រដ្ឋបាលខេត្ត​ ប្រកាសសមាសភាពក្រុមការងារ ជំរុញការផ្តល់អត្តសញ្ញាណបណ្ណ និងឯកសារអត្តសញ្ញាណកម្ម​ скачать в хорошем качестве

រដ្ឋបាលខេត្ត​ ប្រកាសសមាសភាពក្រុមការងារ ជំរុញការផ្តល់អត្តសញ្ញាណបណ្ណ និងឯកសារអត្តសញ្ញាណកម្ម​

រដ្ឋបាលខេត្តសៀមរាប ប្រកាសសមាសភាពក្រុមការងារ ជំរុញការផ្តល់អត្តសញ្ញាណបណ្ណ និងឯកសារអត្តសញ្ញាណកម្មជូនប្រជាពលរដ្ឋ នៅរសៀលថ្ងៃ ទី០៥ ខែមីនា ឆ្នាំ២០២៦ រដ្ឋបាលខេត្តសៀមរាប បានរៀបចំកិច្ចប្រជុំផ្សព្វផ្សាយសមាសភាពក្រុមការងារ ដើម្បីដឹកនាំ គាំទ្រ និងជំរុញការផ្តល់អត្តសញ្ញាណបណ្ណសញ្ជាតិខ្មែរ និងឯកសារអត្តសញ្ញាណកម្មផ្សេងៗ ជូនដល់ប្រជាពលរដ្ឋ ស្របតាមសេចក្តីសម្រេចលេខ ១៣២០០ សសរ របស់ក្រសួងមហាផ្ទៃ និងសេចក្តីសម្រេចលេខ ០០៥/២៦ សសរ របស់រដ្ឋបាលខេត្តសៀមរាប ក្នុងន័យជំរុញការផ្តល់ឯកសារអត្តសញ្ញាណជូនប្រជាពលរដ្ឋខ្មែរទូទៅ ជាពិសេសប្រជាពលរដ្ឋដែលទើបវិលត្រលប់ពីប្រទេសថៃ ដែលកំពុងជួបការលំបាកដោយសារខ្វះខាតឯកសារ ឬឯកសារត្រូវបានបាត់បង់ និងខូចខាត។ លោក លី សារី អភិបាលរងខេត្ត មានប្រសាសន៍ថា ការងារដ៏សំខាន់នេះ គឺមានគោលដៅជំរុញការអនុវត្តយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចធិបតី ហ៊ុន ម៉ាណែត ដើម្បីលើកកម្ពស់ប្រសិទ្ធភាពនៃការផ្តល់សេវាសាធារណៈនៅកៀកជិតប្រជាពលរដ្ឋបំផុត។ ដើម្បីបង្កភាពងាយស្រួល សូមឱ្យអាជ្ញាធរមូលដ្ឋានត្រូវយកចិត្តទុកដាក់ចុះបញ្ជីកំណើត ស្នាក់នៅ និងអត្តសញ្ញាណបណ្ណជូនប្រជាពលរដ្ឋឱ្យបានឆាប់រហ័ស ស្របតាមច្បាប់ជាធរមាន។ ចំណែករដ្ឋបាលក្រុងស្រុក ឃុំសង្កាត់ ត្រូវចេញសេចក្ដីចម្លងជូនពលរដ្ឋដែលបាត់បង់ ឬខូចខាតឱ្យបានលឿនទាន់ពេលវេលាទៅតាមដែរអាចធ្វើទៅបាន ហើយប៉ុស្តិ៍នគរបាលរដ្ឋបាលត្រូវចេញសៀវភៅស្នាក់នៅទុតិយតាជូនពលរដ្ឋក្នុងករណីបាត់ ឬខូចឱ្យបានលឿន។ លោកក៏បានជំរុញឱ្យមន្ត្រីពាក់ព័ន្ធ ត្រូវបំពេញបែបបទផ្តល់ជូនពលរដ្ឋដែលអត្តសញ្ញាណបណ្ណអស់សុពលភាព ឬសល់តិចជាង ១៨០ថ្ងៃ បាត់ ឬខូច អនុវត្តតាមគោលការណ៍រាជរដ្ឋាភិបាល ដោយមិនត្រូវទុកឱ្យប្រជាពលរដ្ឋខ្មែរណាម្នាក់ គ្មានឯកសារបញ្ជាក់អត្តសញ្ញាណប្រើប្រាស់ឡើយ ដោយត្រូវជំរុញការផ្តល់ឯកសារអត្តសញ្ញាណជូនពលរដ្ឋគ្រប់រូប ជាពិសេសអ្នកដែលទើបវិលត្រលប់ពីប្រទេសថៃ។ លោកក៏បានរំលឹកដល់រដ្ឋបាលថ្នាក់ក្រោមជាតិ ត្រូវបញ្ជូនរបាយការណ៍ប្រចាំខែ មកតាមឋានានុក្រមឱ្យបានទៀងទាត់មកកាន់រដ្ឋបាលខេត្ត ដើម្បីរដ្ឋបាលខេត្តបញ្ជូនទៅកាលរដ្ឋបាលជាតិ។ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករងនៃអគ្គនាយកដ្ឋានអត្តសញ្ញាណកម្ម បានបង្ហាញថា ដោយសារផលប៉ះពាល់នៃវិវាទព្រំដែនកម្ពុជា-ថៃ ចាប់តាំងពីខែកក្កដា ឆ្នាំ២០២៥មក បណ្តាលឱ្យមានប្រជាពលរដ្ឋវិលត្រឡប់មកពីប្រទេសថៃប្រមាណ ៩០ម៉ឺននាក់ និងប្រជាពលរដ្ឋភៀសសឹកប្រមាណ ៦៤ម៉ឺននាក់។ ស្ថានភាពនេះបានធ្វើឱ្យប្រជាពលរដ្ឋមួយចំនួនបាត់បង់ ឬខូចខាតឯកសារអត្តសញ្ញាណ ដែលជាឧបសគ្គដល់ការទទួលសេវាសាធារណៈ និងការត្រៀមខ្លួនសម្រាប់ការបោះឆ្នោតនាពេលខាងមុខ។ ឯកឧត្តម ឧត្តមសេនីយ៍ឯក សាយ ម៉េងឈាង បានសង្កត់ធ្ងន់ថា ការផ្តល់ឯកសារអត្តសញ្ញាណ គឺជារឿងចាំបាច់បំផុត ក្រោមទិសស្លោក “មិនត្រូវទុកឱ្យប្រជាពលរដ្ឋខ្មែរណាម្នាក់ គ្មានឯកសារបញ្ជាក់អត្តសញ្ញាណប្រើប្រាស់ឡើយ”។ ក្នុងន័យនេះ សូមឱ្យអ្នកពាក់ព័ន្ធ ត្រូវពន្លឿនការចេញសេចក្តីចម្លង ឬទុតិយតាជូនពលរដ្ឋឱ្យបានឆាប់រហ័ស ត្រូវរៀបចំតាមសន្ទស្សន៍ផែនការដែលបានកំណត់ ដោយក្នុងនោះអគ្គនាយកដ្ឋានបានកំណត់រយៈពេល ២១ថ្ងៃនៃថ្ងៃធ្វើការសម្រាប់ការផលិត និងចែកជូនដល់ដៃពលរដ្ឋ។ ឯកឧត្តមបញ្ជាក់ដែរថា ចំពោះករណីជនបរទេសចូលសញ្ជាតិ គឺមិនអនុញ្ញាតឱ្យចុះបញ្ជីនៅថ្នាក់មូលដ្ឋានឡើយ គឺត្រូវបញ្ជូនមកនាយកដ្ឋានសញ្ជាតិនៃអគ្គនាយកដ្ឋានអត្តសញ្ញាណកម្ម ដើម្បីផ្ទៀងផ្ទាត់ឱ្យបានច្បាស់លាស់ជៀសវាងការក្លែងបន្លំ។ ជាមួយគ្នានេះ ដើម្បីធានាប្រសិទ្ធភាពការងារ ឯកឧត្តមបានជំរុញឱ្យប្រើប្រាស់ប្រព័ន្ធទំនាក់ទំនងទំនើបដូចជា CoolApp, Telegram ឬ WhatsApp សម្រាប់ដោះស្រាយបញ្ហាបន្ទាន់ និងការរាយការណ៍លទ្ធផលប្រចាំថ្ងៃ។ ជាពិសេសរដ្ឋបាលខេត្ត ក៏ត្រូវបូកសរុបរបាយការណ៍ប្រចាំខែ ត្រីមាស ឆមាស និងប្រចាំឆ្នាំ ឱ្យបានទៀងទាត់តាមការកំណត់៕ អត្ថបទ និងរូបភាព៖ លោក ឡៃ បញ្ញា កែសម្រួល៖ លោក អ៊ុន ណារាជ្យ