【屯馬線揭幕】短貴長平何時了？東鐵幕門裝得未？邊條線「受害」最深？阿田親自試搭 同你逐一剖析 скачать в хорошем качестве

【屯馬線揭幕】短貴長平何時了？東鐵幕門裝得未？邊條線「受害」最深？阿田親自試搭 同你逐一剖析

萬眾期待，自構思至落實，橫跨30年，今日屯馬線終於正式全線通車。呢條鐵路，當年我做九鐵主席時，已經積極落標爭取，往後在位立法會議員，每時每刻都全力監察，至今完工一大半 (尚欠紅磡至金鐘過海段)，我當然立即「落場」試搭，好想親身經歷呢一趟旅程，亦有人問我，試搭心情係點？我可以話，呢一次有喜有憂，喜新鐵路嘅便利，憂後續各項工程落實：過海段尚未完工，港鐵仍須努力。 #短貴長平現象或須8年調節 為咗唔好阻住市民，我特登揀非繁忙時間去，7分鐘一班車，想搭嘅朋友可以留意下時間。路線方面，我知道最多人關注「短貴長平」，我揀咗最能體現短貴長平嘅站嚟行，由大圍坐屯馬線去紅磡，頭尾8個站，行車時間大概20分鐘，八達通車費$6.2（單程票$6.5），但係同樣由大圍，坐屯馬線去何文田，頭尾少一個站，八達通$9.6（單程票$11）。 點解會有呢個怪現象，就係因為之前東鐵大圍搭去紅磡好近，頭尾4個站，去何文田反而要係九龍塘轉落觀塘線更遠，頭尾7個站，所以前者平啲，後者貴啲，而家開通咗屯馬線，就咁用屯馬線數車站，變咗何文田反而近咗，出現「短貴長平」。 我知道呢個問題要解決，具體點做呢? 要知道可加可減機制下，各個站收費可以加減5%，最尾條配合到條大數就得，即係話，票價差少少嘅站，兩三年可能就調節到，但係大圍去紅磡或何文田，至少5年先搞得掂： 大圍出發往 : 何文田 每年減5% / 紅磡 每年加5% (八達通計價) 目前票價 : 9.6 / 6.2 第1年 : 9.1 / 6.5 第2年 : 8.7 / 6.8 第3年 : 8.2 / 7.2 第4年 : 7.8 / 7.5 第5年 : 7.4 / 7.9 不過係咪5年搞得掂呢? 我睇未必，去何文田減價肯定無事，但係去紅磡加價，正常人都唔肯，港鐵實有阻力，估計呢度可能要用多兩至三年。 #東鐵幕門料2024年底完成安裝 另一樣要時間嘅嘢，就係東鐵幕門。港鐵點都唔肯答實幕門幾時搞得掂，廢事日日俾人追數。不過實情係咁，以前12卡車，月台彎彎曲曲好長，好難裝，而家9卡車直咗好多，所以動工在望。2022年第2季至第3季，相信可以轉晒9卡車，港鐵內部消息話裝幕門要2年，所以估計2024年年底，先會有齊啲幕門，保障大家安全。 上車之前，我哋可以係月台睇下新嘅「車廂載客情況顯示屏」(綠色客量少於一半、黃色一半至滿載、紅色已經滿載), 即係好想有坐位嘅乘客， 最好一早行去綠色車卡位等，不過，繁忙時間，我相信只有大部份紅色卡，頭尾或有黃色卡乘下， #宋皇臺站文物美食薈聚 其他站或者只係交通工具一部分，但係宋皇臺站絕對會令人歡喜雀躍，因為呢度就係大家成日提起嘅九龍城區美食區，最出名嘅泰國菜越南菜，以後要食都方便啲，唔使再係九龍塘轉小巴；如果想睇下大城舊區，呢度都絕對適合；至於宋元古蹟，除咗大家熟知嘅「宋王臺」外，大批文物更可於站內欣賞。（唯一想提嘅係，當年好出名要保育嘅古井，暫時政府未批准開放睇得，希望盡快搞掂） 值得一提嘅係，以前九龍城一帶，「內部交通網絡」都唔算方便，舉例行路面，由亞皆老街到世運道要20分鐘，仲要日曬雨淋，今日開始，宋王臺B出口，5分鐘有冷氣嘅路程，就可以一次過打通4條大街道（太子道西、亞皆老街、馬頭涌道、世運道），行過少少到埋界限街添！ 我當年更加積極爭取呢度起行人輸送帶，5分鐘都唔使行，好似港鐵尖沙咀去尖東個段路咁，可惜因為路面太窄既緣故，一條輸送帶都起唔到，美中不足。 啟德規劃成沙中線落實契機 講個小資料俾大家知，土瓜灣，馬頭圍一帶，固然需要鐵路方便市民出入，但係政府咁多年嚟，都覺得呢啲舊區增長有限，所以一直由佢無理。