Раиси вилояти Хатлон дар ноҳияи Вахш 21.02.2026 скачать в хорошем качестве

Раиси вилояти Хатлон дар ноҳияи Вахш 21.02.2026

#Раиси_вилояти_Хатлон_дар_ноҳияи_Вахш ҚАБУЛИ САЙЁРИ РАИСИ ВИЛОЯТИ ХАТЛОН ДАР НОҲИЯИ ВАХШ Имрӯз, 21 феврал, дар маҷлисгоҳи Мақомоти иҷроияи ҳокимияти давлатии ноҳияи Вахш аз ҷониби раиси вилояти Хатлон Давлаталӣ Саид қабули сайёри шаҳрвандон баргузор гардид. Дар қабули сайёр 13 нафар шаҳрвандон оид ба ҷудо намудани қитъаи замин барои сохтмони корхонаи саноатӣ ва фермаи чорво, иваз намудани симчӯбҳои барқӣ, дастрас намудани гранти раиси вилоят, ҷудо намудани қитъаи замини наздиҳавлигӣ, ҷудо намудани қитъаи замин барои сохтмони кӯдакистон ва дигар мавзуъҳо дархости мусоидати раиси вилоятро намуданд. Раиси вилоят Давлаталӣ Саид ба масъулини идораҳои вилоятӣ ва ноҳиявӣ ҷиҳати баррасии саривақтӣ ва расидагӣ ба арзу муроҷиати шаҳрвандон дастуру супоришҳои мушаххас доданд. Бо итминон изҳор гардид, ки масъалаҳои пешниҳодшуда таҳти назорати ҷиддӣ қарор гирифта, барои ҳалли онҳо кӯшишҳои ҳамаҷониба ба роҳ монда мешаванд. Ҳамчунин, раиси вилояти Хатлон Давлаталӣ Саид бо фаъолон ва роҳбарони сохторҳои мақомоти иҷроияи ҳокимияти давлатии ноҳия мулоқот намуда, вобаста ба натиҷаҳои рушди иҷтимоиву иқтисодӣ, вусъати корҳои ободониву созандагӣ, бунёду азнавсозии муассисаҳои таълимӣ, тиббӣ ва варзишӣ, баланд бардоштани сифати хизматрасонӣ, истифодаи самараноки замин, рушди сайёҳӣ ва таҳкими корҳои идеологӣ ибрози назар карданд. Ҳамзамон, ба масъалаҳои пешгирии шомилшавии ҷавонон ба ҳизбу ҳаракатҳои ифротӣ, таълимоти ғайриқонунии динӣ ва тақвияти корҳои фаҳмондадиҳӣ бо усули “Хона ба хона” таваҷҷуҳи ҷиддӣ зоҳир гардида, ҷиҳати ҳалли масъалаҳои мавҷуда ба масъулин дастуру супоришҳои мушаххас дода шуданд. ИШТИРОКИ РАИСИ ВИЛОЯТ ДАР МАЪРАКАИ НИҲОЛШИНОНӢ ДАР МАҶМААИ ФАРҲАНГИИ «ОФТОБАК» Имрӯз, 21 феврал, зимни сафари кории раиси вилояти Хатлон Давлаталӣ Саид ба ноҳияи Вахш дар Маҷмааи фарҳангии «Офтобак» дар маъракаи ниҳолшинонӣ иштирок намуданд. Дар доираи ин иқдоми сабзкорӣ бо иштироки масъулони маҳаллӣ ва фаъолони ҷомеа ниҳолҳои ороишӣ ва сояафкан шинонида шуда, ба ободонӣ ва зебоии муҳити атроф заминаи мусоид фароҳам оварда шуд. Таъкид гардид, ки кабудизоркунӣ ва ҳифзи муҳити зист аз самтҳои муҳими сиёсати давлатӣ ба ҳисоб рафта, саҳмгузорӣ дар ин раванд вазифаи ҳар як сокини кишвар мебошад. Бояд зикр намуд, ки тибқи нақшаи Барномаи давлатии кабудизоркунии Ҷумҳурии Тоҷикистон дар вилояти Хатлон барои соли 2026 шинонидани 600 ҳазор бех дарахтони ороишӣ, сояафкан, ҳамешасабз