[國語]姜濤[由超級冠軍走過DUMMY]cantopophk_mo阿毛.文章2023年6月17日KeungTo скачать в хорошем качестве

[國語]姜濤[由超級冠軍走過DUMMY]cantopophk_mo阿毛.文章2023年6月17日KeungTo

cantopophk_mo - 阿毛 文章2023年6月17日 鳴謝:阿毛 #@Keung_To 規範裡捉緊初衷 自主中力求客觀 由超級冠軍走過DUMMY 透視鏡中鏡方能說愛你 距離十胎嘅[作品的說話]，已經有差不多一年；係，係漫長嘅一年，對阿毛嚟講係，對姜糖嚟講呢一年更加係如坐針氈。 將時間推番去2022年4月30號，姜濤十胎單曲[作品的說話]推出，未幾MIRROR沸沸揚揚咁喺出道三年後踏上紅館舞台舉辦首個大型演唱會。七月尾演出其間發生嚴重意外，演唱會同整團人所有工作暫停，十二子同鏡圈頓時瀰漫住濃濃嘅憂傷。沉澱數月後各人慢慢開始投入番工作，電影[阿媽有咗第二個]同電視劇[季前賽]陸續上影同播出，鏡粉先開始鬆一口氣。萬沒料到11月11號903喺亞博攪嘅All Star籃球賽中，姜濤比賽途中發生意外導至膝頭受傷需要接受手術治療。 阿毛睇番先留意到嗰日係四條一，或者係個天迫一直逃避治療嘅姜濤處理好膝頭嘅舊患，而原本以為係個零鐘嘅十字韌帶重建手術，醫生將姜濤留左喺手術室四個鐘，因為情況遠比預計嘅嚴重；術後醫生同姜濤講：之後有機會跳唔到舞。阿毛好難想像醫生呢句說話，對二十出頭初嘗少時夢想成為唱跳偶像、並剛成為家中經濟支柱嘅姜濤，究竟係一種咩程度嘅震撼；嗰種驚或者就好似個天要冧落嚟但自己都唔知點樣頂無人可以幫又無人可以講咁樣。 但只係個半月，姜濤奪得「叱吒專業推介第四位」，踏上頒獎禮舞台獻唱[鏡中鏡]。膝頭十字韌帶重建手術一般要六至九個月去完全康復，而術後復健時機非常重要，太急進會影響復健效果、增加再次受傷機會、同時加劇關節退化情況。原本阿毛以為姜濤只係上台領下獎講下感言，佢又唱又跪仲跑落台四圍同觀眾又叫又跳；彷彿個半月之前嘅受傷同手術無發生過一樣。作為半個前運動員嘅阿毛身邊都有好多做過類似手術嘅朋友，大家都會謹慎聽從醫生同物理治療師嘅指示同安排，怕跟得唔好影響往後運動生涯；見到姜濤呢個表現，阿毛心裡面既擔心又十萬個黑人問號。轉頭有啲朋友就話：車，佢邊忽似有事呀！之前講到咁嚴重，呃Like呀！再嚟媒體排山倒海嘅報導同社交媒體上各式各樣嘅負評就唔洗阿毛複述啦。 去到嗰一刻，阿毛呢啲塘邊鶴都不禁諗：唉！咁難嘅，應該點呢？即係咁，你試幻想下：你自細睇高比打波成日幻想可以去打NBA，你好努力好努力由街場打到室內、由校隊打到去球會，終於有機會代表香港出外比賽，點知自己個球會攪獲大大獲令到你要暫時停賽，好喇到可以跟番操自己又整獲金金的要休養，都無好番幾多就心急想俾人知自己無事就落場鬥波，雖然自己好搏命但因為根本未Ready又太心急想表現於是應做嘅做唔到幾多唔應做嘅可能做多左，跟住身邊嘅周圍嘅識嘅唔識嘅都係咁話你唔掂話你肥廢鈍話你扮嘢呃Like無料到。嬲嫁！