Arundhathi Teacher Part 2, Kottarakkara Shah/ voice : indira Pillai അരുന്ധതി ടീച്ചർ രണ്ടാം ഭാഗം ❤️ скачать в хорошем качестве

Arundhathi Teacher Part 2, Kottarakkara Shah/ voice : indira Pillai അരുന്ധതി ടീച്ചർ രണ്ടാം ഭാഗം ❤️

അരുന്ധതി ടീച്ചറുടെ അനുഭവക്കുറിപ്പുകള്‍ ഭാഗം 2 കൊട്ടാരക്കര ഷാ ശബ്ദം: ഇന്ദിര പിള്ള ''അലങ്കാരവും ഫ്ലെക്സുമൊക്കെയുണ്ടല്ലോ..!. എന്റെയീ ഫോട്ടോ എവിടെ നിന്നും സംഘടിപ്പു? " സ്കൂളിനു മുന്നില്‍ ഇറങ്ങുമ്പോ ഒരുപാട് ചോദ്യങ്ങള്‍ മനസ്സില്‍ നിറഞ്ഞു. ടീച്ചർ ഇതൊന്നും സത്യത്തില്‍ ആഗ്രഹിച്ചതുമല്ല, പ്രതീക്ഷിച്ചതുമല്ല. സാധാരണ പോലെ ഒരു വിടവാങ്ങല്‍ പരിപാടി, ഉപഹാരം നൽകി യാത്രയയപ്പ് അതൊക്കെയാണല്ലോ പതിവ്. ഒപ്പിട്ട് സ്റ്റാഫ് റൂമിലേക്കു പോകുമ്പോഴാണ് തൂണിനു സൈഡില്‍ ഒളിഞ്ഞു നിന്നു തന്നെ നോക്കുന്ന ''കുഞ്ഞിത്തല'' ടീച്ചര്‍ കാണുന്നത്. ചമ്മലോടെ ചിരിച്ചു നില്‍ക്കുന്ന വേദാന്തിനെ നോക്കി പുഞ്ചിരിച്ചു കൊണ്ട്, ''ഇങ്ങടുത്തു വാ..'' അവന്‍ പതിയെ അടുത്തെത്തി. ''എന്തേ..?'' വാല്‍സല്യച്ചിരി വിടാതെ ടീച്ചറുടെ ചോദ്യം. ''ടീച്ചറിനി വരില്ലാ പറഞ്ഞു..'' ആ മുഖം മ്ലാനമായി ''ആരാ ന്റെ കുട്ടിയോട് ഇങ്ങനെ പറഞ്ഞത്, ടീച്ചര്‍ക്ക് നിങ്ങളെയൊക്കെ കാണാതിരിക്കാന്‍ പറ്റുമോ.. വരൂട്ടോ... വരാന്തഭിത്തിയോട് ചേര്‍ന്നു കിടന്ന കസേര വലിച്ച് അവനരികിലേക്കിട്ട് അതില്‍ പിടിച്ചു മുട്ടിലിരുന്നു പതിവ് പോലെ ടീച്ചറവനൊരുമ്മ കൊടുത്തു. ''എല്ലാവരും അസംബ്ലിക്കു പോയി. പൊയ്ക്കോളൂ.. ഉച്ച കഴിഞ്ഞ് എല്ലാവര്‍ക്കുമുള്ള ലഡു കൊണ്ടു വന്നിട്ടുണ്ട് ടീച്ചര്‍...'' അവന്‍ തലയാട്ടി ചിരിച്ച്, കവിളു തുടച്ചു കൊണ്ടു പുറത്തേയ്ക്കോടിപ്പോയി. കൊല്ലങ്കോടും, ഒറ്റപ്പാലവും, പാലക്കാടു ടൗണും കഴിഞ്ഞ് കോലഴി സ്കൂളില്‍ സര്‍വ്വീസ് അവസാനിക്കുമ്പോ എന്തൊക്കെ മാറ്റങ്ങളാണ് വിദ്യാഭ്യാസ രീതികളിലും കുഞ്ഞുങ്ങളിലും.... സ്റ്റാഫു റൂമിലേക്കു കയറുമ്പോള്‍ ജന്നല്‍ ഗ്ലാസ് തുടച്ചു കൊണ്ടു നിന്ന ജിമ്മിയോട് ടീച്ചര്‍... ''ആരാ ഈ ബഹളം കൂട്ടി കുട്ട്യോളെ അറിയിച്ചത്? അതാ.. അനീഷ് മാഷ്ടെ പരിപാടിയാ.. നാലു ബിയിലെ.. വേറെയും എന്തൊക്കെയോ ഒപ്പിക്കുന്നുണ്ട്. ടീച്ചറുടെ സെന്റ് ഓഫ് അടിപൊളിയാക്കാന്‍ വാട്ട്സ്ആപ്പില്‍ കമ്മറ്റിയൊക്കെയുണ്ട്. ശരി... ശരി.. നീ പോയി ബെല്ലു കൊടുക്ക് ജിമ്മീ... അത്ര സുഖത്തിലല്ലെങ്കിലും സന്തോഷം പുറമെ തോന്നിക്കുന്ന നിറഞ്ഞ ചിരിയോടെ അരുന്ധതി ടീച്ചര്‍ സ്റ്റാഫ് റൂമിനകത്തെത്തുമ്പോ എല്ലാവരുടെയും മുഖത്ത് മ്ലാനഭാവം.. ചിരി വിടാതെ, ഉള്ളിലെ നീറ്റലൊളിപ്പ് ആത്മവിശ്വാസം പകര്‍ന്ന്, എല്ലാവരെയും കൂട്ടി അസംബ്ലി ഗ്രൗണ്ടിലേക്ക്.. അവസാന ദിവസമായിരുന്നിട്ടും, രണ്ടു പീരീഡ് ടീച്ചര്‍ ചോദിച്ചു വാങ്ങിയത് മനപൂര്‍വ്വമായിരുന്നുവെന്ന് സഹപ്രവര്‍ത്തകര്‍ക്കറിയാമായിരുന്നു. രണ്ടാം പീരീഡ് കയറിയാ മതി. ബോബന്‍ സാറൊഴികെ എല്ലാവരും ക്ലാസ്സുകളിലേക്കു പോയി. ബോബനെന്തോ നോട്ട്സ് തയ്യാറാക്കുന്ന തിരക്കിലായിരുന്നു. അപ്പോഴാണ് ജന്നലിനടുത്തൊരു കുഞ്ഞു തല.. വേദാന്താണ്.. ചോക്കെടുക്കാനെന്നും മറ്റും കാരണം കണ്ടെത്തി ക്ലാസ്സ് ലീഡർ സ്ഥിരമായി സ്റ്റാഫ് റൂമിൽ വരാറുണ്ട്. എന്റെ ഉമ്മയാണവന്റെ ലക്ഷ്യം. രാവിലെ കിട്ടിയതു പോര. അവനു മുഖത്തു ഞാൻ പോകുന്നു എന്ന സങ്കടവുമുള്ളതു പോലെ.. : ഇങ്ങടുത്തു വാ... : ചോക്കെടുക്കാൻ.... അവൻ പറഞ്ഞു മുഴുമിച്ചില്ല. ടീച്ചറെണീറ്റ് ഷെൽഫിൽ നിന്നും 2 ചോക്കെടുത്തു കൊടുത്തു കൊണ്ട് : "താഴെയിട്ടൊടിക്കാതെ സൂക്ഷിച്ചു കൊണ്ടു പോയി മാഷ്ക്ക് കൊടുക്ക.." ഒരുമ്മയും കൊടുത്തപ്പോ അവൻ ഹാപ്പിയായി ഓടിപ്പോയി. കഴിഞ്ഞ വര്‍ഷം, ഇവിടെ ജോയിന്‍ ചെയ്ത സമയം.. ഒരു ദിവസം വൈകുന്നേരം ... സ്കൂളു വിട്ടിട്ടും പോകുന്നില്ല വേദാന്ത്. അന്നെനിക്കവനെ അറിയില്ല. മുകളിലത്തെ നിലയിൽ കറങ്ങി കറങ്ങി നിൽക്കുന്നു. കൂടൊരു കുട്ടിയുമുണ്ട്. "നീ എന്താ പോകാത്തത്" ഒന്നും മിണ്ടുന്നില്ല. പിന്നേം പീന്നേം ഞാൻ ചോദിച്ചപ്പോ കുടെയുള്ള കുട്ടി പറഞ്ഞു : "ടീച്ചർ അവൻ ഉമ്മ വയ്ക്കാൻ നിക്കുവാ..." ശരിക്കും ഞെട്ടി ഞാൻ "ഉമ്മ വയ്ക്കാൻ നിക്ക്യേ.. എന്താ കാര്യം..?" "അവന്റെ ലൈനിനെ ഉമ്മ വയ്ക്കാൻ നിക്കുവാ.." ഞാൻ ചിരിച്ചു പോയി. മൂന്നാം ക്ലാസ്സിൽ പഠിക്കുന്ന കുട്ടി..! ലൈൻ രണ്ടാം ക്ലാസ്സിൽ..!! ലൈനിനെ ഉമ്മ വയ്ക്കാൻ തേർഡ് ഫ്ലോറിൽ വെയിറ്റ് ചെയ്തു നിൽക്കുന്ന അവനെ കുറേ നേരം ഞാൻ അതിശത്തോടെ നോക്കി നിന്നുപോയി. ഞാൻ പറഞ്ഞു. "ടീച്ചറു തരാം ഉമ്മ... വാ.. നമുക്ക് താഴക്കിറങ്ങി പോകാം.." അവനെ താഴേക്ക് കൂട്ടി കൊണ്ടു വന്നു. (തുടരും)