Data Stories- 5 shkurt 1887 - Omer Nishani, vdekja e mistershme e kreut të shtetit скачать в хорошем качестве

Data Stories- 5 shkurt 1887 - Omer Nishani, vdekja e mistershme e kreut të shtetit

Omer Nishani, mjeku dhe politikani, Kryetar i Presidiumit të Kuvendit Popullor të Republikës Popullore të Shqipërisë në periudhën 1946-1953, u lind në 5 shkurt të vitit 1887, në Gjirokastër. Pas arsimimit fillor në vendlindje, Omer Nishani studioi dhe u diplomua për mjekësi në Stamboll. Më tej, në vitet 1915 deri në vitin 1918, punoi si mjek në Ballsh dhe më pas në Spitalin e Tiranës si dhe në Durrës. Omer Nishani u përfshi në politikë në fillim të viteve 1920, në moshën 35 vjeçare, duke u rreshtuar me opozitën e kohës dhe duke u aktivizuar madje edhe një një atentat ndaj Kryeministrit Ahmet Zogu. Në vitin 1924 ai mbështeti Lëvizjen e Qershorit dhe më pas Qeverinë e Fan Nolit, që erdhi në pushtet përmes një aksioni të armatosur. Pas rikthimit të Zogut në pushtet, në dhjetor 1924, Omer Nishani, u largua jashtë vendit, duke u vendosur fillimisht në Vjenë, ku u martua me një vajzë austriake, Rozvita von Voler. Gjatë viteve në ekzil ai u lidh me lëvizjen komuniste duke bashkëthemeluar, në vitin 1925, KONARE-n - Komitetin Revolucionar Kombëtar, një organizatë antizogiste, që mbështetej nga Internacionalja Komuniste. Pas pushtimit italian të Shqipërisë në prill 1939, Omer Nishani u kthye në atdhe duke ju bashkuar Këshillit të Shtetit të Qeverisë Kolaboracioniste, që përbëhej nga personazhe të njohur si kundërshtarë të Mbretit Zog. Në verën e vitit 1943, Omer Nishani bashkohet me ‘Frontin Nacionalçlirimtar’ që drejtohej nga Partia Komuniste. Duket, i mbështetur nga Enver Hoxha, me të cilin kishte njohje familjare, karriera e Omer Nishanit ecën mbarë. Fillimisht zgjidhet Kryetar i Frontit Nacinal-Çlirimtar duke u kthyer, me kalimin e kohës në figurën më të rëndësishme pas Enver Hoxhës. Në Kongresin e Përmetit, të majit 1944, Omer Nishani zgjidhet Kryetar i Këshillit Antifashist Nacionalçlirimtar, një funksion që i përket një kryetari të pashpallur shteti. Njëkohësisht, në Komitetin Antifashist Nacionalçlirimtar, që kryesohej nga Enver Hoxha dhe që u quajt “Qeveria Demokratike”, në tetor 1944, Omer Nishani mori postin e Ministrit të Punëve të Jashtme, detyrë që e ushtroi deri më 9 shkurt 1946. Përfundimisht, më 12 janar 1946, pasi Shqipëria ishte shpallur Republikë, Nishani u zgjodh President i Presidiumit të Kuvendit Popullor. Rrëzimi i Omer Nishanit nisi pas arrestimit të vëllait të tij, Besim Nishani, më 1 tetor 1952, me akuzën e agjitacionit e propagandës kundër pushtetit popullor dhe mos denoncim të arratisjes jashtë vendit të shokut të tij. Por Omer Nishanin nuk e dëmtoi vetëm historia më të vëllanë. Pas vdekjes së Stalinit, Enver Hoxha ndjeu frikë për të ardhmen e tij duke nisur një reformim të plotë të aparatit qeveritar dhe larguar të gjithë ata që mund ti hapnin telashe. Në këtë kuadër ai e detyroi Doktor Omer Nishanin të jepte dorëheqjen. Omer Nishani ja paraqiti Kuvendit Popullor dorëheqjen me shkrim më 2 gusht 1953. Mes të tjerave ai shkruante se: në jetë të jetëve do të mbetej besnik i Bashkimit Sovjetik dhe i idealeve komuniste. Më 26 maj të vitit 1954, dy ditë para se të zhvilloheshin zgjedhjet për Kuvendin Popullor, Omer Nishani gjendet i vrarë në vilën ku banonte. Një ditë më pas, më 27 maj 1954, gazetat e përditshme, “Zëri i Popullit” dhe “Bashkimi”, njoftonin, me pak fjalë, vdekjen e Omer Nishanit në moshën 67-vjeçare, duke e mbyllur me shpjegimin se vdiq “pas një sëmundjeje të rëndë”. Ndërkohë në raportin e përpiluar nga hetuesi Nevzat Haznedari, flitet për vetëvrasje. #mcntv #mcn #datastories #ferdinanddervishi #histori #ngjarjethistorike #OmerNishani #HistoriaShqiptare #PolitikaShqiptare #Gjirokastra #KuvendiPopullor #RepublikaPopullore #KomunizmiNeShqiperi #EnverHoxha #FrontiNacionalClirimtar #KongresiIPermetit #FanNoli #AhmetZogu #HistoriaPolitike #FiguraHistorike #Shqiperia1944 #Presidiumi #MistereHistorike