Geysisslysið скачать в хорошем качестве

Geysisslysið

Geysir var sú flugvél sem hóf Ameríkuflug Loftleiða, 46 sæta Douglas Skymaster DC-4 (öðru nafni C-54), hún var smíðuð 1944 og tók í fyrsta skipti á loft 10. desember það ár. Var hún því yngsta millilandaflugvél Íslendinga. Hún var keypt í Oakland í Kaliforníu, af bandaríska flugfélaginu Transocean Airlines. Bandaríkjaher hafði átt hana þar á undan, hafði eignast hana nýja, 22. desember 1944. Geysir kom til Íslands 8. júlí 1948. Lagt var af stað í fyrstu áætlunarferðina til Bandaríkjanna 25. ágúst 1948. Millilent var í Goose Bay í Kanada til að taka eldsneyti og lenti svo vélin á Idlewild flugvelli í New York 26 ágúst, en flugvöllurinn var endurskírður JFK 1963. Koma Geysis til New York vakti talsverða athygli og birtust fréttir af þessu fyrsta íslenska áætlunarflugi í helstu dagblöðum vestra. Áhafnarmeðlimir voru sex talsins, Magnús Guðmundsson flugstjóri, Dagfinnur Stefánsson flugmaður, Einar Runólfsson vélamaður, Guðmundur Sívertsen loftsiglingafræðingur, Bolli Gunnarsson loftskeytamaður og Ingigerður Karlsdóttir flugfreyja. Þegar Geysir lagði upp í sína hinstu för þá var gert ráð fyrir að fljúga aðeins austur af venjulegri leið, sem var norðvestur yfir North Ronaldsay á Orkneyjum, síðan norður yfir Færeyjar, þaðan beina stefnu á Ísland og yfir Vestmannaeyjar og til Reykjavíkur. Þar átti svo að taka eldsneyti og skipta um áhöfn, og átti Jóhannes Markússon að fljúga vélinni til áfangastaðar hennar í Bandaríkjunum. Áætlaði Magnús flugstjóri að lenda í Reykjavík 10 mínútum eftir miðnætti, 15. september. Milli Færeyja og Íslands var þá djúp lægð, og því mjög hvasst suðvestan, bæði við jörð og hátt í lofti. Eftir að komið var í nánd við Færeyjar var eðlilegt loftskeyta- og talsamband við Geysi frá Reykjavíkurflugvelli. Kl. 21.30 taldi áhöfnin sig vera skammt frá Færeyjum og allt var með felldu. Flogið var í 8.000 feta hæð og bjóst flugstjórinn við að koma til Reykjavíkur lítið eitt á undan áætlun. Kl. 22.25 kemur skeyti til flugmálastjórnarinnar í Reykjavík um áætlaðan komutíma kl. 23.30, eða 40 mínútum á undan áætlun. Kveðst flugstjórinn ætla að hafa samband við flugturninn kl. 23.10, þá verði flugvélin komin í nánd við Vestmannaeyjar. Úti var niðamyrkur og allmikil snjókoma, og töluverð ísing fór að hlaðast á flugvélina. Um kl. 22.45 bað Magnús þá Dagfinn og Einar að koma afísingarbúnaðinum í gang. Í þann mund tók Bolli að stilla loftskeytatæki sín og ætlaði að fara að kalla í flugturninn í Reykjavík og Guðmundur var byrjaður að reikna nýja staðarákvörðun. Þetta var á milli kl. 22.45 og 22.50. Þá er eins og Geysir verði fyrir risahöggi, vinstri vængurinn rekst í eitthvað, vélin sviptist fyrst upp og stingst síðan fram á við. Hún virðist kastast langar leiðir, þungur dynur hreyflanna hljóðnar og þögnin tekur við. Geysir var týndur í um fjóra daga þegar sú fregn barst 18. september að Kristján Júlíusson, loftskeytamaður á varðskipinu Ægi, hefði upp úr hádegi þann dag numið veikt neyðarkall frá Geysi. Skipið var þá statt út af Skálum á Langanesi. Í fyrstu heyrði loftskeytamaðurinn veik SOS-merki á morsi á 600 metra bylgjulengd; þetta var kl. 13.15. Litlu síðar (13.35) er byrjað að senda út skeyti auk SOS-merkjanna frá sömu stöð og á sömu bylgjulengd. Tókst honum fyrst að greina stafina CIER, og síðan samfellt QTH UNKNOWN - ALL ALIFE. Þessi fregn barst á svipstundu um landið, og harmur íslensku þjóðarinnar snerist í einu vetfangi í ákafa gleði. Fánar voru dregnir að húni og það ríkti hálfgerð þjóðhátíðarstemmning. Ekki liðu margar mínútur frá skeyti Vestfirðings, þar til spjald var sett út í glugga Kaffistofunnar í Austurstræti, og á því stóð: "Geysir fundinn - ókeypis kaffi." Og fleiri veitingahús gerðu hið sama.