Cape Wrath Trail (3/3) — 15 daga gönguævintýri um skosku hálöndin [English subtitles] скачать в хорошем качестве

Cape Wrath Trail (3/3) — 15 daga gönguævintýri um skosku hálöndin [English subtitles]

Hér deili ég ferðasögu minni um Cape Wrath Trail, sem liggur um vesturhluta skosku hálandanna. Gönguferð sem var krefjandi á köflum en ávallt heillandi. Ég gekk einsamall og bar allt mitt á bakinu. Þar sem ég fór í þessa gönguferð í páskafríinu mínu í apríl 2025, þó með nokkrum auka dögum, varð ég að fara frekar hratt yfir. Ég hóf gönguna 10. apríl og lauk henni 15 dögum síðar, 24. apríl. Daginn þar á eftir gekk ég svo þangað sem ég gat tekið rútu áleiðis til Glasgow. Í allt var þetta gönguævintýri mitt 403 kílómetrar og uppsöfnuð hækkun var um 12.000 metrar. Cape Wrath Trail er um 380 kílómetra ómerkt gönguleið og er talin ein af erfiðustu og afskekktustu gönguleiðum Bretlandseyja. Á gönguleiðinni er meðal annars farið yfir fjallaskörð, mýrar, heiðar og ár, um dali og skóglendi og þau voru ófá stöðuvötnin sem ég gekk meðfram. Ég var einstaklega heppinn með veður á minni göngu. Flestir dagar voru sólríkir, eða að minnsta kosti sást til sólar, og þó það rigndi af og til og vindurinn minnti á sig, var það aldrei til trafala. Ég var einnig svo heppinn að rekast á dýr sem ég er ekki vanur að sjá, til dæmis erni, hirti og snáka. Einnig hitti ég gott fólk sem gaman var að spjalla við. Að öllu samanlögðu vel heppnuð gönguferð sem ég mun ávallt minnast með hlýu. ℹ️ Á þessari vefsíðu má finna upplýsingar um Cape Wrath Trail gönguleiðina: https://www.walkhighlands.co.uk/cape-... ––– 🕒 Myndbandið skiptist í eftirtalda hluta: 0:00 Dagur 11: Inverlael/Ullapool – The Oykel Bridge Hotel 5:51 Dagur 12: The Oykel Bridge Hotel – Inchnadamph 12:18 Dagur 13: Inchnadamph – Glendhu Bothy 20:20 Dagur 14: Glendhu Bothy – The Old School 29:17 Dagur 15: The Old School – Cape Wrath 39:17 Dagur 16: Cape Wrath – Kinlochbervie – Ferðalok ––– Dagur 11: Dagurinn byrjaði á því að ég tók leigubíl frá Ullapool til Inverlael þar sem gangan hélt áfram á þeim stað sem henni lauk deginum áður. Eftir matarhlé við ánna Douchary gekk ég fram hjá Loch an Daimh og skálanum Knockdamph Bothy áleiðis að The Oykel Bridge Hotel þar sem ég fékk gistingu yfir nóttina. Dagur 12: Á þessari dagleið lá leiðin meðal annars yfir fjallaskarðið Am Bealach og í stað þess að gista í tjaldi eins og ég hafði gert ráð fyrir fékk ég gistingu yfir nóttina á farfuglaheimilinu í Inchnadamph. Dagur 13: Þessi dagur var einn af þeim fallegri á allri gönguleiðinni. Ég var mjög heppinn með útsýnið af fjallaskarðinu Bealach na h-Uidhe. Síðan lá leiðin meðal annars fram hjá hæsta fossi Bretlands, Eas a’ Chual Aluinn. Ég stoppaði við Loch Glencou og naut þar fallegs útsýnis áður en ég gekk að næturstaðnum, skálanum Glendhu Bothy. Dagur 14: Þessi dagur var sá lengsti í kílómetrum talið á allri gönguleiðinni. Frá skálanum Glendhu Bothy að gististaðnum The Old School. Á leiðinni þangað fór ég yfir fjallið Ben Dreavie, staldraði við ánna Garbh Allt sem getur verið mjög erfið yfirferðar þegar mikið vatn er í henni, síðan fylgdi ég fljótinu Rhiconich sem ég hafði gert ráð fyrir að tjalda við en hætti við eins og ég útskýri í myndbandinu. Dagur 15: Á lokadegi gönguleiðarinnar byrjaði ég á því að koma við í búðinni London Stores til þess að kaupa mat fyrir næstu dagana. Síðan var stefnan sett á Cape Wrath. Á leiðinni þangað gekk ég meðfram Sandwood Loch, fékk gott útsýni yfir Sandwood Bay Beach og fór síðan um skotæfingasvæði breska hersins á þessum slóðum. Til Cape Wrath kom ég svo skömmu fyrir klukkan sjö. Þar fékk ég góðan mat og gistingu yfir nóttina. Dagur 16: Þó göngunni væri formlega lokið átti ég eftir að ganga að bænum Kinlochbervie. Á leiðinni þangað gekk ég meðal annars eftir Sandwood Bay Beach. Í Kinlochbervie beið mín gistiheimili og síðan far með rútu næsta dag áleiðis til Glasgow. ––– 📸 Myndbandið er að mestu tekið á GoPro HERO11 Black og einnig var dróninn (DJI Mini 3 pro) með í för sem kom sér vel í því magnaða landslagi sem gangan hefur upp á bjóða. 💬 Myndbandið er með skjátexta á íslensku og ensku. Hægt er að velja sjálfvirka þýðingu á fjölmörg önnur tungumál.