嬲明明自己只係好想做好但就係咁俾人追住嚟鬧；嬲自己整親攪到半年無得打波比賽，半年？個位大把人打左啦！喂有機會就梗係上左先啦，邊度諗過會打成咁，更加無諗過要承受排山倒海嘅評擊囉！ 姜濤喺訪問裡面提到：台上演出時表演者可以絕對主觀，但落左台就要能夠客觀審視番個演出。阿毛衷心佩服！表演者喺台上呈現作品係一個由衷分享嘅過程，主觀係必然嘅；但落到台下嘗試以觀眾嘅視點審視演出，可以令自己同觀眾透過演出作品嘅溝通更有效率。講好易，尤其面對被受評擊嘅演出，單純要直視個演出就已經好難。終於佢坐定喺屋企個大電視面前，捱過左比呢五年更漫長嘅三分鐘。了解過觀眾對自己演出負評嘅由來，然後佢預左咩都無晒、要由零開始，或者係由負數開始，佢甚至要求公司雪佢。阿毛認同呢五年對於一個初出茅蘆嘅小伙子實在飛得太快，嗰種密集程度就好似一般人過左十幾廿年一樣；不過講到要由負數開始，就睇到佢有幾重視每一個演出嘅效果；一個頒獎禮三分鐘嘅演出效果唔達標，就足以推倒五年建立嘅一切。佢總係對壞情況做好心理準備，再正面咁沉著應戰。 再然後，姜濤決定Join大家，一齊笑自己；就係咁，十一胎DUMMY經歷左一年嘅歷練、轉化、蘊釀、啄磨，成為佢同自己、支持者、Haters，溝通嘅聲音同橋樑。 好，阿毛直入正題。 譜撰旋律嘅KW朱敏希，曾於2009-2010年度 iMusic World互動音樂創作比賽獲得全場總冠軍及網上最受歡迎歌曲獎、及第二十三屆CASH流行曲創作大賽十強，跟住以四人男團Myar身份出道；曲、詞、編、監均能一手包辦，近年主力作曲，作品如陳伯嘅[對得起自己]、教主嘅[角落生物]、阿佛嘅[沒有人可以為你的幸福負責]、牙詠嘅[沒有無緣無故的恨]、同埋JeffreyBB嘅[遺忘了初心的我們]，旋律都令阿毛好入心。比起過往中慢版、抒情中帶啲倔強嘅旋律，DUMMY嘅曲風係KW嘅新嘗試，旋律暗黑剛烈，副歌搶耳非常，姜濤提到就係Demo裡面嘅呢個副歌令佢一聽鍾情。 編曲Y.Siu。DUMMY前奏配上沉重嘅敲擊樂、同整齊配合節拍而低沉嘅和音，俾阿毛嘅畫面就好似一班面目無光、木無表情嘅人偶喺到步操，陰沉鬼異得有如一套懸疑電影攝人嘅序幕。差不多貫穿整首歌曲沉重而公整嘅鼓，與Music Break用上淒美而亮麗嘅弦樂，不單好似規矩嘅正方同柔韌嘅弧線嘅對比，更有種規範同自主角力嘅感覺。第二段主歌開始加入姜濤不同語氣嘅背景人聲，時而竊竊私語、時而質疑；第二個弦樂作基底嘅Music Break更疊加上姜濤提議加入、有不程度Distorted嘅笑聲，突顯自主被蔑視訕笑嘅意景。當中姜濤嘅笑聲令阿毛越聽越心寒、越聽越心酸；姜濤喺電台訪問中亦提到，錄呢段背景笑聲嘅時候都有啲眼濕濕。尾段編曲混合弦樂同敲擊樂，編者力圖平衡力量；而當中嘅Trap Beat就帶嚟打破框框嘅律動。最後編者以弦樂節拍作終結，為歌者留白待續。 詞人梁栢堅，為姜濤嘅自嘲之作惡搞一下。梁栢堅收到呢個柯打亦隆重其事，特登搵番叱吒有關片段嚟慢鏡重溫、逐格細嚼。 