ва мевадор, инчунин 9 миллиону 95 ҳазору 140 дона гулу гулбутта пешбинӣ гардидааст. Ин нишондиҳандаҳо аз таваҷҷуҳи ҷиддӣ ба беҳдошти муҳити зист, баланд бардоштани фарҳанги шаҳрнишинӣ ва фароҳам овардани муҳити солим барои аҳолӣ дарак медиҳанд. Иштироки раиси вилоят дар маъракаи ниҳолшинонӣ нишонаи дастгирии амалии сиёсати кабудизоркунӣ ва ташвиқи аҳолӣ ба корҳои ободониву созандагӣ арзёбӣ мегардад. ВАХШ: БОЗДИДИ РАИСИ ВИЛОЯТ АЗ РАФТИ КОРҲОИ СОХТМОНИИ БИНОИ ИЛОВАГӢ ДАР НАЗДИ МУАССИСАИ ТОМАКТАБИИ №1 Имрӯз, 21 феврал, зимни сафари корӣ раиси вилояти Хатлон Давлаталӣ Саид дар шаҳраки Вахши ноҳияи Вахш аз рафти корҳои сохтмони бинои иловагӣ дар назди муассисаи томактабии №1 боздид ба амал оварданд. Бинои иловагӣ барои 80 нафар кӯдак пешбинӣ гардида, бо ташаббуси имомхатибони масҷидҳои ноҳияи Вахш дар кӯчаи ба номи Борбади Марвазӣ бунёд мешавад. Ин иқдоми хайрхоҳона ҳамчун намунаи ҳамкории созандаи ҷомеаи шаҳрвандӣ дар рушду ободонии соҳаи маориф арзёбӣ мегардад. Раиси вилоят нахуст бо ходимони дин мулоқот намуда, саҳми онҳоро дар бунёди иншооти иҷтимоӣ намунаи олии ватандӯстӣ, масъулиятшиносӣ ва ғамхорӣ нисбат ба насли наврас унвон карданд. Таъкид гардид, ки ташаббусҳои неку созанда дар самти дастгирии соҳаи маориф ва тарбияи кӯдакон бояд минбаъд низ густариш ёбанд. Зикр шуд, ки чанде қабл низ бо ташаббуси ходимони дин дар ноҳия китобхона бунёд гардида буд, ки имрӯз ба сокинон хизмат мерасонад. Дар идомаи боздид раиси вилоят бо кормандони муассисаи томактабии №1 ба номи «Афсона» вохӯрӣ намуда, аз шароити таълиму тарбия ва имкониятҳои фароҳамгардида барои кӯдакон шинос шуданд. Масъулон иттилоъ доданд, ки бо мавриди истифода қарор гирифтани бинои нав шумораи кӯдакони фарогирифтаи муассиса зиёд гардида, шароити боз ҳам беҳтари таълиму тарбия фароҳам оварда мешавад. Таъкид гардид, ки корҳои ободониву созандагӣ дар тамоми шаҳру ноҳияҳои вилояти Хатлон бо маром идома дошта, бунёди муассисаҳои таълимӣ ва томактабӣ аз самтҳои афзалиятноки сиёсати иҷтимоии давлат ба шумор меравад. ИФТИТОҲИ КОРХОНАИ ИСТЕҲСОЛИ ПОЛИЭТИЛЕН (ПЛЁНКА) ДАР НОҲИЯИ ВАХШ Имрӯз, 21 феврал, зимни сафари корӣ раиси вилояти Хатлон Давлаталӣ Саид дар шаҳраки Вахши ноҳияи Вахш корхонаи истеҳсоли полиэтиленро (плёнка), воқеъ дар кӯчаи ба номи Исмоили Сомонӣ, мавриди истифода қарор доданд. Корхонаи навтаъсис аз ҷониби Ҷамъияти дорои масъулияти маҳдуди «Саноати Чин» бунёд гардида, иқтидори истеҳсолии он дар як шабонарӯз беш аз 3,5 тонна маҳсулоти полиэтилениро ташкил медиҳад. Манбаъ: сомонаи расмии Телевизиони Хатлон.