Twavuye i Lo-Debari скачать в хорошем качестве

Twavuye i Lo-Debari

Abanyefeso 2: 1,12. Kristo yadukuye kure kuko twari dutandukanye n'Imana kandi twari injabuka ku masezerano y'ivyasezeraniwe abaheburayo, ataco twizigiye ku bizoba. Zaburi 84: 10-11. Kuva twegejwe hafi y'Imana, iduhamagarira rero guha agaciro ukubaho kwayo kurusha ikindi kintu cose nk'uko tubibona kur'uyo mwanditsi wa zaburi atakindi yipfuza atari kumara umwanya arikumwe n'Imana. Yesaya 56: 7 Zaburi 63:2-4 Ubugombe bw'Imana ni ugukoraniriza ubwoko bw'amahanga yose mu ngoro yayo kuko ariho twihweza ubushobozi bwayo. Ubwo nabwo buraheza bukaduhindura mu mpwemu, bukaduha imitima misha, bukadushoboza mu ntege nke zacu, hanyuma bukadukiza indwara zacu. Imigani 28: 26. Guca bugufi ni ugutahura y'uko dukeneye Imana mu buzima bwacu, bitabaye uko, twisanga mu mutego w'ukugwa mu bwibone. Kuvayo 2: 11-12,15-16. Mose atwawe n'ishavu yashatse gusiga Imana mu gushitsa umugambi wayo wo gukiza abaheburayo, Imana ica imushira ku ruhande kugira ngo ibanze imuhindure, yongere imukomeze. Imana yipfuza cane kuduhindura kurusha kudukoresha. Kuvayo 33: 2,13-16. Hano turabona ko Mose yari amaze gukura kandi agatahura ko atarikumwe n'Imana, we n'abaheburayo ataco bazoba batandukaniyeko n'ayandi mahanga yose yo kw'isi. Icipfuzo c'Imana n'ugushikana abizera bose ku gukura kugira ngo bagaragaze ishusho yayo. 2 Samweli 9:6-9. I Lo-Debari hari ahantu hatagira ubuzima, haba abantu ataco bamaze kuvyo umubiri, muvyerekeye inyifato, ndetse no muvy'ubutunzi. Inkuru y'ingene Mefibosheti yasubijwe ibintu vy'umuryango wiwe, ni igicapo c'umukristo agarukanwa mu kubaho kw'Imana, maze akisanga agenda arahinduka umusi ku musi. 2 Samweli 19: 24-30 Dawidi amaze guhunga ikirimba ciwe kubera umuhungu wiwe Abusalomu yashaka kumukura ku ngoma, Mefibosheti nk'uwari yegereye umwami, yahiswemwo kugaragaza agahinda n'umubabaro w'uko umwami atagihari, hako asigara aranezererwa ubutunzi bwo ku kirimba. Umwami amaze kugaruka ku kirimba, yafashe ingingo yo kwaka Mefibosheti igice c'amatungo yari yaramweguriye. Mefibosheti ntivyamubabaje kuko batamwatse iteka ryo kurira ku meza y'umwami. Umukristo yari akwiye kugira ben'uwo mutima, akareka gusamazwa no guhimbaza umugisha w'Imana kurusha uko anezerererwa ukubaho kwayo. Ubutunzi buhambaye dufise ni ukubaho kw'Imana, kubw'ivyo rero, ntidusamare canke tubikengere ngo tubikureko amaso. Muhezagirwe. Pastori Mariko KAGISYE