Göytəpədə bu körpüdən keçənlər, təhlükə ilə üz-üzə qalırlar скачать в хорошем качестве

Göytəpədə bu körpüdən keçənlər, təhlükə ilə üz-üzə qalırlar

Ələt-Astara magistralının 91-ci kilometrliyinin Cəlilabadın Göytəpə şəhərindən keçən hissəsində, eyni adlı çayın üzərindəki, respublika əhəmiyyətli körpü uçmaq təhlükəsi ilə üz-üzə qalıb.10 ildən artıqdır ki, qəzalı vəziyyətə düşən körpü, hər an istər piyadalar, istərsə də sürücülər üçün təhlükə mənbəyinə çevrilə bilər. 1966-ci ildə inşa edilərək əhalinin istifadəsinə verilən körpü bu illər ərzində təmir edilmədiyi üçün dayaqlar köhnəlib və çatlar əmələ gəlib. Gördüyünüz kimi, respublika əhəmiyyətli körpünün yaxın vaxtlarda konstruksiyaları dəyişdirilməzsə ərazidə bədbəxt hadisə qaçılmaz olacaq. Körpünün piyadalar üçün nəzərdə tutulan hissəsi də qəzalı vəziyyətdədir. Sakinlər deyir ki, əvvəllər Göytəpə çayı üzərində taxta körpü fəaliyyət göstərirdi. 50 il bundan əvvəl çay üzərində sözü gedən körpünü inşa etdilər. Amma körpüdə piyadalar üçün keçid nəzərdə tutulmadığı üçün sonralar sakinlər gediş-gəlişləri üçün körpünün kənarından istifadə etməyə başladılar. 1990-ci ildə sakinlərin şəxsi vəsaiti hesabına piyadalar üçün körpü inşa edilsə də heç bir qurumun balansına verilməyib. Nizami Əbişov - Cəlilabad sakini “Qorxuram. Təhlükəlidir. Hər an aşa bilər, hər an hadisə ola bilər. Buradan uşaqlarda düşə bilər.” Azər Nadirov - Cəlilabad sakini “Buradan məktəblilər keçir. Balaca uşaqlar keçir. Bunun piyada keçidi də təhlükəlidir, barmaqlıqları da təhlükəlidir. Körpə uşaq düşər oradan və bir dəqiqənin badına gedər.” Mircəlal Həsənov - Cəlilabad sakini “İstiyərdim ki, körpü bərpa olunsun. Həm böyüklər, həm də kiçiklər üçün buradan keçmək qorxuludur. Hər an uça bilər.” Cəlilabad rayon 56 saylı Yol İstismar İdarəsindən bildirdilər ki, körpünün hazırki vəziyyətindən onların xəbəri var. Ötən ay müəssisənin hesabat cədvəlində körpünün istifadəyə yararsız vəziyyətdə olması göstərilib, və bu barədə Fövqaladə Hallar Nazirliyinə məlumat verilib. Qeyd edilib ki, körpünün hər iki hissəsində sakinlərin istifadəsi təhlükəlidir. Körpünü qəzalı vəziyyətə salan amillərdən biri də hər gün ağır tonlu maşınların körpü üzərindən hərəkət etməsidir. İnşası zamanı yalnız 20 tonluq maşınlar üçün nəzərdə tutulan körpüdən indi 40 tonluq maşınlar da istifadə edir. Hazırda qəzalı vəziyyətdə olan körpünün təmiri ilə maraqlanan təşkilat yoxdur. Hər gün üzərində avtomobillərin hərəkət etdiyi dövlət əhəmiyyətli körpü indi Allahın ümüdünə qalıb. Bildirək ki, qəzalı vəziyyətdə olan körpü Göytəpə şəhərini paytaxtla birləşdirən yeganə körpüdür.