年輕偶像浦「出廠」踏進演藝事業，每日有各式各樣嘅「庶務」要「追進度」，亦要跟住「劃一路線」去「自我復修」去改變自己，好似「格式機關都有路線圖」、要「對著訊號」跟住「照做」，感覺就如「一個木偶」「倒模」般「踏步」。本應係「日復日」一樣嘅演出，只需如常「跟資料輸出電量」，但「抱恙」令演出似有「混亂」，竟尤「如花式表演」般「誇張」，想加強「力量」點知變左負擔嘅「重量」，甚至連審美都變得「另類」，想要「鏗鏘」嘅音色卻成「突異」嘅「空槍」，演出頓時變成「異類道別正常」。 大家都「試過自訂存在意義」，然而眾人偶像突然變成「Dummy」，變成「斷纜」嘅「布偶」，突然「放肆」咁「跳躍」、口中「念念」「有詞」，突然「手指」郁郁、仲「咬牙切齒」。呢個「甩繩」布偶「未理目光」喺度「亂玩手指」，網民直呼有「病」就「向淺中醫」，甚至話佢已經返魂「乏術無法救治」，成為令人「失笑」嘅「失控新標誌」。佢就尤如「末路進士」，隨時「自動生事」，尤如「多聲道」會「亂」放「厥詞」。呢位年輕偶像想繼續喺演藝行業「活著」，就「必須制止」呢啲行徑、必須「道別幼稚」。 眼見自己原本「躊躇滿志」，但而家竟「變成枯枝」、「變成糗事」，知道要「道別放肆」要「終止」「飄移」；決定「道別過去」，「現在開始」「重頭灌溉」，希望「日後致辭」嗰陣再向今日嘅種種「道謝」。年輕偶像「會記得初衷無忘訓示」，會努力嘗試「再校對軌跡」同「存在意義」，就算呢刻「跌過會再試」，再「賣力」應該「還未算遲」。明白「Don't be Dummy」，希望終有日能夠成為光照四方嘅「大意義」。「說話到此」，身體力行、用作品說話先最實際。 自嘲嘅作品阿毛有聽過，但係對自己對媒體對觀眾都坦白如此、狠到呢個地步真係唔多見，主人翁仲要咁年輕！君不見姜濤喺宣傳訪問裡面，真係整件事原原本本鉅細無遺咁親口講番出嚟，丁啲左閃右避都無；佩服！佩服！ 舞蹈嘅部分，大目老師喺佢嘅頻道分享左佢作為一個唔識廣東話嘅台灣舞者，首次為廣東歌編舞嘅體驗。阿毛發覺佢非常仔細，對歌曲由主題走向節奏速度分段歌詞分佈讀法押韻，藝人年齡身高體形舞蹈喜好能力，以至MV拍攝手法風格構圖畫面分鏡，全部喺編舞時都有考慮計算，希望令整個呈現可以最大化。大目老師為DUMMY編排嘅舞蹈，可以演繹為[鏡中鏡]嘅延續，同以Krumping去表達憤怒同反抗嘅情緒，加入姜濤提議嘅敲頭動作，喻意要敲醒自己，希望可以成為一個願意聆聽意見嘅藝人。 阿毛自2021年睇過姜濤喺演唱會演出[蓮]跳過Krumping，就覺得呢個舞種好適合佢；型就唔洗講，嗰種作戰嘅意識形態、非常有力嘅Arm Swing、Chest Pump同Stomp，好切合台上面霸氣嘅佢，同時阿毛都覺得呢個舞種對佢會係一種唔錯嘅情緒出口。 MV拍攝有別於[鏡中鏡]同[作品的說話]有相對整體連貫嘅劇情，台灣導演Ares Wu以不同場景片段同當中嘅符號，表達DUMMY嘅自醒自嘲訊息。作為一個普羅大眾，阿毛就對MV有以下非常唔專業同時極度主觀嘅解讀：坐於雲端上陷進風暴嘅姜濤，好似現實裡面當觀眾以為佢已經成為萬人仰慕嘅天之驕子，其實佢自覺身陷風眼；當佢望住出現喺細小電視機裡面時而驚恐時而憤怒嘅自己，就好似佢受傷受驚嘅內在小孩聲音被困未能讓人聽見，只有自己先見到；或者自己曾經係試車人偶其中一員，喺全速試車嘅過程中努力保持自我，盼望就算車毀人仍有重生機會；或者台上面嘅佢曾經好似持槍亂射嘅狂徒，但當佢睇番電視入面嘅自己、同時聽到四方八面嘲笑聲嘅時候，一切就如重擊敲向自己嘅腦袋，難受同時希望能夠清醒面對；最後佢選擇放下對抗，嘗試放低曾經受驚受傷嘅過去，俾自己一步步向前行。 阿毛好喜歡導演喺MV裡面豐富嘅運鏡同燈光嘅運用，當中尤以唔同嘅光線製造嘅色調氣氛，例如雲層裡面嘅閃電、星空上嘅月光、電視機畫面嘅光、舞蹈場景上空環形嘅舞台燈光同背後散射嘅燈光、試車場上方尤似球賽嘅排燈等；以背光營造出不同嘅人物邊光，細緻悅目。或者阿毛都係被寵壞嘅樂迷，假若MV能夠將劇情內容連繫到舞蹈部分，相信一氣呵成嘅整體性會令MV、歌曲同舞蹈相互嘅加乘更巨大。阿毛當然更希望之後會有DUMMY嘅Dance Version，到時阿毛同一眾姜糖實會睇得津津有味。 題外話，阿毛睇左MV幾十次之後，赫然發現一樣有趣嘅嘢：MV由頭到尾並未出現歌手名字；未知係團隊刻意安排，定係偶然；但阿毛覺得一首以自嘲為題嘅MV，呢個情況就更有第三者視點嘅玩味。 年輕嘅本地歌手，唱功用聲咬字吐字都受唔少聽眾詬病。姜濤由[全民造星]出道至今，阿毛目睹佢喺各方面嘅進步。而姜濤錄製是次單曲亦隆重其事，之前不單搵老師學唱歌，仲特登搵左中學時期嘅中文老師，嚟監督自己錄音時嘅咬字吐字。而DUMMY嘅Vocal，無左年輕人間好普遍嘅懶音，咬字吐字清晰無需靠睇歌詞先知首歌講咩，姜濤甚至喺語氣上有更多嘗試，演繹上亦更有律動感。 差啲漏左講四月頭姜濤喺西九嘅演出。呢次係自年頭叱吒後佢嘅首次公開演出，亦係DUMMY首次暴光，更似係總結由踏入造星到呢刻嘅心路歷程、同送俾姜糖嘅禮物：姜濤自造星一步步由普通男生變成好多迷妹迷姐心目中嘅[超級冠軍]，走入表演事業赫然發現大眾甚至行業，對年輕一代嘅新思維或多或少有種蔑視嘅態度，當時嘅姜濤覺得年輕人未必要遵從[Masterclass]嘅舊路；然一次演出失準擊起海量負評，佢沉澱過後自嘲DUMMY，努力思索如何重頭開始；佢嘗試透過[鏡中鏡]睇清內心嘅恐懼，希望有日終止外界評擊對內心嘅纏繞；或者呢刻，佢對呢啲有的無的實在覺得[夠了]，可能佢未必可以親口講，但就算[蒙著咀]佢都好想同對佢不離不棄嘅姜糖[說愛你]！演出中姜濤非常專注但又眉鎖心間，直至[蒙著咀說愛你]聽到觀眾熱烈嘅大合唱佢先放鬆有番啲笑容；最後佢喺微雨下完成超過二十分鐘嘅演出，終究未發一言，深深向台下觀眾鞠躬良久再返回後台。 或者呢刻仲有好多人唔認同姜濤，認為佢未有能力問鼎當今頂流，然佢嘅存在同影響力的確不容忽視。而佢謙遜大器，認為自己曾經[DUMMY]就落力自嘲，務求俾所有人都知道，要大家一齊鞭策佢。 若你睇阿毛嘅字到呢刻，阿毛衷心感激。同時希望你會嘗試關注不同嘅本地歌手同作品，讓佢哋為本地樂壇發光，讓廣東歌繼續邁步，走出更闊更廣嘅路，發放更多光同熱俾身處唔同角落嘅香港人。共勉之。