PD kthehet në KQZ, Biba: S’jeni parti parlamentare, as subjekt zgjedhor скачать в хорошем качестве

PD kthehet në KQZ, Biba: S’jeni parti parlamentare, as subjekt zgjedhor

Pas vendimit për të çuar komisionerët e vet në Komisionet Zonale të Administrimit Zgjedhor, Partia Demokratike është rikthyer edhe në Komisionin Qendror të Zgjedhjeve. Bëhet fjalë për kthimin në tryezën e vet të përfaqësuesit ligjor të PD-së Niazi Kosovrasti dhe jo të anëtarëve që duhet të kishte propozuar PD si anëtar të këtij komisioni. Por rikthimi i Kosovrastit në KQZ ka sjellë dhe debate, pasi të zgjedhurit e majtë në këtë komision kanë kundërshtuar, duke theksuar se prezenca e përfaqësuesit të PD-së në radhën e përfaqësuesve të subjekteve zgjedhore nuk është i ligjshëm. Nënkryetari i KQZ-së, Denar Biba kundërshtoi gjatë këtë prani të Kosovrastit duke theksuar se ai përfaqëson një parti që nuk është më as parlamentare dhe mbi të gjitha nuk është subjekt zgjedhor. Në fakt, gjithë debati lindi nga parashtrimi i një sërë pyetjesh nga ana e Kosovrastit lidhur me procesin e deritanishëm të administrimit të zgjedhjeve. “Momenti i rëndësishëm në verifikimin e firmave është marrja e kampionit prej 5 për qindësh nëse i plotësojnë kushtet e kodit apo jo”, – tha Kosovrasti. Por këtij shqetësimi të tij i është përgjigjur Biba, i cili theksoi se interesi i PD-së për atë që ndodh në këtë tryezë, por edhe në gjithë procesin e administrimit të zgjedhjeve është zero. “Duke mos qenë subjekt zgjedhor interesi juaj me atë që ndodh këtu është një me gazetarët ose me çdo qytetar tjetër. Ju nuk keni një interes të posaçëm në lidhje me këto”, – tha Biba. Por Kosovrasti ka këmbëngulur se PD është parti parlamentare dhe kjo sipas tij përcaktohet nga rezultati i zgjedhjeve të shkuara. “Pa diskutim që jemi parti parlamentare dhe kuptimi i partisë parlamentare përcaktohet nga rezultati i zgjedhjeve të radhës që janë kryer”, – tha Kosovrasti. Ndërkohë që Biba këmbënguli se PD mandatet e fituara i ka dorëzuar dhe ky sipas tij është një fakt i njohur publikisht. “Partia Demokratike ka një marrëdhënie të shkëputur nga Kuvendit aktualisht dhe është fakt i njohur publik”, – tha Biba. Lidhur me këtë pretendim Kosovrasti u shpreh se KQZ duhet të marrë vendim që PD të mos jetë e pranishme. Diçka që përfaqësuesit e majtë në KQZ nuk e bën, duke mos dashur të nxisin edhe më tej konfliktin dhe mosmarrëveshjet politike në vend. Ndërkohë që paralelisht me këtë PD ka nisur të përzgjedhë komisionerët e KZAZ-ve për të plotësuar vendet që i përkasin në bazë të Kodit Zgjedhor. Ndonëse nuk është regjistruar në zgjedhje, PD ka vendosur që të jetë prezentë në procesin e administrimit të zgjedhjeve duke pretenduar se deri më tani këto komisione duke përfituar nga mosprania e opozitës kanë bërë shkelje të shumta sidomos regjistrimin e kandidatëve. Por ky veprim i saj ka trembur socialistët, të cilët i ndruhen një përdorimi të këtyre komisionerëve për të prishur zgjedhjet ditën e votimit. Kështu PD mund t’i përdorë ata në ato duke bllokuar vendimmarrjen në ato komisione ku opozita ka shumicën, ose mund të t’i përdorë edhe duke marrë vulat me të cilat fletët e votimit duhet të vulosen për të qenë të vlefshme në proces numërimi. Por PD nga ana e saj i ka mohuar këto skenarë, duke theksuar se çdo gjë bëhet për të kontrolluar procesin nga brenda.