真正令政府「回心轉意」嘅，係啟德發展區，呢度會多好多基建，房屋，多好多人出入，所以「為政府提供誘因」，乘勢成條新鐵路起。 講開新鐵路緣起，我又講個題外話，政府打算係新界北落實新發展區，足足住20萬人口，我去問鐵路專家，呢個地方起鐵路係咪可行，收到嘅消息係，20萬人唔夠支撐千億新鐵路，如果起支線，就要駁落上水粉嶺，經東鐵線出市區，我一聽就知不妙，東鐵線而家都咁逼，通關後將更難上車，如果再加20萬人落嚟，後果不堪設想，如果政府硬上馬，我恐怕無法支持。 #紅磡站鋼筋螺絲帽難忘 落到紅磡站月台，先睇2018年5月開始，鬧出大頭佛嘅「剪短鋼筋」，「無扭入螺絲帽」位置，其實就係往屯門方向月台，5-1車門開始，往大號碼車廂數過去一大塊牆都關事，搞到咁，我最難過莫過於此，希望港鐵前事不忘，後事之師。 另外，早個零禮拜，紅磡站東鐵線月台，轉過西鐵線只係對面，幾秒鐘路程，但係依家由東鐵線去屯馬線就要由地底月台上大堂，再落地底另一個月台，麻煩好多，無冷氣焗住行3-4分鐘先到。 ＃過海指示牌可以更清晰 而家港鐵係地下貼咗貼紙，指住去東鐵線，或者屯馬線，但係乘客如果想過港島，到底具體點行？就未必咁清楚，如果可以係東鐵線上來屯馬線尾示牌下截加貼「往金鐘」咁就好好多。再者，明明隔離就係扶手電梯，但係而家地面指示，係指大家去行樓梯，呢啲細節位應該做得更好。 ＃荃灣線今日開始成「受害者」 明年過海段未通車前，搭港鐵由大圍去金鐘有兩個方法： 1）由大圍坐港鐵到金鐘，八達通票價$16.2，可以經紅磡轉去尖東；或者經九龍塘轉旺角；或者經何文田轉油麻地，再轉荃灣線過金鐘 2）由大圍坐港鐵去紅磡，再轉巴士$16.8 兩個方法都要轉一大輪車，好攰好熱好難頂。特別係全程坐港鐵，尖沙咀站同油麻地站，以前繁忙時間已經逼爆上唔到車，而家再加埋屯馬線嘅「新客」，我幾敢肯定，未有沙中線過海段之前，全部人都會有微言！ #爭取沙中線過海段明年第二季通車 咁過海段幾時通車? 港鐵原本預計係2022年第一季，但因為港鐵信號系統遲咗5個月搞掂，原本目標都要順延。我今個月初係立法會問港鐵CEO，如期通車係唔係要等「神蹟」? 佢坦白承認我講得有道理。按照信號系統延期推算，過海段要明年第三季先搞得掂，我而家爭取緊第二季開通，唔好要大家捱咁耐，對市民同港鐵都無好處，事實上，當年搞沙中線嘅時候，概念係「沙田至中環」，過海係關鍵，如果南北一直唔完工，呢條線「算甚麼東西」? 一如之前咁講，沙中線通車之後會變成9卡車，變相每架列車可以坐既人會少左，乘客肯定要等耐咗車。不過，亦正正因為9卡車頭尾短咗，兩車距離唔使咁遠，係唔係又可以加密返啲班次呢? 如果做到1分鐘至1分半鐘一班，有無可能繁忙時間無咁逼呢? 港鐵處唔處理到安全問題呢? 我會逐樣同港鐵傾，為市民爭取。 #鐵路署 監督港鐵 完善香港鐵路系統長遠發展 亦都因為種種考慮，我2018年開始，已經主張要有鐵路署，全面監督港鐵，唔好比佢出大事，政府而家話2022/23年度落實，我好歡迎，愈快愈好。有人話，引入競爭會唔會令港鐵做得好啲? 港鐵受壓力，肯定唔敢太俹簁，但係同時會出現好多問題，對香港人未必係好事。 舉個例，巴士而家有競爭，但係你買咗九巴月票，明明城巴架車都可以去同一個地方，但就唔收你張九巴月票，更甚者，兩巴聯營路線，都唔容許你用月票上「下一班車」，一定要等到九巴嚟先上得，咁已經好麻煩。而港鐵而家係由得你點搭，只計起點同終點收費。 再講，將來如果真係有新公司做鐵路，點樣安排轉車同接駁? 港鐵成日話自己係上市公司，肯唔肯俾新公司「免費」駁落自己個站度，再帶啲客走? 所以我話政府唔好再「耍」我同香港市民，未來各條新線，唔好用咁多時間搞咩招標研究，嗱嗱聲同港鐵坐低傾好數，從速落實新鐵路，咁先係造福香港市民嘅德政！