超市大逃亡！三千間鋪頭一年內消失，永輝學極都死，股價跌跌不休。實體店倒閉潮愈演愈烈！生意越做越難，14億人都帶不動消費？零售寒冬劏開血淋淋真相！ скачать в хорошем качестве

超市大逃亡！三千間鋪頭一年內消失，永輝學極都死，股價跌跌不休。實體店倒閉潮愈演愈烈！生意越做越難，14億人都帶不動消費？零售寒冬劏開血淋淋真相！

永輝學極都死，零售寒冬劏開血淋淋的真相 舊年，零售界發生咗單震撼過雷曼爆煲嘅大事：全中國62個龍頭超市集團，合共執咗 3037 間鋪！ 唔好以為系個別公司唔好彩啊，睇真啲，名單上嘅系卜蜂蓮花、永輝、大潤發呢類曾經叱咤風雲嘅巨無霸。呢場唔系零星山火，而系成個行業嘅冰河時期殺到埋身！ 根據中國連鎖經營協會最新份《超市百強榜》，舊年，多達62間企業縮減門店數量，比例超過六成！夾埋總共關咗3037間鋪。得13間保持規模唔變，得25間仲有本事擴張。「收縮」已經系大型超市嘅共同關鍵詞。 睇品牌就更加清楚喇：沃爾瑪、永輝呢類「大而全」嘅舊模式正在急速退潮；相反，盒馬、開市客（Costco）呢類「專而精」嘅新玩法就逆市增長。而好似河南胖東來咁，專心做好一個區域嘅「慢公司」，反而靠獨特價值企穩陣腳。 其中最觸目驚心，系「世紀華聯」嘅母公司集百控股，一年內竟然關咗1009間鋪，占全國超市關店總數三分一！跟住到華潤萬家，就算旗下有Ole’呢類高端線，一樣要狠手削493間鋪。至於成日上新聞嘅永輝超市，舊年門店數縮水近四分一，冇錯，就系聲稱要「爆改」學胖東來嗰間永輝，照樣要斬234間鋪。 睇埋盤數就更慘情。舊年超市百強入面，營業額有增長嘅得42間，而營業額同店數雙雙上升嘅，只得14間，少到可憐。近年嚟，幾大連鎖超市嘅上半年總營收圖表，清一色系向下的斜線。龍頭永輝由峰值嘅487億人仔，大跌到得翻299億，個跌幅嚇死人。聯華超市都系一樣，由135億縮到95億。 所有跡象都指向一個事實：中國人，越來越唔願意行入大超市了。 巨頭們嘅鋪頭一間間咁閂，盤數一浸浸咁跌，呢啲唔系普通嘅市場收縮，而系一個舊時代被連根拔起嘅信號。到底背後系咩原因，令到成個行業跌得咁慘烈？ 如果話電商、外賣系從外圍搶客，咁盒馬、山姆同社區團購嘅崛起，就系從內部證明咗傳統模式有幾低效同笨重。 你睇嚇：一間硬折扣店，可能得500平方米，貨品（SKU）精簡到爆，但系人哋憑住高達3成-4成嘅自有品牌，將毛利率壓到1成5左右，最後淨利率反而更高。更誇張系「坪效」（每平米面積產生嘅銷售額），可以系傳統大賣場嘅7倍！ 反觀傳統超市，死守住2成-2成5嘅毛利，但租金貴、裝修貴、人手多、水電雜費重，最後計落條數，淨利所剩無幾。坪效低、人效低，成間鋪就系一個成本黑洞。 最致命的系「社交屬性」，傳統超市只有1分。 即系話呢，對於後生仔女嚟講，去超市毫無分享價值，亦都帶唔到任何身份認同，完全失去作為「消費目的地」嘅吸引力。試問咁樣一間鋪頭，仲有咩存在價值呢？ 所以話呢，呢場全國性嘅超市關店潮，與其話系突如其來嘅寒冬，不如話系一次遲早要嚟嘅行業大洗牌。傳統超市「大而全」嘅模式，喺一個追求效率至上、體驗為王嘅新消費時代，已經徹底脫節，力不從心。 行業寒冬之下，永輝超市嘅故事，就系最悲情又最抵死嘅例子。 自從2021年開始，永輝就跌落蝕錢的深淵，到今日累計蝕本已經衝破100億人仔大關。舊年，永輝諗到條「橋」—— 向神級超市胖東來偷師！於是，全國過百間永輝門店，展開一場聲勢浩大嘅「胖東來式改造」，簡稱「胖改」。 憑住「胖改」嘅話題，永輝確實搶到唔少眼球，股價都癲過一排。但系，童話好快就完。今年10月29號，永輝出第三季業績，營收124.85億，但歸屬股東嘅淨利潤，竟然再蝕7.09億。最諷刺的系，佢一邊高調「胖改」，另一邊就不斷「閂鋪」。今年上半年，已經閂咗超過200間長期蝕錢嘅門店。