Սերժ Սարգսյանն այցելել է Պարույր Սևակի տուն скачать в хорошем качестве

Սերժ Սարգսյանն այցելել է Պարույր Սևակի տուն

Սյունիքի և Վայոց Ձորի մարզերում նախընտրական հանդիպումներից հետո` Երևան վերադարձի ճանապարհին, Հայաստանի նախագահ, ՀՀ նախագահի թեկնածու Սերժ Սարգսյանն այսօր կանգ է առել նաև Արարատի մարզի Զանգակատուն գյուղում: Առիթը մեծանուն գրող Պարույր Սևակի ծննդյան օրն էր: Սերժ Սարգսյանն ծաղիկներ է դրել նրա ու տիկնոջ` Նելլի Մենաղարաշվիլու գերեզմանին: Նախագահը այցելել է նաև Սևակի տուն-թանգարան, որտեղ նրան հյուրընկալել են գրողի որդին` Արմեն Ղազարյանը, և նրա ընտանիքի անդամները: Սևակի տանն այսօր շատերն են հյուրընկալվել` նշելու գրողի տարեդարձը: Այդ իսկ պատճառով տանտերերը` Արմեն Ղազարյանն ու Գայանե Դանիելյանը, անսպասելի այցից իրենց տպավորությունները կիսելու ժամանակ առայժմ չունեին: Panorama.am-ի հետ զրույցում տիկին Գայանեն միայն տեղեկացրեց, որ նախագահն այցելել է Սևակի շիրմին, եղել տանը, շրջել թանգարանում: Ինչ վերաբերում է նախագահի հետ կայացած զրույցին, տիկին Գայանեն տեղեկացրեց, որ ներկա չի եղել, սակայն գիտեր, որ քննարկվել է հաջորդ տարի Պարույր Սևակի 90-ամյակը պատշաճ ու արժանավայել կազմակերպելու անհրաժեշտությունը: Նշենք, որ այսօր` հունվարի 24-ին լրացավ ականավոր բանաստեղծ ու գրականագետ Պարույր Ղազարյանի 89-ամյակը: 1971 թվականի հունիսի 17-ին 47 տարեկան հասակում ավտովթարի հետևանքով մահկանացուն կնքած բանաստեղծը համարվում է 20-րդ դարի հայ պոեզիայի կարկառուն ու ամենասիրված ներկայացուցիչներից մեկը: Չնայած գործունեության բնույթին ու զբաղվածությանը, Սևակը մինչև կյանքի վերջ նվիրված էր հայրենի գյուղին ու հարազատ միջավայրին: Նաև այս պատճառով ցավալի ավտովթարից հետո նրա և տիկնոջ աճյունն ամփոփում են հարազատ Չանախչի գյուղում, որն ի պատիվ հեղինակի անկրկնելի պոեմի վերանվանվել է Զանգակատուն: Պարույր Սևակի շիրիմը գտնվում է հենց այն տան բակում, որը գրողն իր ձեռքով է կառուցել և որտեղ ապրել է մինչև կյանքի վերջը: Մեր օրերում, չնայած հեռավորությանը, Սևակի շիրիմն ուխտատեղի է դարձել, իսկ բնակարանը` թանգարան: