Letër dëshmorit Arsim Rexhepi, nga mbesa e tij Ajana Elezi.. скачать в хорошем качестве

Letër dëshmorit Arsim Rexhepi, nga mbesa e tij Ajana Elezi..

I dashtun dajë Arsim, Sot jam këtu te varri yt, e rrethueme prej shokëve e shoqeve të mia, drejtoreshës së shkollës sonë, mësuesve dhe krejt komunitetit tonë shkollor. Ndërsa shikoj pllakën e varrit tand, ndjej nji përzierje emocionesh: krenari, dhimbje, mall e mirënjohje. Jemi mbledhë këtu për me të nderu dhe për me të kujtu me respekt e dashni të madhe. Dajë, na mungon çdo ditë. Edhe pse s'kam pas fatin me të njoftë personalisht, tregimet e familjarëve dhe gjyshit më kanë msu shumë për ty. Ata flasin për ty me nji dashni të thellë e respekt të madh. Trimnia dhe guximi yt janë nji frymëzim për krejt neve. Ti ishe nji njeri i jashtëzakonshëm, nji luftëtar që dha gjithçka për drejtësinë dhe lirinë e vendit tonë. Mami shpesh më tregon për humorin tand e për dashninë që kishe për familjen. Ajo na rrëfen për ditët kur ktheheshe në shtëpi, i lodhun por gjithmonë me nji buzëqeshje të madhe, tu' u përpjekë me na mbajtë shpirtin lart. Krejt familja jonë të kujton me mall e respekt. Një nga gjanat që më bën më krenare është fakti që shkolla ku mësoj mban emrin tand. Mami punon me shumë përkushtim në këtë shkollë dhe çdo ditë përpiqet me kujtu dhe nderu kujtimin tand. Ajo na mëson se sa e randësishme është me kujtu dhe çmu sakrificat që janë ba për ne. Çdo ditë, kur hyjmë në shkollë dhe shohim emrin tand në hyrje, ndjej nji ndjenjë të veçantë përgjegjësie dhe krenarie. Në shkollën tonë, drejtoresha, mësuesit e nxansit kujtojnë çdo ditë historinë tande. Çdo vit organizojmë aktivitete për me nderu kujtimin tand dhe për me tregu çfarë ke ba për ne. Mësuesit na flasin për trimninë dhe sakrificën tande, tu' na frymëzu që të jemi të guximshëm dhe të drejtë si ti. Nxansit kanë dëgju për historitë e tua dhe janë frymëzu prej sakrificës tande. Disa prej tyne kanë shprehë dëshirën me ndjekë hapat e tu, me u ba të guximshëm dhe të drejtë si ti. Dajë, sot nuk jemi vetëm ne këtu. Kanë ardhë edhe shumë të afërm të tjerë, bashkëfshatarë dhe shokët e tu të luftës. Ata, që kanë luftu krah për krah me ty, me kujtu dhe me nderu sakrificën tande. Edhe komandanti yt ka ardhë me ba homazhe te varri yt, dhe ka nda me ne kujtime nga koha e luftës, duke na tregu për trimninë dhe vendosmërinë tande. Përjetimet e tyne janë tregime të gjalla që na frymëzojnë me mbajtë gjallë idealet për të cilat ti luftove. Gjatë këtij përkujtimi, babai yt qëndron me krenari dhe mallëngjim, duke të kujtu me lot në sy dhe zemër të mbushun me kujtime. Ai shpesh na rrëfen për fëmijërinë tande dhe për momentet e bukura që kaluat bashkë. Gjyshi Rexh është nji burrë krenar për sakrificën që ke ba, por edhe i përmalluem për humbjen e madhe që ka përjetu. Gjithashtu, më kujtohet nji moment prekës kur mami tregoi për nanën, e cila tani prehet në paqe. Ajo jetoi me mall për ty, dhe tash, me shpresë se të ka taku ty në botën tjetër, prehet e qetë. Gjyshja Halide të deshti shumë dhe sakrificat e saj për familjen tonë janë të pamata. Kujtimi i saj na mbush me dashni dhe frymëzim, e besoj se tash ajo dhe ti jeni bashkë, tu' u kujtu për ditët e vjetra dhe tu' vështru mbi ne me dashni e krenari. Dajë, ti je nji hero për krejt neve. Ne që jemi këtu sot, jemi dëshmitarë të jetës dhe veprës tande të madhe. Është detyra jonë me mbajtë gjallë kujtimin tand, me tregu historinë tande dhe me siguru që brezat e rij të kuptojnë vlerën e lirisë dhe sakrificën që është ba për të. Ne do të përulemi para varrit tand, duke mbajtë mend se gjaku yt është fara e lirisë sonë. Le të bëjmë homazhe me respekt dhe mirënjohje të thellë, duke premtu se kurrë nuk do të harrojmë dhe kurrë nuk do të tradhtojmë gjakun tand. Me dashni e krenari të madhe, mbesa jote Ajana...