီယက်နမ်မှာ တိုက်လေယာဉ် ၆၆ စီး အသုံးပြုနေပြီး မလေးရှားက ၄၀ နဲ့ ဖိလစ်ပိုင်မှာ ၁၁ စီး အသုံးပြုနေကြပါတယ်။ လေ့လာသူတွေရဲ့ အဆိုအရ အင်ဒိုနီးရှားဟာ အရှေ့တောင်အာရှ ဒေသမှာ တိုက်လေယာဉ် နည်းပညာ အဆင့်မြှင့်တင်ရေးနဲ့ ပတ်သက်ရင် ရည်မှန်းချက် အကြီးဆုံး နိုင်ငံဖြစ်နေတယ်လို့ သိရပါတယ်။ နိုင်ငံရဲ့ လက်ရှိ ပိုင်ဆိုင်ထားတဲ့ အစုအဖွဲ့ကတော့ အရောရော အနှောနှောတွေနဲ့ ရှုပ်ထွေးနေပါတယ်။ အင်ဒိုနီးရှား လေတပ်ဟာ အမေရိကန်လုပ် F-16 တိုက်လေယာဉ်တွေရဲ့ သက်တမ်းအိုဟောင်းနေတဲ့ အစောပိုင်း မော်ဒယ်တွေ၊ ရုရှားရဲ့ Sukhoi Su-27နဲ့ Su-30နဲ့ A-29 Super Tucano အပေါ့စား တိုက်လေယာဉ်တွေကို သုံးနေပါတယ်။ အင်ဒိုနီးရှားဟာ F-16တွေကို နည်းပညာ packageတွေ အထိုက်အလျောက် ဝယ်ယူပြီး အဆင့်မြှင့်တင်ခဲ့ပေမယ့် လေယာဉ်တွေရဲ့ သက်တမ်းဟာ ဆယ်စုနှစ်တွေနဲ့ချီ အိုဟောင်းနေပါပြီ။ အာရှမှာ နည်းပညာမြင့် တိုက်လေယာဉ်တွေ အပြိုင်ဝယ်စုနေတဲ့ စင်ကာပူ၊ တောင်ကိုရီးယားတို့လို နိုင်ငံတွေနဲ့ ယှဉ်လိုက်ရင် အင်ဒိုနီးရှားလေတပ်ဟာ ဒိုင်နိုဆောတွေ ဖြစ်နေပြီလို့ ဆိုနိုင်ပါတယ်။ ဒီအခြေအနေကို ပြောင်းပစ်ဖို့ အရေးပါတဲ့ ခြေလှမ်းတစ်ခု အနေနဲ့ အင်ဒိုနီးရှားဟာ ၂၀၂၂ ခုနှစ် ဖေဖော်ဝါရီလမှာ ပြင်သစ်လုပ် Dassault Rafale အဆင့်မြင့် တိုက်လေယာဉ် ၄၈ စီးကို မှာယူလိုက်ပါတယ်။ တင်ပို့မယ့် ပထမဆုံး လေယာဉ်တွေကို မနှစ်က မိတ်ဆက်ခဲ့ပြီး အခုအခါ အင်ဒိုနီးရှား လေယာဉ်မှူးတွေနဲ့ မြေပြင်ဝန်ထမ်းတွေဟာ လေယာဉ်တွေကို လွှဲမယူခင် ပြင်သစ်မှာ လေ့ကျင့်နေကြပြီ ဖြစ်ပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA