वेलू न वेलू बाय // velu na velu bai скачать в хорошем качестве

वेलू न वेलू बाय // velu na velu bai

प्रेमी युगुलांना आमरण, स्नेहाच्या स्निग्ध गाठींनी जोडणारा विधी म्हणजे विवाह.. तिनं त्याचं होणं आणि त्यानं तिचं होणं... आयुष्यभरासाठी... विवाहाचं हे अतुट बंधन वसईचा ख्रिस्ती समाज एक विधी म्हणून नव्हे तर एक संस्कार म्हणून साजरा करतो. विवाहाच्या गाठी बांधताना सुखात दु:खात ,आजारात आरोग्यात, संपत्तीत विपत्तीत आमरण एकमेकांशी एकनिष्ठ राहण्याचं वचन वधुवर चर्चमधल्या पवित्र वेदीसमोर सर्वांच्या साक्षीनं देतात.. धर्मगुरू त्यांचं हे प्रेम आशीर्वादीत करून सुखी, समाधानी ,समृद्ध वैवाहिक जीवनाला सुयश चिंततात.. आमच्या अशिक्षित कुपारी बायकांसाठी विवाहचं नातं म्हणजे परमपवित्र..म्हणून नवऱ्या मुलाला म्हणजे पुताला आणि नवऱ्या मुलीला म्हणजेच दुयी ( दुहिता- लेक) हिला उद्देशून चर्चमध्ये पवित्र विधीसाठी जाण्याअगोदर त्या गातात... की "लग्नाची महान आणि परममंगल वेळ आलेली आहे". रविवारी सकाळी विवाह विधीसाठी जाण्याआधी नवऱ्या मुलाला आणि नवऱ्या मुलीला आपल्या आई-वडिलांच्या किंवा मामाच्या मांडीवर ,घरातील ज्येष्ठ व्यक्तींच्या मांडीवर बसवलं जातं. त्यांना आशीर्वाद दिले जातात..काही आशीर्वाद अहेर रूपाने दिले जातात.. वधुवरांचे मदरीन पदरीन म्हणजे धर्म आईवडिल यांचा या गीतात खास उल्लेख केला जातो. "पुता, दुये तुझे मदरीन पदरीन मोठ्या शहरात गावात राहणारे आहेत.. ते तुमच्यासाठी मोठा अहेर पाठवतील".. तेव्हाची परिस्थिती गरिबीची ... त्यामुळे वधुवरांची सोन्याचे दागिने घालून मिरवण्याची लग्नाचा दिवस ही पहिलीच वेळ असे.. त्यामुळे मदरीन पदरीन आणि मामा यांच्याकडून अहेराच्या रूपात येणाऱ्या सोन्याच्या अंगठीची किंवा भेटवस्तूंची आतुरतेने वाट पाहिली जात असे.. आज बदललेल्या आर्थिक परिस्थितीमुळे समृद्धी आलेली असली तरी त्याच आतुरतेने मामाघरच्या आणि मदरीन पदरीननी प्रेमाने मायेने पाठवलेल्या अहेराची आणि त्यातील आशीर्वादाची वाट पाहिली जाते... आणि म्हणूनच आजही हे गीत विवाहबंधनाच्या पावित्र्याचं आणि सग्यासोयऱ्यांच्या आशीर्वादचं प्रतिक ठरतं... वेलू न वेलू बाय दामण वेलू वेलू संदरीक वेलू........ आयतावाराश्या दिशेला पुता कडसॉ तुला अयेर येदे?... निर्मळसारखा शेर गा पुता हाय तुझॉ मामा समराट तडसॉ तुला अयेर येदे... नंदाखाल सारखा शेर गा पुता हाय तुझॉ पदरीन समराट तडसॉ तुला अयेर येदे... नानभाट सारखा शेर गा पुता हाय तुझी मदरीन समराट तडसॉ तुला अयेर येदे.... आगायसारखा शेर ला दुये हाय तुझॉ मामा समराट तडसॉ तुला अयेर येदे... शिरलयसारखा शेर ला दुये हाय तुझॉ पदरीन समराट तडसॉ तुला अयेर येदे... वसयसारखा शेर ला दुये हाय तुझी मदरीन समराट तडसॉ तुला अयेर येदे.... निवेदन व सादरीकरण: मॅकलिना रिबेलो व डॉ रिबेका दोडती व्हिडिओ व प्रस्तुती रूडाल्फ रॉड्रिग्ज व बसीन प्रोडक्शन