最近，連深圳南山來福士廣場嘅分店都撐唔住喇，公告話「經營不善」，11月16號正式玩完。 永輝而家嘅策略，就系「關差留好」：一邊改造有潛力嘅店，一邊手起刀落斬咗蝕本貨。唔可以否認，每一間經過「胖改」嘅永輝，開業初期確實人山人海。好似北京第一間改造店，首個月客流超過咗90萬人次，墟冚到不得了啊。改造後嘅永輝，Day off區、飲水機、免費試食、唔啱心水就退貨……表面功夫，學足九成。 呢場改造運動背後，系名創優品老細葉國富。佢舊年透過子公司入股永輝近3成，成為第一大股東。今年3月，葉老細親自拍板領導「胖改」，佢仲曾經講過：「胖東來系超市嘅唯一生路」。點知，現實系就連胖東來嘅光環，都救唔到永輝。 點解？因為永輝學嘢，只學到個殼，學唔到個髓。 網上越來越多消費者呻：改完之後嘅永輝，性價比好似不如以前，冇咩特別值得買。更重要的系，胖東來最核心嘅競爭力——極致嘅員工福利同人文關懷——永輝根本學唔到，或者系唔願意學。 人哋胖東來，員工每周工時唔超過36個鐘，年薪假至少40日起跳，稅後月薪穩陣袋9000蚊人仔。呢個待遇，打趴好多一線城市嘅所謂白領。就連送貨嘅卡車司機都有專用淋浴間，毛巾浴巾任攞，飯餸免費。呢種將員工當人嘅企業文化，先系胖東來嘅靈魂。 但永輝學到咩？學咗點樣擺貨、點樣設置Day off區呢啲表面嘢。根據《中新經緯》報道呢，永輝每改造一間門店，平均要燒錢1878萬人仔！佢哋目標系明年前改完300間，即系話仲要瘋狂燒錢。而永輝個荷包呢，早就干塘。第三季末，公司賬面現金得33.58億，但負債總額超過咗300億！早排仲要急急腳搞定向增發，撲水39.92億，主要就系用嚟填翻呢個「改造大氹」。 永輝嘅「胖改」，已經變成一場豪賭。 賭嘅系，燒完幾十億之後，可以扭轉乾坤。但睇住而家「越改越蝕」嘅勢頭，好大機會未睇到曙光，自己就先被呢場改造抽乾血。 講開胖東來呢，佢自己最近都陷入爭議。創辦人於東來突然喺社交平台宣布「賣課」：個人分享3個鐘，收費50萬；企業家小組每年學習兩三次，每人兩日，盛惠100萬！佢話收益會用於「傳播美好」。 消息一出，網上即刻炸開咗鍋。有人話佢「當自己系巴菲特」，亦都有人話「東來哥飄了」。當然啦，都有粉絲撐佢，話呢啲系「劫富濟貧」，篩選真正有心想學嘅企業。 其實於老細呢幾年，免費幫過十幾間超市做改造，幫嘉百樂一間就使咗5000萬。部分品牌（例如步步高）的確因為「胖改」翻生，但更多好似永輝、中百集團咁，學完之後盤數一樣唔掂。中百集團上年照跟「胖改」，結果全年狂蝕5.28億，今年上半年蝕本持續擴大至2.55億。 於東來突然收費，外界估計同佢早前深夜發文，怒斥某間被幫扶企業「不懂感恩」、「同門內鬥」有關。可能真繫心灰意冷，決定設個高門檻，唔再濫幫。 無論點樣，胖東來本身已經由一間超市，升級成「5A級旅遊景點」。今年國慶假期，胖東來8日生意額超過8億，平均一日賺一億！仲帶挈埋河南許昌嘅旅遊業，有遊客話朝早9點開門要排3個鐘先入到去。 胖東來嘅成功，證明咗一樣也：唔系大家唔需要線下零售，而系拒絕千篇一律、毫無價值嘅零售。 消費者願意用腳投票，去支持一間真正尊重員工、關懷顧客嘅企業。 咁寫到最後呢：超市故事未結束，只系換咗主角同劇本 成個傳統超市行業嘅大撤退，系一個時代終結嘅警號。當買餸可以團購、日用品可以網購、急嘢可以即時配送，仲有幾多人願意特登揸車、搵位泊車、行入間大而無當、毫無驚喜嘅超市？ 永輝嘅掙扎，系所有舊時代巨人嘅縮影：以為抄襲成功模式嘅表面功夫就可以翻盤，結果忽略咗最根本嘅「價值創造」。零售嘅本質從來都唔止於交易，而在於信任同埋體驗。當你間鋪俾到顧客嘅，淨返低「方便」同「平少少」，而呢兩樣嘢隨時可以被更強嘅對手取代，咁你離執笠就唔遠喇。 至於嗰啲仲喺度死守萬尺賣場、等客自來嘅傳統超市，睇怕都好難挨過呢個漫長寒冬。呢場淘汰賽，先啱啱開始咋。