OLAS ASIH| CERITA BERBAHASA BALI| CERITA BERGAMBAR скачать в хорошем качестве

OLAS ASIH| CERITA BERBAHASA BALI| CERITA BERGAMBAR

OLAS ASIH Ada anak muani madan I Madé Diarsa. Geginané sai-sai nanggap upah, yén ada anak nundén magaé ngayahin tukang. Sawiréh ia anteng, sadina-dina ia maan gegaén. Pipis upahné magaé belianga baas lakar jakana. Baana tiwas buka kéto, ia setata angen tekén anak lacur. Liu suba anak bakat tulungina. Kacrita, di bencingah peken Majalangu, I Madé Diarsa sedeng iteh madaar nasi, sagét teka gegéndong maekin nagih ngidih nasi. Panganggoné sétsét pasranting nyangkil éndongan mawadah tapis, tur matungked. Batisné berung ngetél nanahné garang buyung. Pajalané énjok-énjok naanang sakit. Bonné bengu malekag, makejang anaké makaad ningalin gegéndongé ento. Gegéndongé mamunyi kené, “ Jero olasin tiang icén tiang nunas nasi!” Lantas tagiha nasiné I Madé Diarsa ané enu daara. I Madé Diarsa ngénggalang masaut, “Jero anak lingsir, sampunang niki ambila, niki sampun carikan. Tan dados makidihan carikan!” I Madé Diarsa kangen kenehné, lantas ia meliang gegéndongé nasi aji séket rupiah. Dagangé nekep cunguh tusing kodag baana ngadek bengu. Ngéncolang ia maang nasi lantas tundéna gegéndongé énggal-énggal magedi. Makejang anaké mablanja ngadésem lantas magedi sawiréh tusing duga baana ngadek bengu. Kéwala, I Madé Diarsa biasa dogén sebengné. Sasubané suud gagendongé madaar lantas ajaka kumahné I Made Diarsa. Gegéndongé gandonga tekén I Madé Diarsa mapan batisné berung.Teked di pondokné lantas Ni Luh Sari ngénggalang nyapa gagendongé, “ Durusang malinggih jero anak lingsir “. I Madé Diarsa mresihin tur ngubadin batis gegéndongé. Suud kéto lantas ia ngejuk siapné aukud lakar anggona bé. Kurenané Ni Luh Sari ngaé bubuh muah bé siap. Suba pragat lantas sayaganga. Sube suud madaar gegéndongé lantas mamunyi, “ Jero anak lanang istri sareng kalih, tiang gumanti tiwas, tua sakit kadi mangkin. Dija men tiang madunungan réh sampun peteng? “ “Sampunang nika malih baosanga. Durusang jeroné sirep di balé metén, tiang di ambéné sareng somah tiangé “. I Madé Diarsa, kurenané, kéto masih gegéndongé sirep leplep. Buin maninné, Madé Diarsa bangun kapupungan, Ia makesiab sawiréh gegéndongé ilang tanpa sangkan. Mara pedasina baléné kedas makasur, maseprai putih sentak magaleng tegeh misi sasulaman alus. Tungkedné masalin dadi tungked emas. Éndongan tapisé dadi sutra petak bek misi emas muah pipis. I Madé Diarsa bengong malengok.” Pedas gagendongé ento padadian déwa, kéto kenehné”. Laut maka dadua nyumbah ngaturang suksma. I Madé Diarsa sugih ngelah braya liu ulian madasar olas asih. Karingkes saking: Buku Satua Bali, Jilid IIA