【沙中線過海首個工作日 今日過咗海但未做神仙】 скачать в хорошем качестве

【沙中線過海首個工作日 今日過咗海但未做神仙】

【大學月台長又彎 安裝閘門挑戰大】 由2000年初構思至今接近20年，東鐵線今日就要面對首個工作日嘅最大挑戰。我喺早上7:40分喺大學站出發視察人流，同時大學站亦係成個東鐵線最彎嘅月台，亦係安裝月台閘門嘅最大挑戰。以往12卡車喺大學站安裝閘門根本就不可能，即使改為9卡車挑戰性仍然十分大。當年由12卡車轉9卡車，除左因為會展站地方唔夠之外，社會對於東鐵線全面安裝閘門都好大訴求。依家東鐵線共有16個車站，只有紅磡，會展，金鐘嘅新月台閘門，其餘13個站就要陸陸續續係3年內安裝好。 【沙田站成新樽頸 扶手電梯設計令某啲車卡持續逼爆】 我今日未到8點到沙田站，留咗大約45分鐘去睇下東鐵線新嘅樽頸位，即係由沙田至大圍站。因為大圍站可以轉乘同分流，而沙田站就係最近大圍站嘅一個大站。喺視察期間，我都留意到幾個現象。 第一，沙田站最逼嘅時間並唔係8點，我8:45 離開時要行到最後一卡先有空位上車，同時反映到高峰期嘅時間已經唔同，未必需要9點到公司。WFH同疫情都帶出一啲新工作模式，令上班嘅高峰時間都有不同。 第二，因為扶手電梯上落位令乘客都停喺最近車卡位置，而列車只停大約30秒，咁短時間乘客大多唔願郁，選擇逼係最就近車卡，港鐵都話好頭痕，諗緊點樣解決。我提出港鐵可以喺比較長嘅站, 根據呢兩日嘅數據睇吓邊個站邊一卡最多人上車，將列車停泊係較前或者較後位置，令較少人嘅車卡可以停喺扶手電梯附近。例如沙田站，月台比較長，可以將架車停喺較前位置。而未來安裝玻璃幕門嘅位置就一定要好小心跟番改善咗嘅停車位，因為一旦裝咗幕門就改唔番。 另外，我地留意到今日港鐵未用盡信號系統，大約2.5分鐘一班，中間可以安排到兩班空車去沙田接乘客。不過港鐵就要重新審視人流情況，安排空車係最高峰嘅時段接載乘客，例如8:30-8:45分。我地又留意到港鐵嘅早鳥時段優惠已經過晒時，現時7:15至8:15前出閘嘅65折優惠，應該跟新嘅高峰期將早鳥優惠推遲至少到8:30，什至8:40，至於頭等卡車我認為已經完成歷史任務，應該取消，如果頭等卡改為普通卡後可以額外增加約80人，多4%載客量，但因為頭等車卡只有兩對門，而一般車卡就有五對，所以唔係簡單轉座位就得，需要啲時間更換整個車卡。我認為如果將來港鐵可以做到2分鐘一班，再配合調整停車位置及優化早鳥優惠措施，東鐵線過海暫時都無問題。 【大圍站長遠發展需配合東西鐵路 以應對將來轉乘問題】 長遠要解決沙田去大圍嘅喺樽頸之外，嚟緊新界北嘅發展將會搬近廿萬人入皇后山、打鼓嶺、坪輋同恐龍坑、到時一定逼爆東鐵。唯一解決嘅方法就係我早前提出嘅東西鐵路，以一條架空輕軌兼部份穿山隧道將打鼓嶺、坪輋、恐龍坑同皇后山接駁去荃灣，途徑大埔工業邨，沙田，大圍同梨木樹。好處就係分流未來新界北嘅二十萬人至大圍，唔使逼爆東鐵接駁屯馬線，東鐵線過海，同時舒緩尖山隧道嘅塞車問題。 喺大圍站有唔少市民落車轉乘，實地視察過後就唔見有政府講嘅3成咁多，屯馬線轉乘東鐵嘅轉乘剛好填補東鐵線嘅空位。不過因為港鐵仍未用盡2分鐘一班車及仲保留緊頭等卡，而早鳥時限又未發揮最高效果，我有信心五年內（古洞站落成前）可以運作暢順。 【會展站天橋四通八達 雖廁所及天橋空間略為不足】 會展站作為東鐵線全新車站，最吸引我嘅唔單止係琴日提到嘅展覽同東鐵歷史圖片外，會展站嘅洗手間都有好多地方值得政府參考，優化現時公廁嘅不足。廁所外有清楚嘅標示俾人知道使用情況，而廁所內嘅鹼液同廁紙就用完嘅時候，會主動通知職員需要更換。不過會展站嘅人流較多，廁所空間同設施就略為不足，分分鐘有入無出。 另外，會展站出口有天橋接駁到唔同地方，成個環境最適合睇煙花，可以多角度望到維港景色。不過會展站出口空間唔大，同時接近電梯。將來有煙花表演時候，人潮管制就要多加留意。另外，會議展覽中心就無行人通道由會展站直達，需要由天橋前往。不過由於歷史問題同發展時間唔同，當年會展喺策劃時，因為無考慮到日後鐵路發展同會展站，所以下層空間變為停車場，無預留空間去做出入口。不過今日由屯門去書展都比以往更加方便，唔需要再轉二次車，長途跋涉，將來屯門出發經紅磡轉一次車就可以到會展。 【金鐘站四線轉乘，由超級轉車站變超級大迷宮】 依家金鐘站就成為全港最複雜嘅站，L2-L3都係荃灣線同港島線轉乘月台，只是方向唔同，而家L5及L6嘅概念就一層一條缐。分別為東鐵線及南港島線月台。 民生無小事，今日我經金鐘站番立法會嘅時候，發現最近立法會嘅E出口竟然冇「立法會大樓」嘅指示，隨即同港鐵反映，我相信好快可以成功爭取加番「立法會大樓」個指示牌喺E出口啦! 今日過海通車雖然未見混亂，但係日後新市鎮發展對鐵路挑戰就大。將來洪水橋，元朗南嘅發展搬近40萬人，而我提出嘅第五條跨張鐵路就要2038年先完成。 2030-2038年將成為新界西北鐵路最迫爆嘅八年，到時可能要係早鳥優惠落重藥先得喇！