San Mateo 5, 17-37. Evangelio en Q'eqchi': Domingo 15 de febrero 2026. скачать в хорошем качестве

San Mateo 5, 17-37. Evangelio en Q'eqchi': Domingo 15 de febrero 2026.

Evangelio en Q'eqchi': Domingo 15 de febrero 2026. San Mateo 5, 17-37. “Meek'oxla naq xinchalk chi xsachb'al xwankil li xChaq'rab' laj Moisés ut eb' li Propeet; ink'a' xinchalk chi xsachb'al a'an, xinchalk b'an re naq tz'aqloq ru. Relik chi yaal ninye eere: naq toj wanq li choxach'och', maajun xleetril chi moko xch'ina eetalil li Chaq'rab' taanume'q chi ink'a' ta xb'enwa taak'ulmanq chixjunil. Jo'kan utan, li ani taaq'etoq junaq reheb' li chaq'rab' a'in jwal kach'in ut tixk'ut chi jo'kan chiruheb' li tenamit, a'an jwal kach'inaq sa' li xnimajwal wankilal li choxa; a'ut li taapaab'anq re ut tixk'ut, a'an nimaq xloq'al sa' li xnimajwal wankilal li choxa. “Xb'aan naq ninye eere: wi leetiikilal ink'a' naxq'ax ru li xtiikilaleb' laj tz'iib' ut eb' laj pariseey, ink'a' tex'ok sa' li xnimajwal wankilal li choxa. “Eerab'ihom resil li yeeb'il chaq reheb' li qaxe' qatoon: «Matkamsink; li taakamsinq, wanq xmaak sa' li raqleb'aal aatin». A'ut laa'in ninye eere: Wi junaq taajosq'o'q rik'in li ras riitz'in, wanq xmaak sa' li raqleb'aal aatin; ut li tixhob' li ras riitz'in, wanq ajwi' xmaak ut taak'ame'q chiruheb' li xninqal ru aj raqol aatin; ut li tixmajewa li xkomon, wanq xmaak re xik sa' xxamlel li xb'alb'a. “Jo'kan utan, naq yookat chi xyeechi'inkil laamayej sa' li artal, wi aran xnaqk sa' aach'ool naq laa'at ut laawas aawiitz'in wank eech'a'ajkilal, kanab' wan laamayej chiru li artal ut ayu xb'enwa chi xk'amb'al aawib' sa' usilal rik'in laawas aawiitz'in; toja' naq tatsutq'iiq chaq ut taayeechi'i laamayej. “Chak'am aawib' sa' usilal chi junpaat rik'in li xik' na'ilok aawe, naq toj rochb'eenat sa' b'e. Mare anchal tatxq'axtesi chiru laj raqol aatin, ut laj raqol aatin tatxq'axtesi sa' ruq' li xtaql li chaq'rab', ut tate'xk'e sa' tz'alam. Relik chi yaal ninye aawe naq ink'a' tat-elq chaq aran toj reetal taatoj rix chixjunil laak'as. “Eerab'ihom resil naq kiyeemank: «Matmuxuk sumlaak». A'ut laa'in ninye eere naq chixjunil li tixka'ya junaq ixq ut tixrahi ru, ak xmux a'an sa' xch'ool. “Ut wi xsa' laawu li wank sa' laanim nak'ehok aawe chi maakob'k, isi ut tz'eq; jwal us cho'q aawe naq taasachq junaq laacha'al chiru naq laajunxaqalil taakutmanq sa' xb'alb'a. Ut wi laanim uq' nak'ehok aawe chi maakob'k, yok' ut tz'eq; jwal us cho'q aawe naq taasachq junaq laacha'al chiru naq laajunxaqalil taaxik sa' xb'alb'a. “Jo'kan ajwi' kiyeemank: «Ani tixkanab' li rixaqil, tento naq tixk'e xhuhil li jachok ib'». A'ut laa'in ninye eere naq chixjunil li tixkanab' li rixaqil, wi ink'a' yal laq'lo rik'in, tixk'e li ixq chi xmuxb'al li xsumlajik. Ut ani taasumlaaq rik'in junaq kanab'anb'il ixq, taamuxuq sumsu. “Eerab'ihom ajwi' resil li yeeb'il chaq reheb' li qaxe' qatoon: «Maak'e li jurament sa' tik'ti', chab'aanu b'an li xayeechi'i re li Qaawa' rik'in jurament». A'ut laa'in ninye eere: maajun wa teek'e jurament sa' xk'ab'a' li choxa, xb'aan naq a'an xk'ojarib'aal li Yos; chi moko sa' xk'ab'a' li ruuchich'och', xb'aan naq a'an xna'aj li roq; chi moko sa' xk'ab'a' Jerusalén, xb'aan naq a'an xtenamit li xnimal ru Awab'ej. Chi moko tatk'ehoq jurament sa' xk'ab'a' laajolom, xb'aan naq ink'a' tatruuq xb'aanunkil naq saqaq malaj q'eqaq junaq laawismal. Jo'ka'in b'an teeb'aanu: wi tento teeye naq yaal, junes «yaal» teeye. Ut wi tento teeye naq ink'a', junes «ink'a'» teeye. Li k'aru natiqok ruheb' li aatin a'in, rik'in chik li maa'us nachalk chaq. Raatin li Qaawa'.