H LALREMPUIA / LUAH LOH LUNGDI NGHILHNI AWM LO / PHUAHTU : DARCHHUNGA скачать в хорошем качестве

H LALREMPUIA / LUAH LOH LUNGDI NGHILHNI AWM LO / PHUAHTU : DARCHHUNGA

KA RAWN FANG LEH HMANA KAN TUANNA TLANG (LUAH LOH LUNGDI) Phuah anih dan He hla hi tu phuah nge? He hla hi Darchhunga Hrahsel (a hnua Kohhran Upa 1928 kuma Phullen khuaa nemngheh ni ta) phuah ani. A phuah chhan chu a ngaihzawng, mahse a Luah Loh Lungdi ni ta si, an khaw nula hmeltha ber pawl a sawi Vanchhawng nula Tlangsawithangi (Chhungbuaii tih bawk), Mualkil mitha Tlangbawiha fanu (Upa Vanthuama farnu) a ni a. A ngaihzawng chuan hun lo takin a thihsan ta mai a. A lung a leng thei em em mai a, hla phuah thiam a ni bawk a, he hla Luah Loh Lungdi tia hriat lar hi a phuah ta a ni. A phuahtu chuan, “Ka rawn fang leh hmana kan tuanna tlang” tiin a thupui a dah a. Kum 1925 emaw 1926 emaw- a phuah ni-ah ngaih a ni.Darchhunga hi zai thiam tak, lam thiam bawk si a ni a, hla phuah a thiamin a sam em em hetiangin - Tlangsawithangi tleirawl chhuak chho hlawt chu Chhunga hian hla-in hetiang hian a han phuah a, Thangi chu a thiannu a hrilh tir ta chawt mai a – “ Zokai Chawngtlai par a vul bung mai, A tlantu sirvatea chan ka nuam e, Tichuan Thadangi ka tawng mahna” tiin Tumkhat chu an thing phur hawn dawn ah Thangi hnam hruihrualah chuan Chhungan a vuan ta tlat mai a – “ Tlangrel leh mi sel ka dawn chang lo, Kawlngo lungrual mah khi an leng thangvan zawlah, Thangngo, lungrualten aw I leng dun ang” tiin a hla phuah thar chu a sa ta mai nia. Thangi pawhin kal tum luih chu harsa a ti kher mai an ti. An Chawngchen thingfãr zan chuan nula leh tlangval te chu an chai tlaivar a. Chhunga chu lam turin Val Upa-in a ko chhuak leh ta a, lam chhuah pah chuan - “Zankhua a var tur i pâm mang e, Thangngo, nangnena kan dawhtling run hi, Ka chul ruai ruai mai awm e ni chhunah ” tiin a hla phuah sa chungin mute-lei-hrutin a lam leh ta heh heh mai a ni an ti. Palai a tir ta chawt mai Chhunga hi hmeithai fa, rethei tak mai chhungkuaa mi a ni hlauh mai a, Thangi lah chu mitha chhungkua atanga lo chawr chhuak, fanu mal a ni si a, zak chung chungin, Palai a tir ta chawt na a an hlawhtling ta lo. Chuta Chhunga mangang chuan – “Hnawmtui thang lianin a kuang a luah, Neih loh Changsial tiama leng hel ve reng chu,Lungrunpui luahlai a har mang e” a ti chuai raih a. Thangi chu a damlova, vanduaithlak takin rei pawh a nat hmain July 27, 1914 chuan a thi chu a ni ta der mai a. Chuta Chhunga lungleng lutuk chuan Thangi nena an thing phurh dunna tlang leh ram te chu a fang ruai ruai mai thin a – “Khawiah awm kher maw Thadang ràuthla, Ka zawng ruai ruai, ka hai ka hai mai dawn e, Kan zalna tlang thingte chhawl zawng zawng ” tiin zah pawh dawn zo lovin a tap a tap mai thin a. Chutih nakalai chuan Thangi thih kum pawltlak maiah chuan Khawdungsei khaw Lal Hrangchhuana chuan kum 1915 kum tharah chuan, “Tualbung khua zawng zawng, Ngopa Chawrahmun-ah lo chhuk vek rawh u” a rawn ti ta tlat mai si a, chuta Chhunga pem hreh lutuk chuan - “Kan vangkhaw chul tur ka ngaingam lo, Kan sum tual leh khawtlang a nghak rih Thangngo, Mahriaka laitual I leng tur chu” tiin a tap a bang thei ta lo, Lal thupek a ni miau si a, mi hnuvai ramah a liam thla ve ta hnak hnak mai a ni. Thangi a sawi leh a ngaih a reh thei silo. Hun a liam zel a, kum riat a ral hnu kum 1922 chuan lal chuan Khawdungseia kai vek tur a ti leh ta a, a khaw pumin an pem phei ta a. Tualbungah Khaw hluiah an kir leh thei ta Kum 1924-ah chuan Lal phalnain Tualbung Zokhaw nuam takah chuan kir leh theihna hun Lalin a hawngta hlauh mai a. Chhunga chu a kir hmasa pawlah a tang a. Thangi nen hlim taka an inlawm thinna ram te a han hmuh leh chuan, a lunglen ziaawm deuh tawh pawh chu a lo zual thar leh zo ta a, chuta a insum zo lo chuan - “Ka rawn fang leh thin e valriangan, Kan sul i hnu kan tumkawng Zotui thiang kha, Nghah loh hian Thangte a tling reng mai” a han ti leh ta nge nge a. Ka rawn fang leh hmana kan tuanna tlang (Luah Loh Lungdi) hla a piang ta Mahse khua a lo thal a, fartuah leh vau te chu an lo par vul leh ta chuk mai a, chuta a lunglen zual thar leh ta thut mai chu tuar zo lovin, a tawp nan vawi khat chauh tiin Luah Loh Lungdi hla hi a phuah leh ta hram a ni, hetiangin - Ka rawn fang leh hmana kan tuanna tlang, Tuahpui leh vau an vul leh ta; Kan sul i hnu khuarei an chang zo ta, Hring leh thar hnahnem ten lo bawm. Tawnmang em ni lunglem ka nei lo, Ka hawi vela ka tawng si lo; Zun leng erawh a cham tanglaiah, Luah loh lungdi nghilhni awm lo. Hmanah chuanin a bahsam thlah mawiah, Kan thliah senhri nauban a tawn; Tunah erawh vul leh sang thing lerah, Thliah loh ten par vul tang an ti. Chang hnih leh a thunawn bak hi chu Darchhunga phuah a ni lo.